欣葉食藝軒 (已結業)

去台北玩咗咁多次，XO仔印象中最好食嘅台菜應該係兒時同婆婆喺「欣葉」食過嗰一餐，不過邊間分店就真係唔記得啦！碰巧今次長輩們要求食台菜，細佬第一時間就諗到可以回味一吓，所以就揀咗「欣葉食藝軒」黎試。餐廳位於台北101辦公大樓嘅八十五樓，第一次去原來都幾複雜，因為入口唔易搵，兜黎兜去後又要轉升降機，搭前仲要過埋保安區添。店子紅黑嘅正門及鯉魚牆均滲出時尚又傳統嘅中國色彩。進入大廳即見到台北101嘅畫品，道明分店嘅特色。網上訂座，流程簡易清晰，對應部門嘅同事遇上問題少男都好有耐性地續一解答疑問。除咗要收取訂金之外，部份菜式必先預訂，而且規定每位客人基本消費為NT 1,080，另加一服務費，如要選坐靠窗位置，基本消費就會高少少。當日因席上有畏高人士，故選擇咗不靠窗位置，真係冇諗到十二人會被安排入座內廳高咗半級嘅開放式廂房內，私人空間足，厚墊椅櫈又夠舒適大方。飲品牌共有兩頁。食物方面，午市有兩款套餐可選。散點項目則有十二頁之多。因細佬早以電郵訂下大部份招牌菜，用餐前只需加多幾味就已經好夠食。衣著整齊嘅服務生大多客套有禮，不過如果可以友善地加返啲笑容，相信感覺會更良好。餐桌上有齊備嘅餐具，整潔衛生。