胡同燒肉夜食 - 胡同燒肉1號店 (大安區)

從大學畢業旅行食過第一次開始，胡同燒肉一向係本人同老婆最愛燒肉店，每次去台北旅遊都會黎食一次，而今個Trip當然都唔例外!今次去的是一號店，同我第一次來一樣，裝橫、服務依舊，人物都依舊，只係身份不同了(心心眼)。
一進去就十分熟架步，將個人物品(包括老婆在對面舖買的一大堆戰利品)放進儲物格, 不用怕東西燻得一股燒肉味道，之後就點了"照舊"的菜式。
蟹羔生干貝: 每次必點! 滿滿的蟹羔放在生鮮的生干貝上，再淋上鮮醬油，口感及鮮味十足! 本人最愛之一!


清酒(冷): 清酒香醇不用多說，特別的是以特式酒壺來載酒，除了保溫用途外，還增添不少日本風味!


這燒肉店一向以一條長吧枱作特式，由工作人員作點菜、準備食材及調味、以至為客人燒肉等一條龍服務，看著他們為我們燒肉亦是賞心樂事! 而所有燒肉都不用另蘸燒肉醬，只提供檸檬汁蘸肉就可帶出鮮味。


達拉斯: 胡同招牌菜! 每次必點!牛肉油花分佈均勻，入口即溶! 本人最愛之一!工作人員為我們燒達拉斯時，這畫面太好看了!

霜降松阪豬(蒜味): 蒜味是我們的新嘗試，肉質較有咬勁，邊緣烤得很脆，但還是鹽醬比較配!


 厚切鮭魚腩: 每次必點! 新鮮肥美的鮭魚是老婆的最愛! 


高麗菜: 這也是每次必點! 平衡一下燒肉的油膩感! 還特別配上甜醬，好吃!

最後總結: 美味依舊! 現在在打食評時看到相片已經在懷念。下次來台灣一定再食過!

豪大大雞排士林總店 (士林區)

以前拍拖去第一次去旅行嚟到台北行士林夜巿，第一次豪大大雞扒就愛上左佢。

結完婚之後重遊舊地，嚟到台北，見到豪大大雞扒舖頭，決定買嚟食緬懷一番。

首先排隊落單，攞飛之後等叫號碼取貨。現場都有唔少人等緊攞食物，店員好快手，大約等左五分鐘左右就有得攞。

店員會問要辣定唔辣口味，唔食得辣嘅我地當然要唔辣。

雞扒同以前一樣都係甘大塊，大過塊面嘅雞扒，豪大大堅持唔切件，原件一塊過炸。雞扒炸粉厚度算適中，雞肉唔會炸得過火，咬落有嫩滑有肉汁，味粉令整份雞扒幾惹味。

雖然香港都有得食，但係台灣食比香港食嘅價錢打左個七折左右，無理由唔食吧。

鰻料理京都屋 (中山區)

上一次嚟台北,食過肥前屋嘅鰻魚飯, 覺得都不錯。 今次嚟到中山站, 又唔想去大排長龍,
而且又坐得比較擠迫嘅肥前屋, 就去左係附近行過2個街口嘅鰻料理京都屋。 


餐廳門口有一執半身玻璃, 可以見到一位老師傅好用心製作緊烤鰻魚, 見到我們欣賞目光, 佢回番一個溫暖微笑俾我地。入到去餐廳, 座位唔算多, 坐得都算舒服, 唔會好似肥前屋嘈吵,可以靜靜地同老公食午餐。 


餐牌上菜式大部分都係圍繞住鰻魚料理為主, 可以單點鰻魚份, 有大有細, 又或者定食等等。我地叫左一個鰻重(大), 一份鰻丼定食 梅。鰻重(大): 係一份大量級鰻魚飯, 附味噌湯、醃漬物, 一打開飯盒個蓋, 一陣好香燒烤味醬汁味撲面而來, 令人食指大動。有4大件鰻魚蓋係飯面, 鰻魚口感紮實而柔嫩, 醬料刷得剛好, 外皮燒到帶點焦香，配上淋有鰻魚汁嘅粒粒分明日本米食, 的確好好味。味噌湯、醃漬物不過不失, 無太大驚喜。

鰻丼定食 梅: 我又想食鰻魚, 又喜愛食玉子燒, 鰻丼定食 梅可以一次過滿足曬我兩個願望。鰻魚飯份量相對鰻重細份好多好多, 只係一小碗白飯配上兩小片鰻魚。除了附送味噌湯、醃漬物之外, 亦有一份幾大份蔬菜沙律, 蔬菜新鮮爽口配上酸酸沙律汁, 幾開胃。另一個重頭戲係鰻魚玉子燒, 蛋唔會煮得過熟，仍然仲有少少蛋汁，唔會好似平日嘅偏甜，包住鰻魚塊，好幸福呀！

三媽臭臭鍋 台北昆明店 (萬華區)

今次嚟台北，我地住西門町，為左方便出入買野同食野。每一次出入去捷運站，都會經過三媽臭臭鍋，次次經過都見到好多人排隊，最特別係啲鍋全部係門口位置煮，雄雄烈火甘煮，次次都閒到好香流曬口水，但係次次我地都飽到捧住個肚食唔落。


嚟到最後一日，冇理由帶住遺憾番去嘅，就算飽都要去試。夜晚十一點幾去到，都座無虛席，原來有最底消費，每人要最少點一個鍋，但我倆都幾飽，要每人食一個真係搞唔店。

一個鍋120元台幣，真係物超所值，附送白飯一個，如果堂食可以任飲當日飲料，唔夠餸當然可以加錢單點添配料。

我地最後都係買一份外賣番民宿食，點左一份大腸臭臭鍋，係門口落單付款，我地坐係門口等外賣，可以睇到整個煮食過程，的確幾吸晴，有唔少行人經過停低睇睇，甚至入嚟幫襯。

我地有好多材料舖滿成個鍋，有豬肉片，菜，金菇，臭豆鍋，蜆，大腸，腸仔等等，用料豐富。大約等左十分鐘左右就有得攞，快快趣番民宿急不及待試食。


打開個蓋，一陣香味湧出嚟，當初仲擔心臭臭鍋會好臭，但完全冇呢個問題，湯飲落幾濃郁，配落白飯食一流。其他材料食落不過不失。



以120元嚟講，超級物超所值呀！

橘色涮涮屋 一館 (大安區)

大約三年前，睇完一個電視節目介紹之後，兩年前去台灣試過第一次之後，橘色涮涮鍋就成了我們倆去台北嘅必去景點。

網上暫時未能夠提供訂位服務，要直接打電話去預約才可成功訂位！

好好彩我地訂到8:45，只要食得到晚一點都唔緊要。

因為二館有位，所以邀請我地行過一個街口去二館用餐，不用兩分鐘就到。

去到二館比一館環境更好，更寬闊，我地兩人可以坐房，兩人有一張4人大圓枱，比起一館枱同枱中間用簾子分隔更有私人空間，不被干擾。

提供了2款基本沾醬，一款係日本醬油加蘿蔔蓉同葱花，一款係自家製的胡麻醬。因為我地係牛嘅愛好者，點了兩份牛嘅套餐: 澳洲和牛，美頂級牛小排。

前菜有3款供選擇: 和風蕃茄/和風蘆筍豆腐/和風生菜沙拉。 我地選了後二。
和風蘆筍豆腐: 豆腐配上酸酸甜甜嘅醬油，仲有蟹肉，南瓜蓉同蘆筍片，十分令人開胃。

和風生菜沙拉: 新鮮爽脆蔬菜淋上帶點嗆鼻嘅washabi胡麻醬，配有腰果，特別醒胃。不得不讚，沙律上嘅北海道粟米，非常清甜可口。


火鍋係用銅鍋上，煮著高麗菜清湯。店員好貼心會係上前菜時開始煮蔬菜爐，待你食完前菜就可以立即享用。

蔬菜爐嘅份量好多，有高麗菜，白菇，金菇，鮮冬菇，南瓜，芋絲，蕃茄，豆腐，北海道粟米，苣菜，大葱，仲有魚板，芝士竹輪同蟹肉丸。超級超級豐富！！十分欣賞店員把所有材料好整齊甘舖排入鍋煮。大愛北海道粟米，那份清甜係特別不同。

食左大約四份一左右，兩位主角終於出場！
牛小排有6件左右，油脂分佈均勻，整齊地排列係碟上面。


澳洲和牛擺盤有如一碟藝術品，雪花分佈當然比牛小排更勝一籌，有5片，但每一片都切得非常大片。


兩款都係下鍋涮幾秒就可以食，入口即溶，非常美味，整個口都係濃郁嘅牛味，好幸福。和牛不僅係和牛，略比小牛比更勝一籌。

吃得七七八八嘅時候，另一個重頭戲準備出場！就係把一整晚嘅精華火鍋湯煮食粥。

店員首先會把湯內嘅食物撈乾淨，大火煮一陣個湯到更濃郁左之後，會讓我地先試一試個湯會唔會太淡味或太咸味，無問題就會倒入白飯，大火煮大約20分鐘左右，慢慢收汁，令每一粒飯都吸收曬嘅精華，之後再加入雞蛋，紫菜絲同葱花，煮成了一鍋食到停唔到嘅粥。

呢個粥好味道到不得了，好神奇唔洗加任何調味料，已經好夠味。原本已經幾飽，但都停唔到口食左兩碗有多。提供左三款送粥嘅漬物加落去食，但我個人認為冇甘嘅必要已經係完美。

仲有生果同甜品。生果有3件，芭樂，菠蘿同提子，好新鮮好甜。

甜品亦同前菜一樣有三款選擇，有杏仁豆腐，焦糖布丁，紅豆湯丸。我地選擇了頭兩款。

杏仁豆腐: 唔會好甜，好香嘅杏仁味，煙煙un un嘅質地，有少少似麻糬質感，好好味呀，連平常唔食杏仁嘅老公都讚。
焦糖布丁: 入口香滑軟嫩，中規中矩。

不得不讚，店員服務非常貼心！餐前餐後都提供熱毛巾抹手，不停為客人烹調食物。

高質素嘅火鍋，下一次再嚟台灣我都會再一定嚟食。或者下次會試下蟹。