醜比頭的秘密花園輕食咖啡 (已結業)

近年，台北嘅主題咖啡店比例可謂直逼日本，好多卡通人物忠粉每每踏足台北，都要去打一打卡，呃一呃Like！早前小妹都去咗我最鍾意嘅醜比頭主題咖啡店，影相影到天荒地老流連在摩天輪！位於台北市大安區忠孝東路嘅「醜比頭的秘密花園」，係全球第一間以醜比頭為主題嘅Cafe，如果大家睇過《醜比頭圖鑑》，就會知道呢間Cafe係以呢本書為藍本，牆壁、枱櫈、餐具、食物… …冇一處唔係呢班療愈系動植物小怪物嘅蹤影！今次小妹係同好閨密攜各人嘅媽媽、一行四人去朝聖，仲試咗好多嘢食！原本以為主題Cafe啲嘢食得個樣，點知都幾好味架！「最愛草莓起司蛋糕鬆餅」（＄２８０台幣）超級好味，雖然士多啤梨有啲酸，但係勝在鬆餅熱辣香脆，連埋雪糕一齊食，冰火交融，簡直係味覺嘅享受！「蒜香白酒蛤蜊麵」（＄２８０台幣）份量雖少，但白酒味香濃，蛤蜊（蜆）肉頗嫩。「日式照燒雞翼」（＄２９０）就係照燒汁烤雞翼，外皮香甜微脆，非常惹味！嘢飲方面，我哋兩個加兩個媽媽就分別嗌咗凍同熱嘅「屁桃最愛水蜜桃蘋果茶」、「屁桃香濃水蜜桃奶昔」同「無酒精粉紅特調」，每杯嘢飲上面都插住各款醜比頭圖案，認真Kawaii，小妹我珍藏咗唔少呀！