Wildchildcarol 等級3 | 關注 留言給此食家 |
排序方法:
日期 笑臉 哭臉
編輯推薦 餐廳總分
文章形式 | 地圖形式
2017-12-27
沙鹿夢想街都算係台中頗受歡迎嘅拍照點之一,由於我地都鐘意影相,所以這天安排到這邊走走,由於當日天氣有點熱,正值中午時份,我地揀左「小巷子豆花」食個甜品,稍作休息,再前往其他拍照點。 小巷子豆花只供應豆花,夠哂專一。餐牌供應多款配料配搭,有原味、花生、紅綠豆、薏仁、粉圓、古早味 (乾豆花,冇湯) 薑汁 (冬季限定) 等,豆花可選冰、暖、熱,定價NT35-45,價錢合理。 小店8月份先開業,以賣豆花嘅店而言,位置頗多,裝潢幾靚,正中心有啲用乾燥花製成嘅花環,花過心思。用上木枱木櫈,走簡約路線,半開放式廚房,乾淨企理 綜合豆花 NT45 可選兩款或三款配料,我地揀左紅豆、綠豆、粉圓,冰底上。豆花都幾大碗,因為我地已經食過早餐,加上款式變化唔多,所以就兩人分享。 豆花嘅豆香中庸,入口軟滑,如果單點原味/古早味豆花,相信會更加濃郁。紅綠豆唔會煮得太腍,保持咬口,不帶粉感。 粉圓比較是個誤會,因為我以為係芋圓之類的,結果係珍珠啊。粉圓細細一粒,口感偏腍身,唔算好有噍頭。 冰底冰感重,都算打得幾細緻,未見硬塊,雖然加左糖水,但不甜不膩。反而綠豆味特別突出,感覺似食緊綠豆冰 整個甜品配料簡單,清涼消暑,正好為我地喺夢想街嘅行程作結
評分: 味道 3 環境 4 服務 4 衛生 4 CP值 4
2017-12-26
韓國之前吹起一股「自動販賣機潮」,有咖啡店外設藍色販賣機,吸引好多網美前去打卡。而黎到台中,都可以搵到幾家有販賣機造型嘅店家啊,喺北區有藍色同黃色販賣機出沒呢家設有粉紅色販賣機嘅「柒‧柒手作早午餐」喺西區昇平街,有唔少人都專程去影相架。 柒‧柒手作早午餐位於昇平街嘅轉角位,位置比想像中多,有望窗嘅文青位,另有8張枱,裝潢簡約樸實,空間感足,枱櫈唔會密麻麻。 餐廳採用開放式廚房,煮嘅都係簡單嘅早午餐,唔會話聞到油煙味,客人自行點單,餐具自取,由店員送餐,並冇收取服務費。 小店就營業到下午3點,用餐限90分鐘,不過平日早上客人唔多,所以都可以輕鬆食下早餐 餐牌供應全日早餐、三文治、貝果、歐姆蛋、意大利麵、沙律、小食、飲品等,點了兩份早餐及飲品,人均NT220,價格合理。 起司培根貝果 NT160 食物即點即製,大約8分鐘上枱。呢份有原味貝果、芝士、培根、滑蛋、沙律。 貝果中規中矩,因為加左蒜蓉烘過,口感唔算軟熟,放涼的話會偏硬。其他配料都係簡單材料,正常質素,冇乜特別驚豔之處 厚蛋起司豬排三明治 NT149 呢份會較抵食,所以眼見大部分人都有點,價錢大約40蚊港幣,有炸豬排、芝士、厚蛋、蕃茄、沙律菜,仲配埋原味脆薯。 三文治係薄薄一片,配料豐富,豬排即時炸起,冇油膩感。蛋同豬排一樣厚,食落滿足,不過會稍微影響豬排外皮脆脆嘅口感。 薯條份量不少,沾粉即炸,薯味幾重,口感酥脆,呢份三明治性價比挺高 巧克力尬鮮奶 NT100 (跟餐減NT20) 相對較小一杯,價錢唔貴。不過朱古力奶唔算話好濃嘅朱古力味 柒彩霓虹燈 NT110 (跟餐減NT20) 果昔共有4款,有藍莓配香蕉、鳳梨配藍莓等,呢杯「柒彩霓虹燈」係火龍果加奇異果嘅果昔,有明顯漸層。 果昔打得細滑,口感唔會過份稠,火龍果味本來就比較弱,搭配奇異果味道自然清新 柒‧柒係一間比較多本地人前來嘅食店,環境舒適,係個食早餐嘅選擇,餐點製作較簡單,味道上雖然唔會有啲咩大驚喜,但價錢唔貴。 餐廳後門就係粉紅色販賣機,又可以影下相,可以一試啊。
評分: 味道 3 環境 4 服務 4 衛生 4 CP值 3
2017-12-25
第一日完成兩個拍照點後, 晚上選擇喺西屯區嘅屋馬燒肉晚飯,燒肉店很受本地人及遊客歡迎 ,生意很好, 所以我地都一早訂位因為係週日,店員回覆,只係得番9pm呢輪有位置 ,即使提前黎到 都冇得入座的, 跟足預約時間。入座起限兩小時, 上菜速度迅速, 基本上都好夠喇。 中港店裝潢都幾霸氣, 幾有設計感, 不過網上見到國安店仲有型 ,面積更大。地下有張長枱用作等位 ,客人如果早到左,可以喺店內等候。 二樓、三樓用餐 ,慶幸我地兩人都被安排四人座 ,始終套餐份量不少。入座後店員快手快腳遞上濕紙巾, 招呼做足。 餐牌供應多款套餐 ,有雙人亦有三人, 定價NT1580-2880, 另收加一。選擇很多, 差異主要在有牛、冇牛、有海鮮冇海鮮等,亦有單點 ,價錢都唔貴, 不過點都係點套餐划算。 調味料(昆布鹽、檸檬汁、燒肉醬) 呢度嘅肉類基本上都已經醃過/已調味,所以我地都冇乜點用過醬 ,只係間中沾昆布鹽 提升肉嘅層次。 雞湯 每枱都有一整壺雞湯 ,湯頭清澈冇味精感, 天氣涼涼地 一口接一口。 雙人套餐 NT2180/全牛 下午只係食左冬甩,所以我地都好餓, 點左呢個全牛套餐 ,約HK$650,有沙律、泡菜、南瓜泥、韓式蔥拌牛舌、美國安格斯牛小排(厚切、薄切)、美國安格斯極盛貝身牛小排、澳洲和牛牛舌、韓風小牛排、北海道干貝、精選蝦品、白飯(加NT60可升級海鮮豚肉粥)、兩杯哈根大師雪糕、飲品,非常豐富 屋馬主廚沙律、泡菜、南瓜泥、生菜包任添 可選配凱薩或日式胡麻醬 ,我地揀左後者 ,裡面加左花生 冇咁單調。 韓式蔥拌牛舌 熟上 混有蔥花、白芝麻 ,薄薄一片。 牛小排 一共有四款, 分別係厚、薄切、極盛貝身、韓風小牛排, 以層架送上。 基本上幾份味道都唔錯 ,以厚切最深得我心, 一方面有好濃烈牛香 ,口感軟腍 ,肉汁豐富 薄切亦都唔差, 脂肪平均, 牛味都意想不到重, 而且比較薄身 ,容易燒熟, 唯一係帶點油份 會較搶火, 燒嘅時候要留意。 極盛貝身厚薄適中 食落有嚼勁 ,脂肪唔多;韓風小牛排較容易燒焦, 較有厚度, 適合夾泡菜包生菜食 澳洲和牛牛舌 輕輕燒一陣已經食得, 加埋洋蔥更惹味。 北海道干貝、精選蝦品 以錫紙兜隔住燒 ,唔怕整到燶哂, 貝味鮮甜。海蝦都幾大隻, 肉質爽口。 白飯 飯粒分明 ,配燒肉一流, 但如果鐘意食粥都可以加錢升級海鮮粥啊, 因為眼見隔離枱點嘅賣相不俗呢。 雪糕、飲品 屋馬燒肉係名符其實CP值頗高的, 我地點呢個雙人餐 ,食到好飽。唯一就係店員比較繁忙啲, 唔會好似其他燒肉店咁會幫忙烤肉喇。
評分: 味道 4 環境 4 服務 3 衛生 4 CP值 4
2017-12-25
金帛霜淇淋專賣店一直喺口袋名單,大家都知,我對便便形雪糕特別有好感,加上佢地經常推出新口味,或者限定款式,好吸引的 雪糕店位於北區,事實上都鄰近一中商圈,行十分鐘左右都去到,幾方便。 店內位置闊落,有幾個內用座位,室外都有兩張枱仔,以木色為主,走日系風格。 供應霜淇淋,當日有兩款口味,分別係烏龍鮮奶、草莓,有基本款同升級款,即係多啲配料,定價NT80-130;仲有鯛魚燒、泡芙,價錢唔貴。 草莓DO DO NT130 既然係草莓季,一定要試試草莓霜淇淋,成杯輕鬆食,底層係草莓雪糕,中間有可可脆片、奶酪,然後加有切片嘅新鮮草莓,最後一層便便雪糕,層次豐富霜淇淋質地冇雪糕咁滑,類似天仁嗰種沙沙地,唔算溶得好快。莓味清新,不甜不膩,奶酪味唔係好重,脆片香脆唔硬。 草莓食落酸酸甜甜,面頭嗰粒心型朱古力就弱啲,較黏牙。但雪糕控都好滿足,本來想離開前再黎,都冇時間了。 茶の盛宴 NT130 用杯裝嘅烏龍鮮奶霜淇淋 面頭有茶凍、珍珠同一件伯爵乳酪蛋糕。霜淇淋質地同草莓味一樣 都唔會好滑身, 呢款可能加左鮮奶關係 ,溶得比草莓味快少少。 烏龍茶味香濃 同一時間令我諗起天仁嘅鐵觀音雪糕,有 過之而無不及,加左鮮奶 茶香而清新 伯爵乳酪蛋糕雪得幾凍 ,冰感有點重, 帶淡淡伯爵茶味 ,又有乳酪酸酸地嘅感覺 ,有趣。幾粒茶凍彈牙,有茶香 。珍珠份量不少, 細細粒, 尚算煙韌。整體而言 我地都好鐘意呢間霜淇淋專門店。 而且喺台灣很容易就感受到人嘅熱情、熱心,同店員傾起佢地剛巧黎過香港旅遊, 短短十幾分鐘,氣氛歡愉。 呢個時間難截的士,佢地提出可以幫我地用電話程式叫車, 令我地印象深刻
評分: 味道 4 環境 4 服務 5 衛生 4 CP值 4
|