鰻料理京都屋 (中山區)

上一次嚟台北,食過肥前屋嘅鰻魚飯, 覺得都不錯。 今次嚟到中山站, 又唔想去大排長龍,
而且又坐得比較擠迫嘅肥前屋, 就去左係附近行過2個街口嘅鰻料理京都屋。 


餐廳門口有一執半身玻璃, 可以見到一位老師傅好用心製作緊烤鰻魚, 見到我們欣賞目光, 佢回番一個溫暖微笑俾我地。入到去餐廳, 座位唔算多, 坐得都算舒服, 唔會好似肥前屋嘈吵,可以靜靜地同老公食午餐。 


餐牌上菜式大部分都係圍繞住鰻魚料理為主, 可以單點鰻魚份, 有大有細, 又或者定食等等。我地叫左一個鰻重(大), 一份鰻丼定食 梅。鰻重(大): 係一份大量級鰻魚飯, 附味噌湯、醃漬物, 一打開飯盒個蓋, 一陣好香燒烤味醬汁味撲面而來, 令人食指大動。有4大件鰻魚蓋係飯面, 鰻魚口感紮實而柔嫩, 醬料刷得剛好, 外皮燒到帶點焦香，配上淋有鰻魚汁嘅粒粒分明日本米食, 的確好好味。味噌湯、醃漬物不過不失, 無太大驚喜。

鰻丼定食 梅: 我又想食鰻魚, 又喜愛食玉子燒, 鰻丼定食 梅可以一次過滿足曬我兩個願望。鰻魚飯份量相對鰻重細份好多好多, 只係一小碗白飯配上兩小片鰻魚。除了附送味噌湯、醃漬物之外, 亦有一份幾大份蔬菜沙律, 蔬菜新鮮爽口配上酸酸沙律汁, 幾開胃。另一個重頭戲係鰻魚玉子燒, 蛋唔會煮得過熟，仍然仲有少少蛋汁，唔會好似平日嘅偏甜，包住鰻魚塊，好幸福呀！

三媽臭臭鍋 台北昆明店 (萬華區)

今次嚟台北，我地住西門町，為左方便出入買野同食野。每一次出入去捷運站，都會經過三媽臭臭鍋，次次經過都見到好多人排隊，最特別係啲鍋全部係門口位置煮，雄雄烈火甘煮，次次都閒到好香流曬口水，但係次次我地都飽到捧住個肚食唔落。


嚟到最後一日，冇理由帶住遺憾番去嘅，就算飽都要去試。夜晚十一點幾去到，都座無虛席，原來有最底消費，每人要最少點一個鍋，但我倆都幾飽，要每人食一個真係搞唔店。

一個鍋120元台幣，真係物超所值，附送白飯一個，如果堂食可以任飲當日飲料，唔夠餸當然可以加錢單點添配料。

我地最後都係買一份外賣番民宿食，點左一份大腸臭臭鍋，係門口落單付款，我地坐係門口等外賣，可以睇到整個煮食過程，的確幾吸晴，有唔少行人經過停低睇睇，甚至入嚟幫襯。

我地有好多材料舖滿成個鍋，有豬肉片，菜，金菇，臭豆鍋，蜆，大腸，腸仔等等，用料豐富。大約等左十分鐘左右就有得攞，快快趣番民宿急不及待試食。


打開個蓋，一陣香味湧出嚟，當初仲擔心臭臭鍋會好臭，但完全冇呢個問題，湯飲落幾濃郁，配落白飯食一流。其他材料食落不過不失。



以120元嚟講，超級物超所值呀！

橘色涮涮屋 一館 (大安區)

大約三年前，睇完一個電視節目介紹之後，兩年前去台灣試過第一次之後，橘色涮涮鍋就成了我們倆去台北嘅必去景點。

網上暫時未能夠提供訂位服務，要直接打電話去預約才可成功訂位！

好好彩我地訂到8:45，只要食得到晚一點都唔緊要。

因為二館有位，所以邀請我地行過一個街口去二館用餐，不用兩分鐘就到。

去到二館比一館環境更好，更寬闊，我地兩人可以坐房，兩人有一張4人大圓枱，比起一館枱同枱中間用簾子分隔更有私人空間，不被干擾。

提供了2款基本沾醬，一款係日本醬油加蘿蔔蓉同葱花，一款係自家製的胡麻醬。因為我地係牛嘅愛好者，點了兩份牛嘅套餐: 澳洲和牛，美頂級牛小排。

前菜有3款供選擇: 和風蕃茄/和風蘆筍豆腐/和風生菜沙拉。 我地選了後二。
和風蘆筍豆腐: 豆腐配上酸酸甜甜嘅醬油，仲有蟹肉，南瓜蓉同蘆筍片，十分令人開胃。

和風生菜沙拉: 新鮮爽脆蔬菜淋上帶點嗆鼻嘅washabi胡麻醬，配有腰果，特別醒胃。不得不讚，沙律上嘅北海道粟米，非常清甜可口。


火鍋係用銅鍋上，煮著高麗菜清湯。店員好貼心會係上前菜時開始煮蔬菜爐，待你食完前菜就可以立即享用。

蔬菜爐嘅份量好多，有高麗菜，白菇，金菇，鮮冬菇，南瓜，芋絲，蕃茄，豆腐，北海道粟米，苣菜，大葱，仲有魚板，芝士竹輪同蟹肉丸。超級超級豐富！！十分欣賞店員把所有材料好整齊甘舖排入鍋煮。大愛北海道粟米，那份清甜係特別不同。

食左大約四份一左右，兩位主角終於出場！
牛小排有6件左右，油脂分佈均勻，整齊地排列係碟上面。


澳洲和牛擺盤有如一碟藝術品，雪花分佈當然比牛小排更勝一籌，有5片，但每一片都切得非常大片。


兩款都係下鍋涮幾秒就可以食，入口即溶，非常美味，整個口都係濃郁嘅牛味，好幸福。和牛不僅係和牛，略比小牛比更勝一籌。

吃得七七八八嘅時候，另一個重頭戲準備出場！就係把一整晚嘅精華火鍋湯煮食粥。

店員首先會把湯內嘅食物撈乾淨，大火煮一陣個湯到更濃郁左之後，會讓我地先試一試個湯會唔會太淡味或太咸味，無問題就會倒入白飯，大火煮大約20分鐘左右，慢慢收汁，令每一粒飯都吸收曬嘅精華，之後再加入雞蛋，紫菜絲同葱花，煮成了一鍋食到停唔到嘅粥。

呢個粥好味道到不得了，好神奇唔洗加任何調味料，已經好夠味。原本已經幾飽，但都停唔到口食左兩碗有多。提供左三款送粥嘅漬物加落去食，但我個人認為冇甘嘅必要已經係完美。

仲有生果同甜品。生果有3件，芭樂，菠蘿同提子，好新鮮好甜。

甜品亦同前菜一樣有三款選擇，有杏仁豆腐，焦糖布丁，紅豆湯丸。我地選擇了頭兩款。

杏仁豆腐: 唔會好甜，好香嘅杏仁味，煙煙un un嘅質地，有少少似麻糬質感，好好味呀，連平常唔食杏仁嘅老公都讚。
焦糖布丁: 入口香滑軟嫩，中規中矩。

不得不讚，店員服務非常貼心！餐前餐後都提供熱毛巾抹手，不停為客人烹調食物。

高質素嘅火鍋，下一次再嚟台灣我都會再一定嚟食。或者下次會試下蟹。

九州鬆餅咖啡 台北松菸店 (信義區)

兩年前睇了電視節目介紹就好想嚟食，但那次無訂位，去到冇訂位是吃不到，飲恨了。

今次來台北來到松菸區，再見到呢間餐廳就抱著一試嘅心態，睇下有冇機會walk in有得入，可能係平日，好好彩有位可以直入。

餐牌上有各款形形色色嘅鬆餅🥞同waffle，有鹹有甜嘅款式，花多眼亂，每一款嘅相都好吸引呀！

因為剛食完午餐無耐，唔係太餓嘅關係，而每人有最低消費，所以叫了一份鬆餅同一杯飲品。我地叫左人氣no.1嘅抹茶提拉米蘇鬆餅和冰水果茶。

期待已久嘅鬆餅來到，擺盤好靚，不停攞相機係甘影相

抹茶提拉米蘇鬆餅: 3塊鬆餅疊在一起，每一層之間都撒上香濃嘅抹菜粉，而最上面一層有一層厚厚的瑪士卡邦芝士加抹茶粉，旁邊配有抹茶黑糖醬和香草雪糕。 鬆餅切下去跟平常的比較扎實， 入口有淡淡小麥香味。如果一個人要完成一份就會有啲膩，都係兩個人分享適合些。

冰水果茶: 幾好飲，不會太甜，有茶味同粒粒水果，不過一杯要150有點貴

食完之後，如果有興趣回家自己整鬆餅食的話，都可以買它的鬆餅粉，有95折呀！

瞞著爹 台北八德 丼飯 (松山區)

不停都聽到身邊好多朋友介紹瞞著爹嘅魚生丼好正，可惜一直未有機會試到。所以今次嚟台北，一落機就過嚟食。

抱住超級期待嘅心情搵間舖頭係邊，發現原來瞞住爹有5間不同生意嘅舖頭，分別做海鮮丼飯，拉面，壽司，居酒屋同無菜單料理。

幸好嚟到係剛開門無耐，店內唔係太多客人，唔洗排隊就可以直接入座，呢道係要係門口先選好餐付款再入內進食嘅。

一入到直望就見到有一個好大好大嘅廚房見到各位廚司努力甘整緊啲魚生飯，見到都流曬口水呀

我地叫左2個魚生飯

特選綜合海鮮丼: 呢個係排行榜入面嘅top1,貪心嘅老公見到有曬甘多款魚生，就立即決定要呢個。呢個飯舖著滿滿嘅厚切魚生，有三文魚，三文魚子，星鰻，比目魚，帶子，吞拿魚，玉子等

松葉蟹鮭魚親子丼: 熱愛蟹同三文魚嘅我，呢個係不二之選呀！有好多塊厚厚嘅肥美三文魚，玉子，三文魚子，滿滿嘅松葉蟹肉，鮮味蟹膏，仲有鮮蟹肉捧

四到五百多台幣能夠食到甘高質新鮮嘅魚生飯，的確好抵食。下一次再嚟台北，我都會番嚟食呀，又或者試下其下瞞著爹店。