欣葉食藝軒 (信義區)

去台北玩咗咁多次，XO仔印象中最好食嘅台菜應該係兒時同婆婆喺「欣葉」食過嗰一餐，不過邊間分店就真係唔記得啦！碰巧今次長輩們要求食台菜，細佬第一時間就諗到可以回味一吓，所以就揀咗「欣葉食藝軒」黎試。餐廳位於台北101辦公大樓嘅八十五樓，第一次去原來都幾複雜，因為入口唔易搵，兜黎兜去後又要轉升降機，搭前仲要過埋保安區添。店子紅黑嘅正門及鯉魚牆均滲出時尚又傳統嘅中國色彩。進入大廳即見到台北101嘅畫品，道明分店嘅特色。網上訂座，流程簡易清晰，對應部門嘅同事遇上問題少男都好有耐性地續一解答疑問。除咗要收取訂金之外，部份菜式必先預訂，而且規定每位客人基本消費為NT 1,080，另加一服務費，如要選坐靠窗位置，基本消費就會高少少。當日因席上有畏高人士，故選擇咗不靠窗位置，真係冇諗到十二人會被安排入座內廳高咗半級嘅開放式廂房內，私人空間足，厚墊椅櫈又夠舒適大方。飲品牌共有兩頁。食物方面，午市有兩款套餐可選。散點項目則有十二頁之多。因細佬早以電郵訂下大部份招牌菜，用餐前只需加多幾味就已經好夠食。衣著整齊嘅服務生大多客套有禮，不過如果可以友善地加返啲笑容，相信感覺會更良好。餐桌上有齊備嘅餐具，整潔衛生。炸牛膀薄片（免費贈送）：唔講真係食唔出第一碟免費小食係牛膀所炸出嘅薄片。金黃閃閃嘅炸牛膀薄片好比薯片般巧薄香脆，食落清香得黎一啲都唔覺熱氣，實屬驚喜之作。醃提子（免費贈送）：小肥冇試，不過長輩們都大讚醃提子味道好得意同好開胃。辣豆乾（免費贈送）：小食中以此味辣豆乾最為惹味醒神。花膠佛跳牆 （必先預訂；NT 550/一份）：睇戲時就聽得多，但XO仔咁大個人都係第一次食佛跳牆，故亦十分期盼。如相所示，佛跳牆盅面有塊大大嘅花膠，NT 550黎講絕對足料，可惜以用排骨及雞所煲製黎講，個人就略嫌淡淡嘅湯底唔夠濃甜，就好似煲得味夠火候，佛祖點都跳唔過幅牆咁。麻油腰花（必先預訂；NT 450/份）：請留意，下圖中之份量為兩份麻油腰花。色澤濃厚嘅湯中每件豬腰均爽厚震撼，其質感脆口之餘仲好夠潤滑，絕對冇話煮到過熟而縮哂水，必吃推介也！食藝軒冷三拼：三色拼盤包有烏魚子、五味宜蘭鮑、白切嫩土雞。每份拼盤單價為NT 960，但份量唔得平均，要十二人都有得分黎食的話，鮑魚為NT 150/隻、烏魚子NT 90/片、白切嫩土雞NT 420/份。三款冷盤都可以用個「乾」字黎形容，明顯唔係細佬杯茶！最重口味嘅烏魚子又咸又嚡又乾；白切土雞欠缺光澤，咬落一啲都唔嫩囉，就連雞皮都唔潤；鮑魚厚身得黎又硬又韌，不吃也吧。煎豬肝（必先預訂；NT 320/份）：睇相都睇得到每件豬肝好夠厚肉，外表亦好夠油潤，無奈食落口微爽得黎有啲硬同粉粉地，似係用火過猛，引致初期肝硬化嘅跡象，勁嘥料！蚵仔煎（NT 380/份）：台灣名菜個煎蛋底外觀好夠金黃吸睛，但就敗在蚵仔唔得肥嘟嘟，加上搵蔥易過搵蚵仔，NT 380絕對有搵笨之嫌！活處女蟳蒸米糕、活處女蟳蒸米粉（必先預訂；NT 1,380）：蟹品菜式必先預訂，可選米糕或米粉作底，伴配藍色醋汁。小肥因敏感問題未有食用，故只能同大家分享靚相。酥炸花枝丸（NT 70/粒）：圓碌碌嘅花枝丸色澤就夠光亮，入口卻過份軟腍，唔得香口鬆彈，甚為失色。香檳茸炒時蔬（NT 420）：反而香檳菇炒菜芳香爽脆，幾夠鑊氣。蒜香牛菲力（NT 720）：已熟透嘅牛菲力粒粒厚韌老嚡，加上肉汁欠奉，真係食唔過！櫻花蝦高麗菜（NT 350）：高麗菜新鮮清爽，簡單以櫻花蝦點綴已夠惹味。招牌杏仁豆腐（必先預訂；NT 120/碗）：招牌甜品杏仁豆腐清香嫩滑，微甜易入口。環境雅致時尚，開揚舒適，可惜服務生之態度及經典菜式之質量甚為參差，遠不及回憶中嘅味道，或許名店進化咗嘅口味較迎合其他遊客喜愛吧，請恕肥肥家族不懂欣賞。

這一鍋皇室秘藏鍋物 (大安區)

去台灣玩，家人第一句都會話想食火鍋，上次同班姨媽食過美如藝術般o既「寬X子」後，今次就決定一試潮興熱店「這一鍋皇室秘藏鍋物」。人氣火鍋店最與別不同之處就係門面及室內裝修o既設計都用上兵馬俑作題。正門有迷你水池及木橋，由兵馬俑守門真夠威嚴。推開重重o既鐵門即見龍椅一張，更顯氣派。用餐大堂所有散座均為方形木造枱櫈，並以屏風隔開，中國風得黎清爽簡潔。四周有不少靚花擺設，感覺甚為雅致。最有古代感就係洗手間門外寫有「男」字及「女」字o既布簾，認真搞鬼。小肥早已托台灣女朋友訂座，一行九人到步即被安排入座廂房，餐桌上亦早已擺放好茶具。細心一看，方才留意到碗碟茶杯均為翠玉色系列，貴氣十足。每人一塊紅色o既掛頸紙圍裙，衛生非常。細問下先知原來圍裙上o既「呷嘎宋嘎」意思原來係「吃得很爽」；好，就睇吓食完會幾爽！厚本餐牌頭幾頁先講解推廣優惠、靚鍋底賣點、幾篇火鍋傳說及鍋品食用秘訣。散點火鍋料項目全伴上彩圖對照，計埋大圖共有十二頁之多。消費指南及細則如最低消費額等，就列咗喺尾頁，有埋圖表夠哂清晰易明。老火湯（NT 110/人）：據餐牌所講，老火湯底以大豬骨、雞骨、豬後腿肉及多款中藥等精髓所燉製而成。奶色o既老火湯肉味香濃，且傳出陣陣胡椒味，餐前先嚐一碗直令胃口大增。翡翠鮮蝦滑（NT 380）：因為港版蝦滑大多為灰色，所以當見到蝦滑如此皎潔雪白時真係有啲意外。煮熟咗o既蝦滑爽脆彈牙，鮮甜可口。黑玉墨魚滑（NT228）：同白雪雪o既蝦滑成對比o既墨魚滑色澤真係黑得夠哂勻循，幸好咬落柔潤有彈性，唔錯。梅花豬肉（原價NT 268，拼埋「和牛梅花」則可以優惠價NT 10享用）：豬肉雖切成薄片，但個人覺得肉質都係偏嚡，如果唔係半送的話一定唔會叫黎食。雪花牛肉（NT 268）：砌到一朵花咁o既雪花牛肉片從紋理睇講真唔多似雪花，色調又唔夠鮮明，食落唔夠軟滑亦冇乜肉香，請恕細佬未能推介。培根牛肉（NT 338）：據餐牌簡介所述，培根牛肉o既油花分佈應最均勻，但如相所示，碟中o既白色肥膏全積聚於一邊，個人覺得絕不均勻，煮熟咗亦屬嚡口之列，不吃也吧。極神仙牛肉（NT 488）：多款牛肉中只有兩款啱XO仔口味，其中極版神仙牛肉薄片掛於架上，以乾冰營造出仙氣，外觀最為震撼。神仙牛肉o既雲石紋就真係表現出靚牛肉o既油脂如何均勻，即煮即食半溶於口中，肉香軟腍，何其美妙！和牛梅花（NT 588）：第二款靚牛就係最薄巧o既和牛梅花。和牛紅白o既紋理同極神仙牛肉可謂不相伯仲，講真飲咗幾杯後，兩者質感如何不同已難以分辨，只係覺得好食就夠。松阪豬肉（NT 328）：松阪豬肉片疊成玫瑰花形，這個外表同之前喺「寬X子」食過o既有八成相似，但「這一鍋」個版本就明顯少配咗個鮮蛋黃醬汁。可能係先入為主o既關係啦，未黏上蛋黃o既松阪豬肉雖則夠爽，但就欠缺咗份柔滑，有陣時菜式o既靈魂就是隱藏在那一點點。。。鮮跳活蝦（NT 268）：小肥一向少食蝦蟹，尤其係當身處於異地時，不過見蝦隻當真係活生生咁喺隻碟上跳來跳去時就不得不拍下照片與大家分享。半殼扇貝（NT 368）：扇貝體積同彩圖一樣咁大隻，烚熟咗仍能保持爽厚嫩滑，！青竹蚌（NT 268）：睇相已知青竹蚌其實即係蟶子。蟶子原條冰陣上枱，夠哂體頭，可惜滾兩滾同滾耐啲蟶子都一樣咁韌，即使味道幾鮮，咬唔到已大打折扣。五彩鮮蔬盤（NT 198）：鮮綠色o既蔬菜均新鮮爽脆，實屬正菜也！福氣粥（NT 100）：最後加NT 100即可加碗白飯由服務生以鍋底即煮香濃鮮甜o既福氣粥。雖然九人只可每人分到一小碗，但靚粥極之暖胃，一小碗就已經夠哂。乳酪冰沙（免費贈送）：清涼o既冰沙味道就好似益力多咁多甜微酸，飯後一小枝有助解熱消滯。台灣人氣連鎖火鍋店「這一鍋皇室秘藏鍋物」裝潢極富中國色彩，格調輕鬆，服務優質，環境又夠衛生。XO仔可能係因有比較下，總覺得「這一鍋」除咗老火湯底及福氣粥最有賣點之外，火鍋料反而不及市內其他火鍋專門店，不過其價錢講真同時亦比某幾間便宜，要揀去邊間食就要睇大家追求啲乜野o既享受啦。

Visiro Café & Smile Beauty (大安區)

原意想去名人咖啡館潮聖，可惜輪候時間長達成個鐘 ，眼見同行o既姨媽們已面露疲態，外出又開始有少少雨粉，XO仔同表妹兩個五月天迷最終決定轉場，求其行咗入去街道上一間有位坐o既「Visiro Café & Smile Beauty」。門外黑版所示，店子有售香港雞蛋仔，似乎台灣人都有留意香港飲食文化。 室內o既方形散座全以雲石餐桌配黑色椅櫈，顏色對比同兩幅一黑一白o既牆身、及枱上以黑杯承載白紙巾一樣咁明確突出 ，感覺摩登涼爽。收銀處o既透明玻璃雪櫃陳列出手工蛋糕，不過都未能令小肥動容。餐牌合共有兩頁，其中一頁全為飲品。第二頁則為甜品及熱盤。其中一項朱古力布朗尼被封為「黑色幽默」，莫非周董就係老闆？！定係想幽佢一默呢？！ 我地每人先點咗杯飲品，六杯無一相同，就連拉花圖案都各有獨特之處。表妹所揀o既「紅茶歐蕾」以黑色o既無邊托盤襯上透明玻璃茶壺，另跟熱奶及蜜糖，美觀齊備 。凍貝禮詩拿鐵（NT 180）：白色o既泡沫上以朱古力醬拉出雪花花紋，美過容o既飲品外表果然出眾 。凍奶好夠香滑，可惜細佬完全飲唔出任何Baileys味，真係丁點酒香都冇，所以都幾失望 。法式香蕉巧克力鬆餅（NT 240）：鬆餅同配料份量都好足，雖則全部都放埋喺同一隻碟上，不過就冇預先撈勻哂，望落好整齊。鬆餅脆口乾身，小弟只係略嫌餅身唔夠鬆化，反而配角焦糖香蕉片清甜香脆 ，更為可口。「Visiro Café & Smile Beauty」地方潮就夠潮，經美容師一雙巧手調製o既飲品都好靚，無奈味道只屬一般，個人覺得仍有好大o既進步空間。

台北寒舍艾美酒店-探索廚房 (信義區)

表妹經常外遊，深知台北o既商店大多要十一點後先開門，故訂酒店時亦一早注明要包埋早餐，好等姨媽們唔洗急於起牀出動 。團友六人每朝早就喺酒店餐廳「探索廚房」度集合，食完個自助早餐就出去行街街。「探索廚房」正門牆身一半為雲石造，另一半有條頗兇猛o既魚隻裝飾o既則為木造，襯托埋吊喺天花上o既抽象藝術品，感覺都幾新潮 。用餐大堂樓底都幾高吓，間隔開揚通爽，厚墊o既座椅都好舒適。埋位後，服務生隨即上前問及各食客選飲咖啡或茶品，並給予小牌作標記。XO仔習慣咗每日最少飲三杯咖啡，越濃越愛，酒店杯咖啡香濃得黎一啲酸味都冇，好啱細佬口味 ！多種理由下，肥肥家族出門都絕少食生果，最多都係食早餐時飲番幾杯鮮榨果汁就算 。雪櫃內o既果汁選擇除咗有大路啲o既橙汁、菠蘿汁同西瓜汁之外，其中最特別應該係綠色o既「芭樂綜合汁」，微酸帶甜，清新清爽，極之討好 。食物方面，就同其他自助餐冇乜大分別，都係分穀物片區、煎蛋奄列區、沙律區、麵包區等，當中亦有煙三文魚、壽司、凍肉、三文治等供應。個人因有食物敏感問題，所以就主攻鬆軟甜美o既「巧克力可頌」。XO仔始終係喺香港土生土長，飲食習慣都偏愛食中菜，早餐都唔例外，每日點都要有啲粥米飯麵落肚，腸胃先會滿足。餐廳o既粥唔係差，亦有多款配料，但只屬中規中矩，未能令人嘩然。粥品白飯全為自助式，湯麵則即叫即滾，配菜全為自選。湯米粉清就夠清，可惜清到連味道都唔係幾夠 ，細佬結果就以濃味o既滷肉碎黎自加調味。入住「台北寒舍艾美酒店」所包o既「探索廚房」自助早餐款式唔算少，不過就講唔出有咩特色，水準亦只屬一般，幸好環境舒適衛生，整體尚算合格。

橘色涮涮屋 新光A9館 (信義區)

疫情後初次與居台嘅家人相聚，地位最高嘅舅公專登選於鄰近酒店嘅「橘色涮涮屋」新光A9館盛設款待，為一眾晚輩洗塵。名牌日式火鍋店金亮嘅竹林設計由門面延身至室內，時尚雅緻，甚有氣派。十多人派對於私人廂房內進行，光線充裕，私隱度高，且有專人招待。每位席上有齊備嘅自用餐具及調味配料。眼見長長嘅餐桌中央有兩個大金盤，大姨丈即鬼馬地問係咪用黎洗手，成功搞起個氣氛。深知姨媽們最愛食蟹蟹，舅公第一時間即點原隻北海道鱈場蟹，新鮮貨色當然係要於飯前繞場一周顯示實力啦！姨姨認真客氣，仲備好日本名牌十四代清酒！（開瓶費NT 500/樽）火鍋套餐揀咗清啲嘅昆布柴魚湯。第一道先上「綜合菜盤」，由哥哥仔代為灼煮。菜盤內含嫩口嘅豆腐、軟彈嘅蟹角同菇菇、爽甜嘅粟米等。另跟嘅開胃前菜共有三款選擇，個人首選幼滑清甜嘅和風蘆筍豆腐。主廚前菜每天不同，當晚嘅串燒炸雞熱辣香脆，份量堅勁，十幾人分咗六串已經飽咗一大半。等待廚房炮製生猛嘅蟹蟹時，食肉獸先享用紅肉主菜。紐澳薄切牛舌（NT 1,280/套餐）：切得夠薄嘅牛脷爽潤富彈性。頂級松阪豬（NT 1,230/套餐）：大大塊嘅松阪豬肥膏頗為強勁，正因如此，煮出黎先可以咁鬆爽唔嚡口。日本黑毛和牛板腱（NT 3,100/套餐）：柔潤嘅黑毛和牛紅白雲石紋理分明，半溶於舌上嘅口感最正，油脂一啲都唔過份，所以食多兩片都唔覺溜滯。日本頂級和牛（NT 4,300/套餐）：有比較下，反而頂級和牛最厚身同帶微微韌，要二選一的話，個人覺得黑毛和牛板腱更為可口兼化算得多。北海道鱈場蟹（時價）：壓軸上場嘅鱈場蟹共分開兩部份，白肉燈紋嘅蟹腳由師傅燒出，靚蟹如絲絨般幼嫩，爽厚多汁，冇得彈呀！其餘部位就交由貴客自己煮。鱈場蟹鮮甜無比，超！跟餐嘅單尾大家都揀食粥，睇住哥哥仔熟手地撈入白飯、蛋蛋、碎蔥、紫菜，索盡湯底嘅精華，已教人興奮不已！橙美亮麗嘅粥品熱辣辣、香噴噴，入口軟綿暖胃，鮮香濃甜。節令水果：由於腸胃已經冇哂位，大家決定放棄甜品，真係冇諗到經理姐姐會安排幾款清爽嘅節令水果為客人幫助消化。和風涮涮鍋專門店「橘色涮涮屋新光A9館」高雅衛生，服務優良周到，晚市海陸主菜中嘅幾款和牛、北海道鱈場蟹新鮮高質，出色味佳，客似雲來實不無道理！