欣葉小聚 南港店 (南港區)

剛剛俾米芝蓮推薦，係公司附近，咁岩今日落雨，同事唔想出去食飯，就等我嚟試吓啦。
欣葉係台灣應該算係有啲名氣，咁佢個仔又點呢？按照台灣蘋果日報嘅介紹，應該要試「紅蟳米糕」，但係價錢比較貴，先試下比較平嘅，好食嘅話下次返嚟打大佬。
叫咗三杯Q彈豬腳、地瓜飯。本少爺覺得個三杯豬腳做唔到出邊三杯雞嘅香味，豬腳正常好味，如果荏返小小比較適合我嘅口味。但係冇咗酒同薑同九層塔嘅香味就有啲撻Q。地瓜飯正常好味。
我諗我會試埋紅蟳米糕先至作定論，雖然係米之蓮推介，暫時唔覺得有啲乜嘢特別，唔試冇損失，特別考慮埋佢嘅價錢，可以過譬了。
ps:十二點前到，唔使等位。出面買單，收家一服務費。

阿榮本家 香菇肉粥 米粉湯 (中和區)

真係估唔到呢間野都喺OpenRice 度搵得到，咁又唔其，好似都有啲名人幫襯下，牆上邊有簽名，起碼見到有蘇貞昌。
相信間餐廳主要做街坊生意，所以要等位。因為同台灣嘅朋友一齊食飯，所以就唔好意思影相。
睇價錢都估到碟頭唔大，一隻碟大概等於成人嘅手掌（手指攤直）咁大。
菜牌上有炸喜相逢，喜相逢即係我哋香港叫嘅多春魚。本姑爺覺得個脆槳太厚啦。同理，個炸蚵仔（細隻嘅生蠔）都係因為個脆槳太厚而唔係咁好食。炸蝦仁都係一樣，我懷疑個法人係用雪藏蝦，所以無蝦味。炸豆腐就係炸比較細粒嘅豆腐，食唔到豆腐嘅軟林林感覺，同香港食避風塘炒蟹餐廳嘅咋豆腐唔一樣。
呢度嘅紅燒肉唔係我哋係香港食到上海菜嘅紅燒肉，反而佢係似燒味舖嘅燒肉。
鯊魚煙冇乜味，只係有少少嘅煙味。燙青菜就係熱水淥熟嘅菜。咁樣燙魷魚，唔使講你都知係點喇。
如果唔介意食大腸、豬皮呢啲內臟嘅話，我覺得大腸同豬皮都好食，豬皮都好似係就咁焯熟，冇肥膏。
香菇肉粥幾好食，個湯（粥水）係可以添嘅，但係據問有味精，所以我就冇添到。
總括來講呢度係食平民野，我唔覺得有特別嘅廚藝，特登嚟就唔好啦，唔試都冇損失，雖然有名人嚟過。

陳根找茶 (信義區)

鋪頭係喺一個細嘅社區裏面，環境清靜。信義區果然係有錢人嘅地方。
直入唔使等，冇位坐，企係度食，但係都乾淨企埋。你買完野佢又會同你講聲多謝，感覺係出自內心，唔係公式化。
堂食佢會拎過嚟，唔使自己出去攞。
裏面好似冇冷氣，只係見到好多把風扇，今日天氣比較涼爽，但係喺入邊都覺得有啲焗，好難想像夏天可以係裏邊企喺度食。
早餐味道正常，唔錯，功勞應該係肉絲同埋乳酪嘅甜味令到早餐好味，並唔係廚藝有乜嘢特別。經過可以一試，特登你就唔使啦。

沒事早事坐 (中山區)

七點幾，有人排隊買外賣，堂食有位。自己响門口攞餐牌，入去坐低慢慢揀嘢食，揀好搵佢落班，食完先至俾錢。自己攞餐具。
點咗之前有介紹嘅黃金蛋餅，等左5分鐘到就嚟啦。本姑爺覺得佢有啲動嘅南瓜同薯蓉有D凍，同有微熱嘅蛋餅唔係十分夾，並冇冰火嘅感覺（如果佢真係想有嘅話）。一定唔難食。豆漿好飲。本來想飲冬瓜茶，但個姐姐好有禮貌咁同我講只有夏天先至有得飲（而家唔係夏天）。慢慢坐亦都無人吹你。
絕對冇跌錢，但又唔一定要嚟食。

一號糧倉 (松山區)

我都唔記得係邊一個介紹一號糧倉，既然嚟到附近，又唔知有乜好餐廳，就去搵一號糧倉。基本上佢係一條唔覺眼嘅街裏面，真係冇諗過裏面有一間餐廳，仲幾大下。裏面有兩層，一樓（我哋所謂嘅地下）係賣嘢嘅，賣乜嘢就冇睇得好清楚，應該係買一啲煮食嘅嘢食材，譬如米、雪藏豬扒。行樓梯上一層，就係餐廳。
我喺地面睇餐牌嘅時候，有個好熱情嘅員工過嚟介紹呢間餐廳，我（用國語）問佢有乜嘢好食，跟住佢就話「一般香港人鍾意...」。
之後上咗去嗌嘢食，裏便都幾多人，冇叫到嗰位女員工推薦嘅 Risotto 或者牛肉麵，因為我覺得價錢有啲貴（當然係香港人嘅角度就唔貴啦），所以我決定先試吓比較平嘅食物，好食再嚟試貴D嘅嘢食。
個（古式）咖喱飯，味道冇乜特別，食得出材料好新鮮，但本姑爺覺得啲牛肉太過冧。埋單嘅時候係自己出櫃面埋單，兩手空空咁（佢冇單俾過我），但佢又記得我點咗啲乜嘢。
可以再嚟，但係又唔會特登過嚟。