麵処田冶 (大安區)

【臺北市大安區】【麺処田冶】去得多台灣就知，台灣除咗台灣菜做得好出色之外，其實日本菜亦都平靚正。所以我都趁嚟到台北做嘢，就搵啲日本嘢出嚟試吓。經過我嘅一番捐窿捐罅之下，就知道喺大路轉入小路再走入條巷度有間咁嘅日式拉麵，既然搵得咁辛苦，唔試都對唔住自己啦。

餐廳位置唔多，但係佢個餐牌除咗拉麵，仲有飯、炸物、小食等等，都幾多選擇。我本身就係為咗拉麵而來，就主力睇佢哋啲拉麵啦。咁最後我就試咗 NT$370 嘅「爆盛叉燒醬油拉麵」，餐牌寫佢係男性人氣 No.1 嘅食品，有「滿足感十足叉燒 200g」。

上菜見到的確好多日式叉燒，鋪滿晒碗邊，食落亦都充滿肉香。而啲麵亦都好味，其中一個原因係個湯底做得好，油脂夠重能夠鎖住熱力。就算我影晒相先食，我所食嘅每一啖麵都唔會係攤凍咗嘅。我之前都食過類似嘅醬油拉麵，都覺得呢個做法係幾好。

跟住我試埋加 NT$79 換嘅「炸雞」兩件，其實佢上咗三件喇，哈哈。食落勁正，外脆內嫩，鎖得住啲肉汁呀。嘢飲佢哋有提供冰水，但係我都照要 NT$80 嘅「可爾必思蘇打」嚟飲，冰凍又帶甜膩感，為呢餐價値 NT$529 嘅拉麵體驗劃上完美嘅句號。。。

（地址：台北市大安區忠孝東路4段216巷40弄9號）

@mendokorotaji

#1amfoodie #foodie #love #eat #1am台北 #台北 #麺処田冶 #拉麵 #台北拉麵 #日本菜 #日式拉麵 #ramen #mendokorotaji #japanesefood #japanesecuisine #taipei #taipeifood #台北美食 #爆盛叉燒醬油拉麵 #炸雞 #可爾必思蘇打 #1am1311 #1ambackup

馬太郎燒肉 (中山區)

【臺北市中山區】【馬太郎燒肉】有留意我 story 嘅朋友都知我嚟咗台北做嘢，都唔係第一次嚟喇，就梗係搵啲遊客少啲去嘅好餐廳嚟試吓啦。約咗三位台灣美女，唔可以失禮，就嚟呢間口碑唔錯嘅日式烤肉店食晚餐。

坐低，每人一碟燒肉汁，仲有辣醬，正。當然唔少得蔥蒜等等嘅佐料無限量供應，加埋生菜，真係可以有好多唔同嘅配搭。烤爐係炭爐嚟，先上海鮮我就食先，「蒲燒鯛魚」墊住錫紙嚟燒，原汁原味勁正。然後到「柳葉魚」，係多春魚嘅一種，連骨食都掂。

而「精選透抽」係類似魷魚咁，夠晒爽口。「椒鹽扇貝」細細隻好快熟，勁香椒鹽味。「精選草蝦」都唔錯，幾有鮮味。食食吓想飲啲嘢，佢哋嘅飲品選擇都幾多。有橙味同桃味嘅沙冰、熱茶、有六款嘢飲嘅汽水機，仲有我最中意嘅可爾必思，都係任飲嘅。

跟住試個「好評綜合燒肉拼盤」，我哋嗰盤有「培根」、「雙色起司牛腹肉」、「厚切大理石紋優質注脂牛」、「台灣豬梅花」、「義式香料雞腿」、「德國香腸」、「牛舌」、「厚切熟成牛排」、「特製和牛漢堡排」、「鹽燒豬腰內肉」，好豐富。

當中豬肉製品都係用台灣豬，夠晒安全，我哋都有追加豬梅花嚟食就知。當然亦都有追加熟成牛排、牛舌、豬腰內肉、熟成嫩肩牛、注脂牛等等呢啲我想再食嘅肉類，都好正。之後都有試「玉米筍」、「杏鮑菇」同「糯米椒」呢啲農作物，都係幾好食嘅。

最後食啲甜品，都係燒嘅，有「日式烤麻糬」、「烤起酥」同「烤棉花糖」，慢慢整幾有趣，比較少喺香港燒肉店出現，而且都幾好味。服務上，店員仲會主動換網，收碟速度又快，每位價錢只係 NT$908，即係二百蚊鬆啲，有呢啲質素嘅食物同服務係幾抵。。。

（地址：台北市中山區中山北路一段81號）

@matailangshaorou

#1amfoodie #foodie #love #eat #1am台北 #台北 #馬太郎燒肉 #日式燒肉 #台北美食 #台北燒肉 #伊比利黑豬 #台灣豬梅花 #厚切熟成牛排 #玉米筍 #杏鮑菇 #糯米椒 #牛舌 #豬腰內肉 #極上特選熟成嫩肩牛 #厚切大理石紋優質注脂牛 #好評綜合燒肉拼盤 #雙色起司牛腹肉 #蒲燒鯛魚 #柳葉魚 #精選透抽 #椒鹽扇貝 #精選草蝦 #1am1309 #1ambackup

山鯨燒肉 (北區)

【臺中市北區】【山鯨燒肉】嚟台中之前做啲資料搜集，發現呢間嘢個裝修超靚，就決心夾道歉哥過嚟。呢間分店午市有位喎，就用你啦！入去見到個特大燈籠同埋植物佈置，真係好似去咗日本咁呀，我哋就試佢哋 NT$3480 嘅「逸品和牛宴雙人套餐」先。

前菜「鮮活太空菇」上菜時係仲未死，一直養住直到燒之前先切落嚟，我從未食過咁新鮮嘅杏鮑菇，好正。加上侍應哥哥以前做過廚師，燒出嚟啱啱好，勁 juicy 勁正！之後嘅時蔬「櫛瓜」同「日本山藥」都唔錯，都好新鮮。

本身個餐跟「台梗九號白飯」，但我哋加 NT$49 升級「鮭魚起司飯糰」同加 NT$249 升級「海膽·白蝦·和牛 一貫」，前者其貌不揚，但我食食下好似上咗癮咁一啖接一啖，好味。後者用 omakase 做法，官能上再次提升，爽。

講埋職人手作「海膽干貝一口杯」同名物「炸A5和牛吐司」，兩者都各有特色，用料上乘之餘整得都好好。漁人海鮮「極上大草蝦、北海道干貝」我哋加 NT$119 轉咗「極上紋甲花枝刺身」，可以燒嚟食，另有一番風味！

主菜嚟喇，係「A5白老和牛小排」、「頂級澳洲和牛排」、「澳洲和牛小排」、「伊比利豬梅花」、「A5月見松露和牛」、「A5金磚燒佐澄香醋」同「澳洲和牛舌」，睇到眼花，食更加係 enjoy 到不得之了，文字難以形容。

飲物我飲無糖「台灣凍頂烏龍茶」消消滯，好清，好飲。道歉哥就加 NT$50 飲「手作400次咖啡」，佢都讚不絕口呢。甘味即係甜品，有「有機養生桃膠銀耳湯」同「宇治金時提拉米蘇」，清甜而唔會太搶主菜風頭，啱啱好。

見到其他顧客都有喺餐廳借「和服」影相，加埋個景係真係靚，不過我哋就怕醜冇影到。生日顧客可以寫「繪馬」，見到都有香港客寫過嘢，犀利。餐飯加埋一食咗 NT$4341.7，又飽又正又好玩，我覺得係值嘅，絕對可以一戰。。。

（地址：台中市北區漢口路四段70-1號）

@yamakujira2018

#1amfoodie #foodie #love #eat #1am台中 #台中 #山鯨燒肉 #日式燒肉 #台中美食 #台中燒肉 #和服體驗 #逢甲美食 #新品上市 #一秒到日本 #逸品和牛宴雙人套餐 #鮮活太空菇 #鮭魚起司飯糰 #海膽白蝦和牛 #海膽干貝一口杯 #炸A5和牛吐司 #極上紋甲花枝刺身 #A5白老和牛小排 #頂級澳洲和牛排 #澳洲和牛小排 #伊比利豬梅花 #A5月見松露和牛 #A5金磚燒佐澄香醋 #肉割烹 #1am1086 #1ambackup