欣葉小聚 南港店 (南港區)

剛剛俾米芝蓮推薦，係公司附近，咁岩今日落雨，同事唔想出去食飯，就等我嚟試吓啦。
欣葉係台灣應該算係有啲名氣，咁佢個仔又點呢？按照台灣蘋果日報嘅介紹，應該要試「紅蟳米糕」，但係價錢比較貴，先試下比較平嘅，好食嘅話下次返嚟打大佬。
叫咗三杯Q彈豬腳、地瓜飯。本少爺覺得個三杯豬腳做唔到出邊三杯雞嘅香味，豬腳正常好味，如果荏返小小比較適合我嘅口味。但係冇咗酒同薑同九層塔嘅香味就有啲撻Q。地瓜飯正常好味。
我諗我會試埋紅蟳米糕先至作定論，雖然係米之蓮推介，暫時唔覺得有啲乜嘢特別，唔試冇損失，特別考慮埋佢嘅價錢，可以過譬了。
ps:十二點前到，唔使等位。出面買單，收家一服務費。

阿榮本家 香菇肉粥 米粉湯 (中和區)

真係估唔到呢間野都喺OpenRice 度搵得到，咁又唔其，好似都有啲名人幫襯下，牆上邊有簽名，起碼見到有蘇貞昌。
相信間餐廳主要做街坊生意，所以要等位。因為同台灣嘅朋友一齊食飯，所以就唔好意思影相。
睇價錢都估到碟頭唔大，一隻碟大概等於成人嘅手掌（手指攤直）咁大。
菜牌上有炸喜相逢，喜相逢即係我哋香港叫嘅多春魚。本姑爺覺得個脆槳太厚啦。同理，個炸蚵仔（細隻嘅生蠔）都係因為個脆槳太厚而唔係咁好食。炸蝦仁都係一樣，我懷疑個法人係用雪藏蝦，所以無蝦味。炸豆腐就係炸比較細粒嘅豆腐，食唔到豆腐嘅軟林林感覺，同香港食避風塘炒蟹餐廳嘅咋豆腐唔一樣。
呢度嘅紅燒肉唔係我哋係香港食到上海菜嘅紅燒肉，反而佢係似燒味舖嘅燒肉。
鯊魚煙冇乜味，只係有少少嘅煙味。燙青菜就係熱水淥熟嘅菜。咁樣燙魷魚，唔使講你都知係點喇。
如果唔介意食大腸、豬皮呢啲內臟嘅話，我覺得大腸同豬皮都好食，豬皮都好似係就咁焯熟，冇肥膏。
香菇肉粥幾好食，個湯（粥水）係可以添嘅，但係據問有味精，所以我就冇添到。
總括來講呢度係食平民野，我唔覺得有特別嘅廚藝，特登嚟就唔好啦，唔試都冇損失，雖然有名人嚟過。

天下三絕麵食館 (大安區)

啱啱呢個禮拜得到米芝蓮嘅肯定，當然多人，等咗大概40分鐘，不過個部長好有禮貌，又着得夠專業（可能太忙，多啲笑容就一百分）。
條
推薦三絶牛肉麵、炸排骨。但係聽位部長有禮貌同個客講站排骨驚賣晒啦，冇問題，我原本都係諗住食牛肉麵啫。
可能佢今日比較忙，淨係搵侍應點菜都要啲時間，不過佢幫你落單嘅時候都會同你講聲唔好意思。
喺粉麵嘅時候，飲咗佢杯水，有微微嘅紅棗味，果然唔係一間普通嘅餐廳。
五佰蚊（台幣）一碗麵當然係貴啦（就算係香港嚟講都唔平，好少日本
拉麵賣過佰蚊），又要等半個鐘。您估好唔好食呢（如果一點九先至到，應該就唔使等位）？
因為我係搭枱，附近嘅食客係將所有嘅麵同埋餸都清晒，啲湯就算唔係飲晒都整返非常之少。
本姑爺覺得佢只係輸畀阿正廚房半招，但阿正貴差唔多一個Double。相比之下，阿「三」只係牛肉淋咗小小（比阿正），牛筋冇咁起膠。只算CP值，阿三贏！
總括嚟講值得過嚟試吓！
ps: 餐廳送一杯細細嘅果醋。有加一

良品牛肉麵 (中正區)

友人介紹台北車站捷運站附近兩間牛肉麵，呢間係其中一間。位於旺中帶靜嘅地方（台北車站地方真係好大），離台北車站唔遠，又容易搵得到，唔使等位，直入，有兩層。
侍應冇叫我搭枱（香港通常都叫你搭枱），叫我上二樓（即係地面上一層），自己有張獨立枱。
剔紙仔（係一張過咗膠嘅餐牌上面用水筆寫），交比個侍應，自己出去攞筷子，等五至10分鐘，有麵食啦。
絕對係一個收貨嘅牛肉麵，唔算驚為天人，但係一定唔會失望。牛筋夠淋。
如果你响台北，正常都會經過台北車站，想食返碗牛肉麵，又坐得舒服，呢間值得嚟，又唔貴（考慮埋地段方便）。服務好！

呈信傳統鵝肉店 (永和區)

CCTVB介紹，唔使等位，直入，門口有幾個人等外賣。
堂食地方企理，幾張大枱，一張大枱可以比六至八個人坐。枱面攞點菜紙仔， 剔好同寫好枱號之後拎出櫃面，唔使俾錢住，食完先至比錢。
鵝肉飯好快就到，好味、好嫰，啲汁除咗有鵝油味之外，我覺得佢可能落咗啲酒，有酒香。如果啲鵝片切大嚿啲更好。
整體來講鵝肉少咗啲（又或者飯多咗啲）。
之前喺附近食咗一間牛肉麵（樂澄小店），夜晚有啲口乾，唔知邊一間可能落咗味精。
整體來講值得一試。