八月堂 微風台北車站 (中正區)

雖然而家喺香港都可以食到八月堂，但台灣嘅八月堂經常都有推廣優惠，價錢平過香港😍Seefoodgwai去到時做緊星期一至四11:00-12:00買第二件有半價，夠哂經濟實惠！

今次買咗3款可頌試吓：

-伯爵奶茶可頌
酥脆嘅牛角包入面夾住帶有伯爵奶茶香嘅忌廉，食落唔會話好甜，反而帶有一點點清新嘅感覺😍

-焦糖布丁可頌
外表夠哂討喜，一整塊布丁扭成扭紋裝夾在中間，再淋滿焦糖醬🤤嗜甜嘅朋友唔可以錯過！
.
-巧克力卡士達可頌
呢個係最普通基本款，牛角包本身帶淡淡朱古力味，但唔會話好特出，吉士亦不過不失，唔算係好驚喜。
.
美味指數：4⃣/5
抵食指數：4⃣/5
再食機率：80%

無聊咖啡 (大安區)

Seefood閨嚟到位於台北忠孝敦化站嘅「無聊咖啡 AMBI- CAFE」。呢間cafe裡面有好多特別嘅裝置畀顧客打卡🙊座位都幾寬敞舒適，好適合大家約埋三五知己喺入面聚吓、影吓靚相。

因為SeeFood閨一早訂咗檯，所以唔使等位。

呢度嘅飲品種類都好多，而最受歡迎嘅就係佢個果昔吧，可以自己挑選六成滿嘅生果再加牛奶或者乳酪打成一大杯果昔，感覺比平時現成整好嘅健康好多。😄

可惜食物方面就只係一般，試咗嫩雞腿乾拌麵配麻醬，麵條都算夠彈性，但麻醬唔係平時食開嘅日式麻香醬，食落質感較乾身，味道有啲奇怪，雞腿肉普通而且冇咩味道。建議大家都係去打吓卡或者行到攰時坐吓飲杯嘢算🙊

來呷甜甜品 (中正區)

Seefood閨上個月去咗台北嘅「來呷甜甜品」，出名賣雪花冰🍧、燒麻糬同芋泥，簡直係集所有最hit甜品元素於一身！從捷運北門站行去大約只要7分鐘，離台北車站亦都唔遠，位置方便。
.
試咗蜜芋麻糬燒雪冰，蜜芋刨冰（自選三樣：仙草、珍珠、紅豆），仲有新品冰Q宇治金時🍵碗碗都勁大份量、勁足料，兩個人share一碗啱啱好！

蜜芋麻糬燒雪冰
花生燒麻糬同牛奶雪花冰一齊食好夾，口感夠Q彈同軟，唔會話好難咀嚼，芋泥份量勁多，食完好有飽足感。

蜜芋刨冰（自選三樣）
Seefoodgwai 今次選咗仙草、珍珠同紅豆🤤來到台灣必會食仙草，喺香港食仙草冇咁好食，口感好唔同。配上淋咗黑糖水嘅刨冰，食落冰涼消暑。

冰Q宇治金
抹茶刨冰配上紅豆、花生燒麻糬同抹茶布丁，布丁有濃郁嘅抹茶味，口感順滑配上刨冰同甜甜嘅紅豆，中和返抹茶布丁嘅苦澀味，仲有抹茶醬同煉奶可以自由添加，不過冰Q宇治金時係隱藏menu，只賣到六月份，錯過咗嘅朋友就唯有睇吓佢會唔會再推出喇..
.
美味指數：4⃣/5
抵食指數：4️⃣/5
再食機率：85%

HoneyWood Cafe (平鎮區)

晶麒莊園係桃園其中一個好出名嘅婚禮場地，有一個大型草地同勁靚嘅彩繪玻璃教堂。入面嘅Honeywood Cafe空間寬敞明亮，十分舒適👍🏻
.
可惜Seefood閨去到嘅時候已經太晏，冇燉飯同義大利麵食，於是叫咗三款帕尼尼、薯條、雞翼同四款甜品🤣🤣
.
先講吓咸食先😆三款帕尼尼分別係：BBQ起司牛肉帕尼尼、墨西哥風味香腸帕尼尼同奶油起司海鮮帕尼尼。

BBQ起司牛肉味道同麥記嘅雙層芝士孖堡一樣🤣冇咩特別。墨西哥風味香腸其實就係辣肉腸配茄汁，酸中帶辣，但整體都係普通。最吸引都係奶油起司海鮮😋食落芝士味濃郁，配搭海鮮口感一流，食落仲有少少拉絲😍

義式辣味雞翅—雞翅嘅皮烤到外脆內嫩，辣味同水牛城嘅辣一樣，食到條👅刺刺下咁，都幾過癮。
.
至於四個甜品，質素都唔錯，擺盤亦係一流😆

紐約起司蛋糕—芝士控都鍾意嘅一種芝士蛋糕，質感硬度適中，芝士味十足！
.
經典巧克力塔—朱古力tart嘅味道好濃，唔係死甜嘅朱古力味，而係用咗好多可可豆嚟整嗰種甜中帶苦嘅味道，鍾意食黑朱古力嘅朋友一定要試吓！
.
日式濃抹茶塔—抹茶餡好濃抹茶味，帶點茶嘅苦澀，配搭上甜甜嘅紅豆，一齊食簡直係pertect match！食哂都唔會膩呀！

伯爵舒芙蕾鬆餅—絕對係重頭戲，咁嘅價錢做到呢個水準真係好抵食！伯爵舒芙蕾鬆餅夠鬆軟，空氣感啱啱好，唔會食完覺得食咗空氣，又做到震..震..震..嘅效果。本身鬆餅帶有好濃郁嘅伯爵紅茶味，搭配珍珠、鮮忌廉同埋焦糖醬，整體味道變化出唔同嘅層次，令人食唔停口🤤
.
美味指數：4️⃣/5
抵食指數：4️⃣/5
再食機率：80%