橘色涮涮屋 一館 (大安區)

大約三年前，睇完一個電視節目介紹之後，兩年前去台灣試過第一次之後，橘色涮涮鍋就成了我們倆去台北嘅必去景點。

網上暫時未能夠提供訂位服務，要直接打電話去預約才可成功訂位！

好好彩我地訂到8:45，只要食得到晚一點都唔緊要。

因為二館有位，所以邀請我地行過一個街口去二館用餐，不用兩分鐘就到。

去到二館比一館環境更好，更寬闊，我地兩人可以坐房，兩人有一張4人大圓枱，比起一館枱同枱中間用簾子分隔更有私人空間，不被干擾。

提供了2款基本沾醬，一款係日本醬油加蘿蔔蓉同葱花，一款係自家製的胡麻醬。因為我地係牛嘅愛好者，點了兩份牛嘅套餐: 澳洲和牛，美頂級牛小排。

前菜有3款供選擇: 和風蕃茄/和風蘆筍豆腐/和風生菜沙拉。 我地選了後二。
和風蘆筍豆腐: 豆腐配上酸酸甜甜嘅醬油，仲有蟹肉，南瓜蓉同蘆筍片，十分令人開胃。

和風生菜沙拉: 新鮮爽脆蔬菜淋上帶點嗆鼻嘅washabi胡麻醬，配有腰果，特別醒胃。不得不讚，沙律上嘅北海道粟米，非常清甜可口。


火鍋係用銅鍋上，煮著高麗菜清湯。店員好貼心會係上前菜時開始煮蔬菜爐，待你食完前菜就可以立即享用。

蔬菜爐嘅份量好多，有高麗菜，白菇，金菇，鮮冬菇，南瓜，芋絲，蕃茄，豆腐，北海道粟米，苣菜，大葱，仲有魚板，芝士竹輪同蟹肉丸。超級超級豐富！！十分欣賞店員把所有材料好整齊甘舖排入鍋煮。大愛北海道粟米，那份清甜係特別不同。

食左大約四份一左右，兩位主角終於出場！
牛小排有6件左右，油脂分佈均勻，整齊地排列係碟上面。


澳洲和牛擺盤有如一碟藝術品，雪花分佈當然比牛小排更勝一籌，有5片，但每一片都切得非常大片。


兩款都係下鍋涮幾秒就可以食，入口即溶，非常美味，整個口都係濃郁嘅牛味，好幸福。和牛不僅係和牛，略比小牛比更勝一籌。

吃得七七八八嘅時候，另一個重頭戲準備出場！就係把一整晚嘅精華火鍋湯煮食粥。

店員首先會把湯內嘅食物撈乾淨，大火煮一陣個湯到更濃郁左之後，會讓我地先試一試個湯會唔會太淡味或太咸味，無問題就會倒入白飯，大火煮大約20分鐘左右，慢慢收汁，令每一粒飯都吸收曬嘅精華，之後再加入雞蛋，紫菜絲同葱花，煮成了一鍋食到停唔到嘅粥。

呢個粥好味道到不得了，好神奇唔洗加任何調味料，已經好夠味。原本已經幾飽，但都停唔到口食左兩碗有多。提供左三款送粥嘅漬物加落去食，但我個人認為冇甘嘅必要已經係完美。

仲有生果同甜品。生果有3件，芭樂，菠蘿同提子，好新鮮好甜。

甜品亦同前菜一樣有三款選擇，有杏仁豆腐，焦糖布丁，紅豆湯丸。我地選擇了頭兩款。

杏仁豆腐: 唔會好甜，好香嘅杏仁味，煙煙un un嘅質地，有少少似麻糬質感，好好味呀，連平常唔食杏仁嘅老公都讚。
焦糖布丁: 入口香滑軟嫩，中規中矩。

不得不讚，店員服務非常貼心！餐前餐後都提供熱毛巾抹手，不停為客人烹調食物。

高質素嘅火鍋，下一次再嚟台灣我都會再一定嚟食。或者下次會試下蟹。

永康牛肉麵 (大安區)

老公話嚟台灣唔食過牛肉面等如冇嚟過台灣，今次嚟永康街就嚟試試旅遊書必推介嘅永康牛肉面。

沿著永康街行點解行到完都唔見，望一望地圖原來行過左龍，舖頭係那間好搶眼食雪花冰嘅舖頭轉入去直行。

大約12點幾嚟嚟到，門口已經開始排隊，入面已經坐無虛席，等左大約十分鐘左右就有位。

餐廳有兩層嘅，繁忙時段要搭枱，坐得有點擠。這樣沒有最低消費嘅。

一進來就見到櫥窗放滿好多款小菜，40/60一碟。

餐牌上有圖同幾國語言翻譯，方便唔同國籍遊客點餐。

我地叫左大嘅紅燒牛肉面(280)，有六大舊牛肉，軟軟嫩嫩嘅，燉得都幾入味。湯面有幾多紅油，但只帶點微辣，算幾濃郁。面條就似食擔擔面嘅幼身面條，煮得剛好，唔會太淋。

都算幾好食嘅，不過要280一碗都偏貴，下次再嚟台北可能未必會特登過嚟食。

思慕昔 本館 (大安區)

我倆都是芒果迷，來到永康街見到這間搶眼的冰店，當然必選芒果冰吃！

一個是招牌(芒果雪糕芒果雪花冰)，一個是人氣no.1(手工奶酪芒果雪花冰)，好難選擇呀。最後都係奶酪那個勝出。

一份的份量超級多，兩個人都未必食得曬呀！

製作速度很快，點完餐後等了大約五分鐘就有得取餐。

綿綿的雪花冰堆得一座山丘甘，淋了煉奶，頂部放了雪白的奶酪，旁邊就俾滿滿嘅芒果粒圍滿。

雪花冰係好綿細嘅，奶酪也不錯，好香奶味，可惜最愛食嘅芒果唔甜。

可能天氣太凍嘅關係，食左一半左右就凍到震，要放棄佢呀。

九州鬆餅咖啡 台北松菸店 (信義區)

兩年前睇了電視節目介紹就好想嚟食，但那次無訂位，去到冇訂位是吃不到，飲恨了。

今次來台北來到松菸區，再見到呢間餐廳就抱著一試嘅心態，睇下有冇機會walk in有得入，可能係平日，好好彩有位可以直入。

餐牌上有各款形形色色嘅鬆餅🥞同waffle，有鹹有甜嘅款式，花多眼亂，每一款嘅相都好吸引呀！

因為剛食完午餐無耐，唔係太餓嘅關係，而每人有最低消費，所以叫了一份鬆餅同一杯飲品。我地叫左人氣no.1嘅抹茶提拉米蘇鬆餅和冰水果茶。

期待已久嘅鬆餅來到，擺盤好靚，不停攞相機係甘影相

抹茶提拉米蘇鬆餅: 3塊鬆餅疊在一起，每一層之間都撒上香濃嘅抹菜粉，而最上面一層有一層厚厚的瑪士卡邦芝士加抹茶粉，旁邊配有抹茶黑糖醬和香草雪糕。 鬆餅切下去跟平常的比較扎實， 入口有淡淡小麥香味。如果一個人要完成一份就會有啲膩，都係兩個人分享適合些。

冰水果茶: 幾好飲，不會太甜，有茶味同粒粒水果，不過一杯要150有點貴

食完之後，如果有興趣回家自己整鬆餅食的話，都可以買它的鬆餅粉，有95折呀！

瞞著爹 台北八德 丼飯 (松山區)

不停都聽到身邊好多朋友介紹瞞著爹嘅魚生丼好正，可惜一直未有機會試到。所以今次嚟台北，一落機就過嚟食。

抱住超級期待嘅心情搵間舖頭係邊，發現原來瞞住爹有5間不同生意嘅舖頭，分別做海鮮丼飯，拉面，壽司，居酒屋同無菜單料理。

幸好嚟到係剛開門無耐，店內唔係太多客人，唔洗排隊就可以直接入座，呢道係要係門口先選好餐付款再入內進食嘅。

一入到直望就見到有一個好大好大嘅廚房見到各位廚司努力甘整緊啲魚生飯，見到都流曬口水呀

我地叫左2個魚生飯

特選綜合海鮮丼: 呢個係排行榜入面嘅top1,貪心嘅老公見到有曬甘多款魚生，就立即決定要呢個。呢個飯舖著滿滿嘅厚切魚生，有三文魚，三文魚子，星鰻，比目魚，帶子，吞拿魚，玉子等

松葉蟹鮭魚親子丼: 熱愛蟹同三文魚嘅我，呢個係不二之選呀！有好多塊厚厚嘅肥美三文魚，玉子，三文魚子，滿滿嘅松葉蟹肉，鮮味蟹膏，仲有鮮蟹肉捧

四到五百多台幣能夠食到甘高質新鮮嘅魚生飯，的確好抵食。下一次再嚟台北，我都會番嚟食呀，又或者試下其下瞞著爹店。