奧志雷 等級2 | 關注 留言給此食家 |
排序方法:
日期 笑臉 哭臉
編輯推薦 餐廳總分
文章形式 | 地圖形式
2018-12-27
遊完台中新社古堡花園,結識兩位台中美女及她們的寵物後,司機哥哥直接將我們安全送到這裡。火鍋店何解可以那麼宏偉啊﹗不是一間店,係一座城堡般。時間飛逝,開心既時間過得特別快,轉眼已經係台中溫泉養生之旅 Day 3 咯﹗ 晚餐鎖定西屯區這一鍋台中朝富殿,皇室秘藏鍋物﹗步入食店嚇得目定口呆,裝潢華麗宏偉,庭臺樓閣古式古鄉,中式巨形吊燈籠,水池潺潺,流水聲悅耳動聽,超高的樓底直望三樓,燈光柔和舒服,冷氣強勁,空氣流通,感覺非常震憾。 全部美女侍應樣子甜美,穿上中式服裝或祺袍,苗條身體玲瓏浮凸,使人目不暇給。服務熱情周到,溫柔的聲線,完全忘我陶醉。回一回神,係時候研究下有什麼山珍海錯,珍离異獸食喇。很多罕見食材,有趣吸引,貪吃的我當然款款想試啦。 高檔食材,經濟價錢,香港不會有啦。所有環境、服務、衞生、食物都頂級無得彈,無可挑剔的滿分,大滿貫﹗數款養生湯鍋,武則天富貴榮華鍋、康熙宜妃滋補養生鍋、等等。大量雞牛羊豬,就連海鮮類朼絕不野少,還有未在香港未見過未聽過的食材呢。首次到訪,先來個鴛鴦浴吧! 麒麟啤,離開酒店走了一整天,來支冰凍啤酒順順喉,爽啊﹗蔥油滷水豬臉肉,開胃室溫前菜,嚥韌的膠質,黏黏的充滿油香,趙著清爽滷水味道,越食越想食啊,如果有蒜蓉白醋就更精采喇。 鴛鴦鍋,台式麻辣湯併藥膳雞湯?不過菜牌印著御膳麻辣鍋併老火鍋。萬眾期待終於送到,用上古味濃厚的銅鼎盆著,真的十分有宮庭感覺呢。 極神仙牛肉,霜降肥牛非常頂級,脂肪紋茂密不均,灼一灼粉紅色即食,滑嘟嘟迅間溶化,乳香濃濃,牛味清香!還有次選神仙牛肉,即美國牛小排,有機會再試吧。梅花豬肉,瘦猛猛的看不到怎麼有油脂,乾乾鞋鞋,豬肉味道有,不過豬甜味薄弱。 曼波魚魚皮,即巨形肥嘟嘟的翻車魚。程純白色的魚皮,彷似軟軟椰青肉,烚完變成半透明,好鬼得趣。食落似啫喱,有少少咸味,都係配辣椒豉油會更可口。冬金鯧,沒半點新鮮感覺,急凍魚塊,連冰鮮也說不上。死實陰沉的味道,結實乾乾,沒有鮮味。 雪白軟絲,即魷魚絲,軟軟嚥韌富彈性,沒有怎麼樣的味道。粟米、金菇,平凡普通,索汁一流。根島生態蝦,沒什麼特別的冰鮮味道,微彈微爽微蝦甜。 鴨血,滾熱辣一口爆汁,甜美幼滑滿載水份,入味極致﹗鴨血及冰豆腐原來可以無限復活,任食的呢﹗回到香港見到食評才知道,我最愛食鴨血,蝕晒喇﹗薑汁雪耳糖水,驅寒佳品,我不愛甜都呷兩口吧。荔枝醋砂冰,最後還有貼心的燃脂乳酸飲品,舒服清涼。
評分: 味道 4 環境 5 服務 5 衛生 5 CP值 5
2018-10-31
明天就要回港了,趁仲有時間,約純維食多次飯先,她就在附近上班,過來酒店食好方便,所以決定係酒店中菜餐食午餐,一踏入此店,第一個感覺係比我想像中平民化。 中菜館分為兩區,可以坐室內,亦可坐 window seat 望望街境,感受下陽光,不過今天係陰天呢,仲有幾陣雨添。檢查菜牌幾回,都唔知食咩好,求其是但試試商務套餐再加幾樣點心,可以試多幾樣野,最後都係嗰句,最好味既菜色係晒香港。 第一道菜,燒味雙併,燒鴨肉味濃,蠻不錯,不過鴨皮又腍又油。豉油雞,冰鮮貨式淡又腍。XO 醬帶子炒蜜糖豆,其貌不揚有驚喜。蜜糖豆鮮爽甜有齊,翠綠多汁,帶子炒得剛剛好,彈牙爽口無過老,鑊氣就稍為欠棒。蒜蓉蒸扇貝,廿十成過熟,韌韌老老起渣,鮮味已完全流失殆盡,味道一般。 鵝肝春卷,賣相看似十分飽滿,咬落食沒有鵝肝味道,有可能太淡、有可能餡太少。試試解剖開看看內裡什麼乾坤。發現不過是鵝肝醬來的,還非常瘦削沒油脂,脂肪不足根本食不出到味道,而且炸物本身已經濃味,鵝肝醬份量又少又淡,依家只食到香脆春卷皮味。 春筍冬菇西蘭花,望落無咩特別,食左先講。冬菇,罐頭貨,無野講。春筍,都係罐頭貨,仲有少少渣,都唔洗講。西蘭花,鮮甜爽口,再睜大雙眼睇清楚一點。見唔見張相有咩特別呀?睇唔到唔緊要,再睇下一張 zoom 近一點。搵錯處,見唔見到呀?見唔見到有啲咩係棵西蘭花度呢?雕左條菜蟲係西蘭花度喎,師傅雕功神乎其技,超級勁﹗ 碳燒羊架配黑椒汁,碳燒?完全 feel 唔到,只感覺非常中菜烹調。好兩條全熟羊架,肉嫩而味濃,不過不失,但黑椒汁真係淡而無味。高湯魚翅,湯底真係餚得非常鮮甜香醇,夾雜雞味同火腿味,好香好濃好好味,魚翅頓變成配角。 蝦餃併椰絲椰汁糕,最後一道菜何解如此配搭呢?好怪啊。台式?中式?凍冰冰的蝦餃,皮厚硬,蝦肉假爽,入得口唔難食。舊糕無特別,不值一提。乾蒸燒賣,質感實淨,豬肉彈牙,都合格啦。無鮮蝦、無冬菇、無肥豬肉,中間一點咸蛋黃,用料樸實異常。 魚翅餃,睇 menu 時係完全察覺唔到會係魚翅餃,因為個名實在好難想像得到。食落好似雜菜豬肉餃,皮硬厚乾,無咩特別。水晶蝦餃,我係叫金箔蝦餃架,咁大個仔都未食過金箔,點知比個普通蝦餃我,仲話唔好意思落錯單,之後仲減返幾蚊益我,多謝晒喎,激死我。講得係普通蝦餃,當然係非常普通,有點似公仔牌即食點心味道,您睇睇層皮又重又厚,物超所值,唯一可取係蝦肉爽口,不過係假爽,應該係用鹽醃完再啤水既效果。
評分: 味道 2 環境 2 服務 2 衛生 2 CP值 3
2018-06-20
落雨要困係酒店真係把幾火,room service lunch 就食盡去﹗睇睇個 menu,睇唔明添,艾維養?沛綠雅?人名黎架?海尼根?可樂那?好搞笑呀。 全部 knock out,一個人食晒三個餐,痴左線﹗大食鬼必殺技全開。 餐前全麥包,好香濃麥味,質感嚥嚥韌韌,再加上杏仁片,好香口喎。不過係凍架呢,如果可以用焗爐翻熱就好喇,千奇唔好用微波爐,會破壞原有麵包香味同質感。 傳統牛尾湯,溫度唔夠熱,味道似雜菜湯多過牛尾湯,而且連肉絲都搵唔到條啊,莫講話牛味,連肉味都欠棒,十足似罐頭湯。 肉醬意粉,估唔到依味非常滿意,仲好好食添喎。意粉煮得剛好唔會過腍,口感滑溜彈牙,真係好難得。肉醬跟意粉比例完全付合要求,不多不少,可以每一啖都捲住肉醬同吃。 味道濃郁、有鮮茄味、肉香、調味一點都不馬虎、酸酸甜甜好有層次好豐富,加上幾片硬芝士及芝士粉加量香味及味道,真係食唔停口,依道菜係最先給我全部吞落肚架,好美味呀。 美國肉眼扒配黑椒汁併手切薯,我當然要食 5 成熟 medium rare 啦,外層熱、裡面暖,而且外面要煎得香,裡面要係鮮嫰既紅色就最靚。 第一刀照慣例由中間落刀先,睇睇係 5 成熟,程鮮嫰紅色還可以,但係血水咇晒出黎呢。要攤一攤,焗一焗,讓血水被回吸。師傅烹調技巧不夠,要多加用心。牛肉質感有點韌及乾鞋,食材未算上盛,牛味還可以。 美國肉眼扒配黑椒汁併炸手切薯,手切薯炸透,外脆內夠鬆軟,合格。但落味粉太多,偏咸。沾上黑椒汁一試,立即聯想到大快活,幾乎一模一樣既香味及辣味,快餐店水準。 新加坡海南雞配油味飯送中式例湯,個例湯係雞湯黎架喎。唔係講笑,好飲過傳統牛尾湯多多聲,一飲而盡,好味,仲唔覺有味精,應該真材實料,仲有兩舊滑溜雞髀肉喎,不過最衰唔夠熱啦。 海南雞,都幾淡口,無咩雞味,普通過普通既白切雞,肉質少少嫰滑少少腍,只可以形容為大路滿意唔算鞋,唯一可取係肥瘦適中。新加坡傳統醬油為黑豉油、薑蓉、豆瓣醬,每款都未見特出,麻麻地。 最後到油味飯,第一次配炸蒜蓉,係就係十分香口,但感覺有點膩。因為依家雞肉已經淡口,再加個濃味飯,真係完全食唔到任何雞味喇,放舊雞入口都唔知食緊咩。 似乎現時食評中,始終好食係泰式海南雞飯,由雞肉、香飯到醬汁都互相呼應恰到好處,達到味道最高境界。 台灣牛肉麵,一開波當然係飲啖湯先,湯底免免強強,豉油湯底,溫度都係唔夠熱囉。牛腩夠腍夠鬆化有趙口,但炆得不夠入味。 台灣拉麵味道好麵粉,單調而寡,不及潮州麵般爽口彈牙,不及日本拉麵般彈牙嚥韌。 滷蛋、泡菜、青瓜條及咸酸菜,無咩特別,最後係點解台灣麵要配韓式泡菜呢?原本專登要求提供辣椒油或辣椒醬,誰知來的是唔辣既辣椒豉油,完全無幫助。 德國脆皮咸豬手配薯條,完全唔掂呀,十足係百佳買既咸豬手。其實連骨上好過拆肉,溫度只屬微暖,肉汁流失晒,味道過咸,肉質偏硬,有部份仲乾晒添。 所謂脆皮只做到硬皮鞋烚烚,而且一樣過咸。跟食開正宗德國咸豬手相距甚遠,理應咸香非常,豬肉味香濃,質感幼嫰滑無比,外皮脆而皮層焗得黏膠嚥韌,一切開熱騰騰冒晒煙,正到無法形容。
評分: 味道 2 服務 3 衛生 3 CP值 3
2018-06-20
台灣麻辣火鍋店我只聽諣寧記,因為多年前係電視聽過好多明星介紹過,但美女純維話已不及當年喇,黎太和殿更好,大力推介。 望望個 menu 食物選擇都唔少,滿意既。環境古色古香,嬸嬸哥哥熱情有禮,舒服的服務。 麻辣清湯鴛鴦鍋,中辣試試先。淺嚐麻辣湯,中辣甜美不太辣,香料豐富芬芳,要侍應幫忙加加辣啊。清湯底都係用些大白菜即紹菜、豆皮即鮮腐竹、硬豆腐煲成,清甜可口。 現在已將麻辣湯加到大辣,血紅色既湯,唔好比佢呃到,其實不太辣,跟香港比辣度還差很遠,但係味道好香、好豐富,用多種香料炒成。仲有豬紅同豆腐係任食架,要食幾多有幾多。 豬紅好好味,嫰滑多汁又入味,食左好多舊,越食越想食。硬豆腐不太喜歡,個人鍾意滑豆腐。特級肥牛,牛味特濃,味道微甜,脂肪比例較多,不夠緊緻,不夠平均分佈,口感較實淨,有趙口嗰種。 霜降牛肉,賣相幾好,有一點點雪花,雖然脂肪紋不夠多不平均,如果口感要滑溜,雪花必須又多又密又平均。此牛既口感已比特級牛滑,味道相約,只帶微甜。 魚片,真係唔知咩魚,同香港所謂既魚片好唔同,香港會用大條既鯇魚切片。睇個樣係魚仔,烚完啲魚肉唔會散,口感有點鞋而實淨,味道似雜魚,魚味濃。 海蝦,急凍冰鮮,係香港食慣游水活蝦,有點唔習慣。烚好試試,味道還可以,算鮮甜,蝦肉都夠爽口,比想像中好。當然最好味紿終係鮮活游水蝦啦。 帶子,急凍冰鮮,仲要入晒雪。係香港打邊爐全部都會用活海鮮,所以感覺點都有點怪。烚熟試一試,帶子味濃,都幾好,口感都夠嫰滑,當然比起活帶子還差好遠。 竹笙,爽脆滑溜,索汁能手,要清湯就清湯,要麻辣就麻辣,正。金菇,都係食開既味道啦,爽甜無咩特別。
評分: 味道 4 環境 3 服務 3 衛生 3 CP值 3
|