九州鬆餅咖啡 台北松菸店 (信義區)

兩年前睇了電視節目介紹就好想嚟食，但那次無訂位，去到冇訂位是吃不到，飲恨了。

今次來台北來到松菸區，再見到呢間餐廳就抱著一試嘅心態，睇下有冇機會walk in有得入，可能係平日，好好彩有位可以直入。

餐牌上有各款形形色色嘅鬆餅🥞同waffle，有鹹有甜嘅款式，花多眼亂，每一款嘅相都好吸引呀！

因為剛食完午餐無耐，唔係太餓嘅關係，而每人有最低消費，所以叫了一份鬆餅同一杯飲品。我地叫左人氣no.1嘅抹茶提拉米蘇鬆餅和冰水果茶。

期待已久嘅鬆餅來到，擺盤好靚，不停攞相機係甘影相

抹茶提拉米蘇鬆餅: 3塊鬆餅疊在一起，每一層之間都撒上香濃嘅抹菜粉，而最上面一層有一層厚厚的瑪士卡邦芝士加抹茶粉，旁邊配有抹茶黑糖醬和香草雪糕。 鬆餅切下去跟平常的比較扎實， 入口有淡淡小麥香味。如果一個人要完成一份就會有啲膩，都係兩個人分享適合些。

冰水果茶: 幾好飲，不會太甜，有茶味同粒粒水果，不過一杯要150有點貴

食完之後，如果有興趣回家自己整鬆餅食的話，都可以買它的鬆餅粉，有95折呀！

豪大大雞排士林總店 (士林區)

以前拍拖去第一次去旅行嚟到台北行士林夜巿，第一次豪大大雞扒就愛上左佢。

結完婚之後重遊舊地，嚟到台北，見到豪大大雞扒舖頭，決定買嚟食緬懷一番。

首先排隊落單，攞飛之後等叫號碼取貨。現場都有唔少人等緊攞食物，店員好快手，大約等左五分鐘左右就有得攞。

店員會問要辣定唔辣口味，唔食得辣嘅我地當然要唔辣。

雞扒同以前一樣都係甘大塊，大過塊面嘅雞扒，豪大大堅持唔切件，原件一塊過炸。雞扒炸粉厚度算適中，雞肉唔會炸得過火，咬落有嫩滑有肉汁，味粉令整份雞扒幾惹味。

雖然香港都有得食，但係台灣食比香港食嘅價錢打左個七折左右，無理由唔食吧。

三媽臭臭鍋 台北昆明店 (萬華區)

今次嚟台北，我地住西門町，為左方便出入買野同食野。每一次出入去捷運站，都會經過三媽臭臭鍋，次次經過都見到好多人排隊，最特別係啲鍋全部係門口位置煮，雄雄烈火甘煮，次次都閒到好香流曬口水，但係次次我地都飽到捧住個肚食唔落。


嚟到最後一日，冇理由帶住遺憾番去嘅，就算飽都要去試。夜晚十一點幾去到，都座無虛席，原來有最底消費，每人要最少點一個鍋，但我倆都幾飽，要每人食一個真係搞唔店。

一個鍋120元台幣，真係物超所值，附送白飯一個，如果堂食可以任飲當日飲料，唔夠餸當然可以加錢單點添配料。

我地最後都係買一份外賣番民宿食，點左一份大腸臭臭鍋，係門口落單付款，我地坐係門口等外賣，可以睇到整個煮食過程，的確幾吸晴，有唔少行人經過停低睇睇，甚至入嚟幫襯。

我地有好多材料舖滿成個鍋，有豬肉片，菜，金菇，臭豆鍋，蜆，大腸，腸仔等等，用料豐富。大約等左十分鐘左右就有得攞，快快趣番民宿急不及待試食。


打開個蓋，一陣香味湧出嚟，當初仲擔心臭臭鍋會好臭，但完全冇呢個問題，湯飲落幾濃郁，配落白飯食一流。其他材料食落不過不失。



以120元嚟講，超級物超所值呀！

永康牛肉麵 (大安區)

老公話嚟台灣唔食過牛肉面等如冇嚟過台灣，今次嚟永康街就嚟試試旅遊書必推介嘅永康牛肉面。

沿著永康街行點解行到完都唔見，望一望地圖原來行過左龍，舖頭係那間好搶眼食雪花冰嘅舖頭轉入去直行。

大約12點幾嚟嚟到，門口已經開始排隊，入面已經坐無虛席，等左大約十分鐘左右就有位。

餐廳有兩層嘅，繁忙時段要搭枱，坐得有點擠。這樣沒有最低消費嘅。

一進來就見到櫥窗放滿好多款小菜，40/60一碟。

餐牌上有圖同幾國語言翻譯，方便唔同國籍遊客點餐。

我地叫左大嘅紅燒牛肉面(280)，有六大舊牛肉，軟軟嫩嫩嘅，燉得都幾入味。湯面有幾多紅油，但只帶點微辣，算幾濃郁。面條就似食擔擔面嘅幼身面條，煮得剛好，唔會太淋。

都算幾好食嘅，不過要280一碗都偏貴，下次再嚟台北可能未必會特登過嚟食。

度小月 永康店 (大安區)

來到永康街這一條食街，經過見到度小月，我地倆都想入去緬懷一番。曾經係我地每一次嚟台灣都要食一食佢嘅擔仔面。


我地叫了最馳名嘅擔仔面，肉燥飯，滷蛋，冷泡菜。

擔仔面: 同當年食嘅味道唔同左，好淡口，而且好細碗，啲面兩啖就食完，同埋面上面啲肉燥好少
魯肉飯： 不過不失啦，老公覺得啲魯肉似肉燥多啲，我地鐘意食五花腩肉絲嘅魯肉飯
滷蛋：正正常常，冇咩特別
冷泡菜：幾好飲，有陣清新嘅檸檬味



這裡是有最低消費，每人最少消費100。

下次嚟台灣應該未必會再嚟食