將軍滷味 (西屯區)

萬人空巷，人頭擁擁，唔洗錢一樣！群情洶湧，非常艱難終於成功購買比錢！


鴨腸心腎肝頭舌頸翼豬粉腸豬頸肉，沒有雞髀雞翼乳鴿原隻鵝原隻鴨牛筋生腸墨魚紅腸，台式跟港式潮式不同。


剛剛到步小試牛刀，大大的逢甲夜市有排食喇！第一站滷味，滷水甜味濃濃，香料味單調而弱，食味不突出，一般平凡，不過不失。


鴨腸、鴨心、鴨腎、鴨肝、鴨舌，滷死不鮮不嫩，感覺似臘味最早期。鴨翼較嫩過一點，豬粉腸豬勁肉最正常似返豬肉。


最好食都係港式潮式滷水，清香脫俗，鮮嫩滑溜多汁，無得頂！

老牌過魚湯 (新興區)

團長推介過魚湯超好味，我當然要試試啦 ﹗可以揀魚頭、魚片或魚腩呢。過魚咩黎架？台灣原名為鮢過魚，香港名為深海大龍躉，舖頭牆上面貼住晒資料啦 ﹗


點解室內有冷氣唔坐，係要坐露天街邊呢？又點解張枱咁細，係都要塞十個人一齊坐呢？坐到離晒枱食野，室內大把位囉 ﹗食到個個身水身汗，唔會係教條麻？我都見到有幾個教徒係室內嘆住冷氣食野，何苦呢？


等左好耐過魚湯都未到，一次過叫 8 碗更係耐啦，而且發現係我地叫完後，突然一輪外賣客殺到，我地堂食咪要等下囉，理解的。


過魚魚頭湯配麵線，望穿秋水終於到步 ﹗熱騰騰輕煙幾縷，索一索香氣處處，聞得到的鮮魚味 ﹗嚐一口熱湯，噢 ﹗好鮮甜呀，沒半點醒味，極濃郁魚骨味道。湯底清徹見底，但魚味霸道，加上大量薑絲辛辣清香，愛死您啊 ﹗


魚皮膠膠黏黏，最喜歡的質感，補補骨膠原，飲完即刻靚左。過魚肉魚味香濃而突出，不能遮掩的魚甜味，質感滑中帶嚼勁，不是香港街市出售既飼養龍躉仔可比，滿分 ﹗


麵線跚跚來遲，已催促姐姐幾次了，魚湯凍左如何送麵線呢 ﹗當然可以送，但唔好食囉。原來麵線都係用魚湯灼架，想象下個湯底灼過大量魚頭魚片魚骨，依家用黎灼麵線，那有不濃郁既可能性呢？


麵絲滑滑，微微彈性，本身已儲存著大量湯汁超水潤，再次掉進湯中直沖入口，甜美非常，好正呀 ﹗但湯已經唔夠熱喇，可惡！


蒜蓉炒 A 菜，即係油麥菜，非常爽嫩多汁，菜甜味非凡出眾，好好味 ﹗


蒜蓉炒通菜，我不太喜歡旱通，真係又硬又乾呢，菜味淡某某又無甜味。


蒜蓉炒蕃薯葉，蒜蓉炒生菜，好味都要每款叫多一碟啊 ﹗清爽濃濃蔬菜味道，蒜蓉添上一點惹味，親眼見到由侍應姐姐係街邊即場新鮮炒起，火紅火綠陷陷聲，鑊氣迫人 ﹗鮮爽可口，簡單美味。


魚卵沙律，師傅話係油爆喎，唔可以做湯，何解喎？阿媽經常用門鱔肝、門鱔卵跟咸酸菜炆門鱔肉架啦。質感乾爭爭，味道好似細個食既小食燒魚片，有股香味，沾上沙律醬帶少少甜味，麻麻地。

胖胖蚵仔包 (新興區)

無無聊聊又夠鐘離開去食晚飯，選址為台南六合夜市食自己，同樣我都唔知咩黎，總之就係上旅遊巴，走呀 ﹗一上車即刻用 headphone 塞住對耳，開盡音樂即刻昏迷，話知您地嘈喧巴閉，瞓醒剛好到步，真好 ﹗


隊友們機動力實在太慢、選擇困難症、豫猶不決，我有點受不了，都係算啦，無緊要。發現新奇食品，蚵仔包 ﹗我好想試呢，決定買幾個到隔離舖頭坐住食。


胖胖蚵仔包，炸既？我以為煎或蒸囉，試試先。外層嚥韌，似 pizza 厚批底，咸味重，香口既。擘開裡面睇睇，開估喇 ﹗


蠔仔肥美不足，蠔味淡得出奇，而且好瘦啊 ﹗餡無咩味道，只靠咸咸的包皮。我諗加上大量豆瓣醬應該會好味少少，整個包內內外外都好 dry。

王朝大飯店-SUNNY BUFFET (松山區)

落雨要困係酒店真係把幾火，room service lunch 就食盡去﹗睇睇個 menu，睇唔明添，艾維養？沛綠雅？人名黎架？海尼根？可樂那？好搞笑呀。


全部 knock out，一個人食晒三個餐，痴左線﹗大食鬼必殺技全開。


餐前全麥包，好香濃麥味，質感嚥嚥韌韌，再加上杏仁片，好香口喎。不過係凍架呢，如果可以用焗爐翻熱就好喇，千奇唔好用微波爐，會破壞原有麵包香味同質感。


傳統牛尾湯，溫度唔夠熱，味道似雜菜湯多過牛尾湯，而且連肉絲都搵唔到條啊，莫講話牛味，連肉味都欠棒，十足似罐頭湯。


肉醬意粉，估唔到依味非常滿意，仲好好食添喎。意粉煮得剛好唔會過腍，口感滑溜彈牙，真係好難得。肉醬跟意粉比例完全付合要求，不多不少，可以每一啖都捲住肉醬同吃。


味道濃郁、有鮮茄味、肉香、調味一點都不馬虎、酸酸甜甜好有層次好豐富，加上幾片硬芝士及芝士粉加量香味及味道，真係食唔停口，依道菜係最先給我全部吞落肚架，好美味呀。


美國肉眼扒配黑椒汁併手切薯，我當然要食 5 成熟 medium rare 啦，外層熱、裡面暖，而且外面要煎得香，裡面要係鮮嫰既紅色就最靚。


第一刀照慣例由中間落刀先，睇睇係 5 成熟，程鮮嫰紅色還可以，但係血水咇晒出黎呢。要攤一攤，焗一焗，讓血水被回吸。師傅烹調技巧不夠，要多加用心。牛肉質感有點韌及乾鞋，食材未算上盛，牛味還可以。


美國肉眼扒配黑椒汁併炸手切薯，手切薯炸透，外脆內夠鬆軟，合格。但落味粉太多，偏咸。沾上黑椒汁一試，立即聯想到大快活，幾乎一模一樣既香味及辣味，快餐店水準。


新加坡海南雞配油味飯送中式例湯，個例湯係雞湯黎架喎。唔係講笑，好飲過傳統牛尾湯多多聲，一飲而盡，好味，仲唔覺有味精，應該真材實料，仲有兩舊滑溜雞髀肉喎，不過最衰唔夠熱啦。


海南雞，都幾淡口，無咩雞味，普通過普通既白切雞，肉質少少嫰滑少少腍，只可以形容為大路滿意唔算鞋，唯一可取係肥瘦適中。新加坡傳統醬油為黑豉油、薑蓉、豆瓣醬，每款都未見特出，麻麻地。


最後到油味飯，第一次配炸蒜蓉，係就係十分香口，但感覺有點膩。因為依家雞肉已經淡口，再加個濃味飯，真係完全食唔到任何雞味喇，放舊雞入口都唔知食緊咩。


似乎現時食評中，始終好食係泰式海南雞飯，由雞肉、香飯到醬汁都互相呼應恰到好處，達到味道最高境界。


台灣牛肉麵，一開波當然係飲啖湯先，湯底免免強強，豉油湯底，溫度都係唔夠熱囉。牛腩夠腍夠鬆化有趙口，但炆得不夠入味。


台灣拉麵味道好麵粉，單調而寡，不及潮州麵般爽口彈牙，不及日本拉麵般彈牙嚥韌。


滷蛋、泡菜、青瓜條及咸酸菜，無咩特別，最後係點解台灣麵要配韓式泡菜呢？原本專登要求提供辣椒油或辣椒醬，誰知來的是唔辣既辣椒豉油，完全無幫助。


德國脆皮咸豬手配薯條，完全唔掂呀，十足係百佳買既咸豬手。其實連骨上好過拆肉，溫度只屬微暖，肉汁流失晒，味道過咸，肉質偏硬，有部份仲乾晒添。


所謂脆皮只做到硬皮鞋烚烚，而且一樣過咸。跟食開正宗德國咸豬手相距甚遠，理應咸香非常，豬肉味香濃，質感幼嫰滑無比，外皮脆而皮層焗得黏膠嚥韌，一切開熱騰騰冒晒煙，正到無法形容。

太和殿鴛鴦麻辣火鍋 (大安區)

台灣麻辣火鍋店我只聽諣寧記，因為多年前係電視聽過好多明星介紹過，但美女純維話已不及當年喇，黎太和殿更好，大力推介。


望望個 menu 食物選擇都唔少，滿意既。環境古色古香，嬸嬸哥哥熱情有禮，舒服的服務。


麻辣清湯鴛鴦鍋，中辣試試先。淺嚐麻辣湯，中辣甜美不太辣，香料豐富芬芳，要侍應幫忙加加辣啊。清湯底都係用些大白菜即紹菜、豆皮即鮮腐竹、硬豆腐煲成，清甜可口。


現在已將麻辣湯加到大辣，血紅色既湯，唔好比佢呃到，其實不太辣，跟香港比辣度還差很遠，但係味道好香、好豐富，用多種香料炒成。仲有豬紅同豆腐係任食架，要食幾多有幾多。


豬紅好好味，嫰滑多汁又入味，食左好多舊，越食越想食。硬豆腐不太喜歡，個人鍾意滑豆腐。特級肥牛，牛味特濃，味道微甜，脂肪比例較多，不夠緊緻，不夠平均分佈，口感較實淨，有趙口嗰種。


霜降牛肉，賣相幾好，有一點點雪花，雖然脂肪紋不夠多不平均，如果口感要滑溜，雪花必須又多又密又平均。此牛既口感已比特級牛滑，味道相約，只帶微甜。


魚片，真係唔知咩魚，同香港所謂既魚片好唔同，香港會用大條既鯇魚切片。睇個樣係魚仔，烚完啲魚肉唔會散，口感有點鞋而實淨，味道似雜魚，魚味濃。


海蝦，急凍冰鮮，係香港食慣游水活蝦，有點唔習慣。烚好試試，味道還可以，算鮮甜，蝦肉都夠爽口，比想像中好。當然最好味紿終係鮮活游水蝦啦。


帶子，急凍冰鮮，仲要入晒雪。係香港打邊爐全部都會用活海鮮，所以感覺點都有點怪。烚熟試一試，帶子味濃，都幾好，口感都夠嫰滑，當然比起活帶子還差好遠。


竹笙，爽脆滑溜，索汁能手，要清湯就清湯，要麻辣就麻辣，正。金菇，都係食開既味道啦，爽甜無咩特別。