台北姑爺 等級2 | 關注 留言給此食家 |
排序方法:
日期 笑臉 哭臉
編輯推薦 餐廳總分
文章形式 | 地圖形式
2019-03-30
啱啱呢個禮拜得到米芝蓮嘅肯定,當然多人,等咗大概40分鐘,不過個部長好有禮貌,又着得夠專業(可能太忙,多啲笑容就一百分)。 條 推薦三絶牛肉麵、炸排骨。但係聽位部長有禮貌同個客講站排骨驚賣晒啦,冇問題,我原本都係諗住食牛肉麵啫。 可能佢今日比較忙,淨係搵侍應點菜都要啲時間,不過佢幫你落單嘅時候都會同你講聲唔好意思。 喺粉麵嘅時候,飲咗佢杯水,有微微嘅紅棗味,果然唔係一間普通嘅餐廳。 五佰蚊(台幣)一碗麵當然係貴啦(就算係香港嚟講都唔平,好少日本 拉麵賣過佰蚊),又要等半個鐘。您估好唔好食呢(如果一點九先至到,應該就唔使等位)? 因為我係搭枱,附近嘅食客係將所有嘅麵同埋餸都清晒,啲湯就算唔係飲晒都整返非常之少。 本姑爺覺得佢只係輸畀阿正廚房半招,但阿正貴差唔多一個Double。相比之下,阿「三」只係牛肉淋咗小小(比阿正),牛筋冇咁起膠。只算CP值,阿三贏! 總括嚟講值得過嚟試吓! ps: 餐廳送一杯細細嘅果醋。有加一
評分: 味道 5 環境 5 服務 5 衛生 5 CP值 4
2019-03-06
睇香港蘋果日報嘅果籽介紹,未嚟之前同個台灣同事傾開,嗰同事話唔好食。你之前都預咗唔一定好食。 客人唔多(咁佢又唔係好大),直入,叫咗個細嘅魯肉飯(暫時去過嘅餐廳細魯肉飯一碗未試過食飽,皆因真係好似香港嘅白飯一碗仔),當然唔夠,再要咗一個(碟仔)豬腳(原來係去骨,仲切到一片片,好似叉燒咁樣)。 個人覺得豬腳就唔使叫啦,但係魯肉飯都幾好食。食落口有甜味,之後覺得鹹鹹地。其實都幾好食喎。只係啲魯肉飯嗰汁唔係好夠,最後將啲豬腳連汁到埋落去滷肉飯度一齊食,咁樣就夠汁啦。 總結嚟咗冇後悔,你嘅話只要喺出邊食過好食嘅魯肉飯都唔算有損失。
評分: 味道 4 環境 5 服務 5 衛生 5 CP值 4
2019-03-17
12點前到,唔使排隊,只係要搭枱啫。點完嘢食,等緊麵嘅時候望返門口,已經有人排隊啦(仲未到12點)。同枱有兩個旅客,應該係泰國人,米芝蓮嘅江湖地位唔使講。 叫咗原味,個湯確係好清,帶牛味,唔濃,個人覺得偏淡咗小小,但係佢又唔係因為加多咗水果種淡法。 牛腱帶羶味,但係牛肉味就唔係好出,牛筋軟硬剛好。牛肚並非好似香港咁切到好似麻雀咁樣,反而好似捲蛋咁切法。 食完行出去見到有10到20個人排隊,其中有一半應該係遊客。 ps: 比較奇怪嘅係個鋪頭播一啲英文 heavy metal嘅歌,同啲嘢食痦唔係好唔夾。
評分: 味道 4 環境 4 服務 5 衛生 5 CP值 4
2019-03-30
友人介紹台北車站捷運站附近兩間牛肉麵,呢間係其中一間。位於旺中帶靜嘅地方(台北車站地方真係好大),離台北車站唔遠,又容易搵得到,唔使等位,直入,有兩層。 侍應冇叫我搭枱(香港通常都叫你搭枱),叫我上二樓(即係地面上一層),自己有張獨立枱。 剔紙仔(係一張過咗膠嘅餐牌上面用水筆寫),交比個侍應,自己出去攞筷子,等五至10分鐘,有麵食啦。 絕對係一個收貨嘅牛肉麵,唔算驚為天人,但係一定唔會失望。牛筋夠淋。 如果你响台北,正常都會經過台北車站,想食返碗牛肉麵,又坐得舒服,呢間值得嚟,又唔貴(考慮埋地段方便)。服務好!
評分: 味道 4 環境 4 服務 5 衛生 4 CP值 4
2019-02-16
金雞園唔使等位,反而呢間要等位。當然,如果你係外賣嘅話,咁都係排一陣隊(幾個人),就可以攞走個割包食啦。 本少爺諗住試吓個四神湯,同埋又驚住個割包啲油滴吓滴吓咁,有失斯文(點講我都係舊香港人代表、唔係代表新香港人),所以都係選擇坐低食。反正一個人容易等位。 唔知割包應該揀肥定瘦,佢有半肥瘦。唔知四神湯應該揀腸定係肚,佢有腸+肚(張紙確係咁寫,唔係我唔懶得寫個「加」字)。雙飛,唔使特別加錢,真係選擇困難症嘅人嘅天堂! 我當然係要雙拼啦,個半肥瘦割包唔油、唔腬。記得N年前跟台灣朋友去夜市食割包,好腬,加上企喺度食,食兩啖就真係想掉咗佢(不過台北搵垃圾桶又唔係咁容易)。但「藍家割包」唔同,我成個食晒,都好味。 睇相都知個湯好清,D料唔會過多(不過如果你當佢係晚餐,你就覺得佢小料),飲晒同食晒。如果唔鍾意內臟嘅朋友,咁就唔啱你啦(本少爺國語屬有限公司,冇問到老闆可唔可以淨係要湯,唔加內臟)。 環境窗明几淨,員工友善。食完唔使執嘢,行出櫃面俾錢,係冇單嘅,不過老闆好醒目,知我坐邊台,或者你自己同佢講張枱嘅號碼都應該得。 ps: 四神湯係有薏苡仁、茨實、山藥、蓮子
評分: 味道 4 環境 4 服務 4 衛生 4 CP值 5
|