陳三鼎黑糖粉圓鮮奶專賣店 (中正區)

金雞園、藍家割包、陳三鼎 三間聚埋一齊，好似鐵三角咁。
台北（男）同事帶我嚟咗台大附近食嘢，作為本地人，佢唔太建議我去金雞園，藍家割包可以，但就覺得我應該要飲陳三鼎。剛剛下晝先至飲過台中嘅「萬波」，唔係佢推介，我都唔會飲陳三鼎。姑爺我唔太熱衷於珍珠奶茶，但係擇日不如撞日，咁近城隍廟又點解唔求返支（好）簽呢？何況佢係只次一家，並無分店。
冇影相，因為你上網都搵到七百七十六張，無謂加我一張，變成777咁乞人憎。
我叫嘅係凍靑蛙撞奶，即刻插支飲管啜一啖，係暖嘅，再啜都係，D冰同D暖茶未溝埋。就住確實嘅淋同中間彈牙，因為姑爺我並非珍珠奶茶專家，我只係覺得我中午果杯50蚊（台幣）好飲D，但呢杯只係買40蚊，冇得輸。
作為遊客嘅你，嚟到公館站就試一下啦，冇得堂食㗎。
ps: 唔覺有乜台大女生

藍家割包 (中正區)

金雞園唔使等位，反而呢間要等位。當然，如果你係外賣嘅話，咁都係排一陣隊（幾個人），就可以攞走個割包食啦。
本少爺諗住試吓個四神湯，同埋又驚住個割包啲油滴吓滴吓咁，有失斯文（點講我都係舊香港人代表、唔係代表新香港人），所以都係選擇坐低食。反正一個人容易等位。
唔知割包應該揀肥定瘦，佢有半肥瘦。唔知四神湯應該揀腸定係肚，佢有腸+肚（張紙確係咁寫，唔係我唔懶得寫個「加」字）。雙飛，唔使特別加錢，真係選擇困難症嘅人嘅天堂！
我當然係要雙拼啦，個半肥瘦割包唔油、唔腬。記得N年前跟台灣朋友去夜市食割包，好腬，加上企喺度食，食兩啖就真係想掉咗佢（不過台北搵垃圾桶又唔係咁容易）。但「藍家割包」唔同，我成個食晒，都好味。
睇相都知個湯好清，D料唔會過多（不過如果你當佢係晚餐，你就覺得佢小料），飲晒同食晒。如果唔鍾意內臟嘅朋友，咁就唔啱你啦（本少爺國語屬有限公司，冇問到老闆可唔可以淨係要湯，唔加內臟）。
環境窗明几淨，員工友善。食完唔使執嘢，行出櫃面俾錢，係冇單嘅，不過老闆好醒目，知我坐邊台，或者你自己同佢講張枱嘅號碼都應該得。
ps: 四神湯係有薏苡仁、茨實、山藥、蓮子

金雞園 (中正區)

既然本少爺嚟到台北，不妨為舊香港人提供一吓飲食意見（新香港人睇殘體字）。對於台灣嘅朋友，就唔好意思啦，因為我係寫廣東話，唔係國語嘅書寫中文（更加唔係普通話嘅中文，又長又噚）
第一篇就好似初戀咁，唔一定係好嘅，而本少爺响台北嘅第一次（寫嘅食評）係比咗「金雞園」。
睇圖就知道個皮唔係吹彈得破果種，肉味OK，食完冇口乾。食完就冇諗住再嗌第D嘢，就算食都係去隔離試吓。不過佢都係修台幣70，你想點吖?! No complaint。
總結：小籠包名過其實，但不至於難食。