一心古早味蛋餅 (北區)

過去三日都係食西式早餐為主，三文治啊、全日早餐、咖啡等，咁黎到最後一日，想食啲熱辣辣、地道啲嘅野，咁睇過小籠包店，大部分一係就好早關門，一係就好晏先開門。所以我地去左一中商圈附近試下地道早餐 - 一心古早味蛋餅一心古早味蛋餅位於一心市場，其實係個街市，睇落唔係太起眼嘅店面，雖然係平日過左上班時間，但都有唔少人堂食或者外帶，聽聞好多時都要大排長龍


店內嘅空間係有，但只放左幾張枱，搭枱就是基本；不過即使要等，都唔會太耐，因為翻桌很快。
餐牌供應幾款蛋餅，例如肉鬆、火腿、荷包蛋、原味、芝士等，定價NT20-45，另有饅頭、肉包夾蛋、豆漿、奶茶等，牛奶係台農乳品出品。
全個餐牌最貴係【南屯套餐】，只需NT60就有一份總匯同原味蛋餅，適合兩人分享。

超總匯蛋餅 NT45
有選擇困難嘅點一份超總匯就可以解決，裡面有哂火腿蛋肉鬆，蛋餅即叫即整，份量不少。


成塊火腿、荷包蛋撻喺面頭，仲見到係半熟狀態。蛋餅酥脆，偏厚實，帶點彈性，係傳統嘅手工蔥花麵糊餅皮。但最好加少少醬，否則味道頗淡。火腿煎蛋零花巧，但簡單美味，不過有點同蛋餅各有各食嘅感覺。幸好全份都唔算太油，獨食可能就會膩啲，但我地分享還好


豆漿 NT15/大
台幣15蚊就有大大杯豆漿，豆味幾香，甜度適中

因為我地仲有下一餐，就兩個分享一份蛋餅，已經夠食，60蚊台幣就食到個早餐，都幾划算。左右隔離都係街坊，挺有風味。
結果到最後一日先發現原來一中商圈都有唔少食店，可惜啊。

鼎王麻辣鍋 台中漢口店 (北區)

早幾年黎台灣經常聽到鼎王、無老鍋，不過當時試左後者，事實上兩間係同一集團，而家問香港人食咩麻辣鍋，十個有九個都答無老鍋。
今次之行，一共喺台中停留4日，原本只係安排左燒肉同火鍋各一次，不過第三日喺夜市只係掃街，冇正經坐低食飯，所以未食飽。 
喺台北去到宵夜時間，不論火鍋定燒肉都有好多選擇，但台中感覺上冇咁多，向住麻辣火鍋方向搵，原來好多都收得幾早，最終揀左鼎王

台中鼎王有3間分店，其中兩家營業到凌晨兩點半，有一家更加開到早上六點，啱哂一眾夜鬼。呢間分店面積非常大，有卡座、大枱，樓底高，空間感足，一邊食野仲會聽到流水聲，幾舒適。其實喺環境、餐牌、價錢、味道、服務同我去過嘅無老鍋相近。

價錢喺台灣我諗都算中等價吧，平過佢嘅有大把，貴嘅亦大有鍋在。由於我地已經食左野兼只有兩人，就唔係點左好多款式



麻辣鍋 NT108/位
每枱最低消費NT650，鍋底以人頭計算，每個人都要俾，可選酸菜白肉鍋或者麻辣鍋，收費NT108/位，相拼加錢。
湯底已包鴨血、豆腐任添，我地點左少辣，辣度溫和，唔會好似川式火鍋咁，見到大量花椒、辣椒，味道係香辣不麻，唔會太油膩。
添加嘅湯底都一樣係麻辣湯，唔會愈食愈淡。豆腐非常入味，鴨血好大件，又夠滑溜，我地都添加左幾轉



配料有肉類、內臟、手打丸、餃滑、海鮮、蔬菜、麵食等，海鮮類有草蝦、墨魚片、鯛魚片、蟹管肉等，部分款式有相拼，但蟹管肉只有單點。 

特選去骨鮮牛 NT360
擺放整齊，一卷卷咁，約有15、6片，畢竟唔係任食，質素都唔會太差。牛肉切成薄片，脂肪均勻，肥瘦相隔，牛味係有，但麻辣湯底就點都會有少少蓋過牛味。牛肉薄而腍身，唔會乾柴




嚴選草蝦 NT289/8隻
冇諗住過質素咁一般，唔推薦草蝦，size又唔係大隻，蝦肉未至於霉，但感覺係唔新鮮，唔爽

蟹管肉 NT160
呢個反而幾唔錯，蟹肉幾好肉地，我諗有廿零粒，口感爽彈，亦都唔貴


品蟹滑膏 NT99/特價

用上花枝、旗魚、豬雞肉、蟹管肉等做成，價錢都反映質素，蟹味唔濃，都係花枝口感，膠質唔重，偏腍，純粹價錢唔貴

干貝滑 NT278
有比較普通嘅墨魚滑啊、蝦滑，我地點左較少見嘅干貝滑。用上花枝、干貝製成，有明顯瑤柱口感同味道，但都係唔夠彈牙。 


娃娃菜 NT100

烏龍茶 NT70

散點同吃到飽，除左喺食物質素上，環境同服務都係最大差異，鼎王始終係精品鍋，環境舒適，出哂名服務好，上菜整個90度鞠躬。
因為地喺夜市食完野先黎，就唔係點左好多野，埋單連加一，人均二百多港幣，可以接受啦。環境服務係吃到飽不能比較的。

屋莎鬆餅屋 台中大遠百店 (西屯區)

台灣同香港一樣，都有陣鬆餅熱潮，屋莎鬆餅屋由高雄起家，開到去台中，最近亦喺台北開設分店，人潮湧湧。其中鬆餅、冰沙都係係店家嘅主打，賣相滿分，又有內涵本來以為只有鬆餅食，原來仲有輕食，有興趣不妨一次過試哂主食同甜品，唔好好似我地咁多左底先黎，因為佢地有套餐供應，價錢幾優惠。今次之行雖然先後去台中、台北，但預計前者會冇咁多人，所以一早打定電話過黎訂位。
台中店位於大遠百3樓，裝潢走日式風格，以木色為主調，餐牌都係手繪，好可愛。座位唔算好多，最好先行​訂位。位於商場內，半開放式。



可能考慮到食物製作時間較長，所以有兩小時用餐時間。設最低消費，每人要點一份餐。

本來以為只有鬆餅食，原來仲有輕食，有興趣不妨一次過試哂主食同甜品，唔好好似我地咁多左底先黎，因為佢地有套餐供應，價錢幾優惠。


餐牌除左鬆餅，仲有沙律、咖喱飯、貝殼粉、漢堡、班尼迪蛋等，喺台灣都算是中上價位吧。其中有個餐最優惠，可以揀一份主食 (咖喱飯/貝殼粉) 加 NT199，幾乎係半價，配一份鬆餅、飲品(特飲補差價)。不過，咁樣只當作一份餐點，即係一人最低消費。
鬆餅味道一樣，差異在冰淇淋口味及淋醬，有蜂蜜、檸檬、紅豆抹茶、莓果塔、芒果、蒙布朗 (雲呢拿)   六款，定價NT240-310。
鬆餅系列已經包括一杯NT130嘅飲品，其他特飲可補差價。

莓果塔冰淇淋鬆餅 NT310
鬆餅等左20分鐘，鬆餅實物同圖片一樣，係一塊煎左嘅鬆餅，對摺一半，面頭淋上安格斯醬 (香草醬)，配黑莓、紅莓、草莓淋醬、草莓雪糕


落刀已經感覺到鬆餅好軟綿，入口順滑細膩，有少少濕潤，而溶化感覺，但唔會有蛋糕口感，比例適中
食落帶淡淡蛋香，香草醬稠滑。莓果淋醬酸中帶甜，層次豐富。為左保持雪糕形態，冰感較重，不易溶化。

整體係非常啱我口味，不甜不膩，亦明白點解會大排長龍。如果點套餐，加NT199就配上鬆餅，大概50幾蚊港幣，變相更加抵食​
聽過最初開業嘅時候，鬆餅質素未穩定，蛋漿糊口，幸好冇遇上呢個情況


雲之優格 - 原味冰沙 + NT50 (原價NT180)
點鬆餅系列附一杯NT130嘅飲品，其他特飲可補差價，所以呢杯靚靚嘅雲之優格只需50蚊台幣
佢嘅藍色來自梔子花果實萃取，非色素飲品。天空系列飲品仲有另一款以草莓製成，呈粉紅色，少女心爆發之作​
冰沙細滑，味道冇乜特別，就係波子汽水、可爾必思，但相機食先一流，而且NT50冇理由唔點​。


屋莎蟹肉班尼迪克蛋 NT280
班尼迪蛋有兩款，分別係蟹肉、煙燻鮭魚，一樣價錢。由於早餐我地已經食過煙燻三文魚麵包，所以我地揀蟹肉，冇揀錯啊。
店員有提醒，班尼迪蛋即時製作，需要等30分鐘，上枱已經覺得非常吸引


班尼迪蛋中除左蟹肉，仲加有西蘭花、芝士、蕃茄、洋蔥等，配上香滑嘅荷蘭醬，很足料。
水波蛋輕輕一切開，蛋液緩緩流出，蛋香十足。食到明顯新鮮蟹肉，份量大方；其他配料由於煎過，所以好香



班尼迪堡用上烘過嘅鬆餅，類似豬柳強嗰種，所以餅底有入口脆而實。整體不油不膩，口感豐富，非常飽肚。
喺香港食過好幾份，都做唔到呢個質素。七十零蚊港幣就食到，價錢合理。

估唔到除左招牌鬆餅，連班尼迪蛋都相當有驚喜，加上一早訂位，唔需要等候，味道唔錯，賣相都美，連埋加一服務費，約NT700，值得試啊。

Overture序曲審計366 (西區)

呢家序曲Overture係我地嘅目的地，本身喺台中北屯區有店，兩店供應款式有所不同。如果要食戚風，到太原店；要食千層，就要去審計366。
小店裝潢簡約樸實，保留舊宅風味，用上木枱木櫈。甜品店分為上、下兩層，於地下點單，位置唔算好多，空間感足，都算坐得幾舒適。
平日下午茶時間都有唔少客人，但點都會比假日悠閒，用餐限時1個半小時，每人低消一品項。


餐牌供應撻類、蛋糕類，定價NT120-240。飲品有原葉茶、花茶、拿鐵、抹茶、氣泡飲品等。



伯爵拿鐵 NT150
雖然冇花巧嘅擺盤，只係簡單嘅玻璃杯，但內涵不錯。奶層頗厚，但混合後伯爵茶味都未有被蓋過，甜度適中



美人鐵觀音千層蛋糕 NT180
千層有幾款口味，抹茶、紅烏龍、鐵觀音，定價NT175-180，原本我係睇中黑色嘅伯爵千層，但當日未見，揀左同樣幾特別嘅鐵觀音口味。
千層有16層，面頭有鐵觀音淋醬，千層都唔算好厚，入口綿滑唔會粗糙感，奶油抹得平均，茶味主要來自淋醬。





聖誕樹 NT240
屬於期間限定產品，最底係抹茶撻，上面係抹茶戚風蛋糕、抹茶忌廉、草莓、紅莓等。一如大家所言，抹茶味香濃，忌廉較稠黏，甜度唔高
蛋糕偏濕潤，唔屬於輕盈，草莓食落好清甜，稍為平衡蛋糕嘅膩，否則單食蛋糕會有飽腹感
底層嘅抹茶撻面頭仲鋪左藍莓，相當足料，撻面嘅忌廉冇咁稠，入口較細滑。撻皮脆口，曲奇味唔重，要慢慢咀嚼先試到。
本身單點一個抹茶撻都NT120，咁聖誕樹都幾抵，而且可以順道試埋原本只有太原店先有供應嘅戚風蛋糕。
雖然呢個甜品唔甜，但始終有三層戚風，加上忌廉，都會比較飽滯，最好都係開心share。

手樂S.L CAFE (西屯區)

台灣有相當多嘅cafe，同香港最大嘅分別係，佢地一般面積都大很多，手樂cafe位於福林路，就喺澄清醫院附近。而呢邊應該唔係太多遊客吧，連本地人都鮮見，所以平日早上黎到，只有三、四枱客人
cafe走工業風，有啲好raw嘅擺設，半開放式廚房、鐵櫈、水泥地，加上樓底高，分為上、下兩層，仲有室外位置，空間感足，幾有氣派



有啲似倉庫改建，枱櫈間闊落，近門口位嘅鮮橙色層架以喉管設計，好靚


因為空間夠大，都好適合多人聚會，所以呢度間中都會舉辦咖啡分享會。
氣氛非常悠閒，感覺可以坐到兩、三得小時，當日亦都見到有客人攜同電腦、平板使用，連假日都不設限時，係其中一大賣點






餐牌供應輕食為主，有全日早餐、三文治、鬆餅、貝果、甜品、飲品等。早上選擇較少，只有全日早餐及幾款麵包類，人均NT200。 
全日早餐一共有三款，都係啲基本配料，定價NT150/180/250，配茶/啡/果汁或可半價升級其他飲品。

饗宴吃好飽 NT250 
係三款全日早餐中最大份量，附蘋果醋、果醬、蒜蓉牛油，擺盤幾精美。包括沙律、雞腿肉、炒蛋、薯泥、培根、德國腸、麵包、純鮮奶吐司。
店員就話可以先飲蘋果醋開開胃，早餐即時做起，熱辣辣基本上都唔會差得去邊

雞腿肉輕輕煎過，加少少香草，肉質幾嫩；炒蛋、薯泥份量有點少，但入口幾滑；沙律菜好新鮮，配胡麻醬好醒胃。
德國腸、培根冇技巧可言，可是有點乾。
煙燻鮭魚帕里尼 配沙律 NT160 
唔係套餐，不連飲品，但加配飲品可享八折。帕里尼裡面夾左煙三文魚、生菜、蕃茄，附上一杯仔沙律菜。 
沙律一樣新鮮；三文魚煙燻效果一般，入口較淡；包面本身都幾脆，裡面軟熟，唯整體性價比唔算很高。

焦糖拿鐵 NT75 (跟餐半價)、醇濃可可 NT96 (原價NT120)
兩杯飲品都有好靚嘅拉花，拿鐵綿滑，焦糖味幾香；可可奶味較重，朱古力味唔夠濃。
逢週一，咖啡外帶會有買一送一優惠，其實就幾抵。 


呢間cafe俾我感覺性價比十分高，但呢度嘅賣點係地方夠大，好適合消磨時間。 聽講呢度連假日都不設限時啊~