鹿港海鮮總匯 (梧棲區)

天公不造美，香港遠道而來想欣賞高美濕地夕陽，不幸陰天微雨，使到心情低落，兜個圈就沿海旁向鹿港出發。


還以為可以由高美濕地步行到梧棲鹿港，原來不可以的，最終要在馬路跳上的士前往，路程都非常遠，看地圖似好近。


熱血嬸嬸們服務周到，笑面迎人，熱情如火，進取積極，渾身是勁，敬業樂業，真係好 warm 呢！接待、落單、推介、上菜、埋單，全部高水平，食得開心愉快。最衰食店沒有洗手間，要走出外面使用公廁呢，不方便。


喜力，死力、阿里山、海尼根？非常有趣的啤酒名。其實唔多睇得明點菜子，極具娛樂性，現流、雞佛、紅蟳、螳螂蝦、吹大蛤、喜相逢、龍珠？大量菜色都想食，教我如何是好？


椒鹽墨魚咀，台式跟港式非常不同，鹽酥來的。炸得香口散發沉實咸香，厚厚鬆化外層包著爽脆墨魚咀，墨魚味濃郁，如果有喼汁就更好喇。


漁村炒春菜，第一次食這種食材配搭，肥肉絲、銀魚仔、蔥頭、蒜頭、辣椒，非常有新鮮感仲要堅好食喎！肥豬肉甘香，銀魚仔咸咸魚香，跟春菜猛火兜炒香噴噴，鮮嫩翠綠爽甜多汁，捲晒所有配料一齊食，極惹味可口。


薑蔥炒蟹，台式別具一格的調味，只用少量薑絲蔥段，廣東就會勁多薑勁多蔥會更香口惹味。鑊氣有點削，幸好蟹肉鮮甜彈滑，加埋甘甜硬膏，依舊美味。


鹽燒東風螺，大大隻啖啖肉，鹽香清爽開胃，熱辣辣爽彈螺身、棉滑螺尾，高質多汁無得輸！


燒生蠔，師傅有料識得不開原隻燒，燒到爆開就食得喇！非常燙手，小心地揭開蠔蓋，鮮蠔味撲面而來，氣味芬芳，食慾大增。肥美脹卜卜，外乾內濕，一咬暴汁，鮮蠔味極濃，食極唔厭。


鹽煮活蝦，我要蒜蓉蒸開邊蝦喎，落錯單呢。明爐上檯非常另類，鮮夠鮮、香夠香，不過太過熟咯，蝦肉硬實，味道就不錯。


炒米粉，變左鹵肉撈米粉既？米粉沒什麼味道，撈埋淡口滷肉都係麻麻地。

金饌魯肉飯 (大甲區)

小豆遇上媽祖出巡打鑼打鼓非常熱鬧，興奮莫名地衝到街上拍片拍照，狀甚歡樂心情大好，我見到都非常開心欣慰。


街上擁著大量善男信女，菜餚已到齊，等待小豆回來共享美食。簡樸的裝潢，十分台味。望望點菜紙，魯肉？不是滷肉嗎？飛到台灣食正宗滷肉飯，應該魯肉才正確嗎？第一餐，貪心的我依舊樣樣都想食，十分困擾呢！


金饌魯肉飯，估不到味道反而比香港淡，香口非常的肥豬肉鬆，爽爽肥膏併嚥韌瘦肉，醃味淡淡然的甜味，較乾身及少汁，撈飯有一點點不夠滿足。白飯香味一般，食味偏軟，沒有追食的衝動。


鮮肉雲吞湯，雲吞有著濃厚大陸的影子，肉少而大大塊雲吞皮，一丁點的豬肉鮮甜滿意。湯底十足香港的台灣米線味道，清香飲得下，但有點油膩。


日式甘黃金豬扒飯配咖哩汁，黎到台灣食地道菜色為何點日菜咁奇怪呢？薄衣衣的炸豬扒，麵包糠味濃烈，燶燶地脆脆的又刮刮地口，脆到索索聲，不太食到薄切豬扒。


即食日式咖哩甜而不辣可以的，配台式滷蛋好有趣仲有豆角及粟米飯。滷蛋好好味啊，比豬扒更好食，配飯一流。豆角爽帶甜有點渣，爽爽的不過差少少，都合格既。精釀碳焙烏梅汁，根本同洛神花撈西梅一樣味道，清爽微甜，非常清涼降溫。

黃金左腿 (西區)

係逢甲夜市兜左幾個圈，硬係搵唔右髀，到底您躲在那裡啊？行左幾兩街見到兩間都係左腿，滿身大汗，是但照食啦！


靚豆見到狗仔即刻衝去同狗子玩，仲同狗主合照、交換養狗心德、連 Facebook 都交換埋，傾到完全忘我狀態，唯有讓她慢慢傾，我自己去買雞髀啦。


黃金左腿，寫住轟炸香腿王，係咪堅架？買完飛還要耐心靜候幾分鐘，見師傅掏出已炸好的雞髀加工調味，包裝美觀後出貨。


我不喜歡行住食野或企係街邊食野，立即跳上的士返溫泉酒店開餐啦，非常期待啊！起動！打開盒子見到有塊芝士黏住炸髀，索一索炸味加芝士味飄香，豪氣咬落去連皮帶肉扯出，汁液四濺，嘴嚼數秒細味，濃濃 pizza 味道強烈，腍劈劈的皮肉，質地濕潤，我都唔知食緊什麼，炸髀嗎？似慢焗雞髀，十分失望。我係要黃金右腿真炸髀，要金黃鬆脆皮香肉嫩的炸髀呢。

康寶藥膳養生 (南屯區)

在逢甲夜市周邊逛著逛著，突然一陣強烈芬芳氣味湧來，香噴噴呢！我地即時跟住氣味，到達康寶藥膳，應該係依間掛，殺入舖內坐低點菜。細看點菜紙，其實都唔多明白什麼菜色，是但靠運氣吧！


藥燉排骨，趁熱淺呷幾口，依隻咪係眉豆排骨湯？豆味突出，淡淡然的肉味，飲不到什麼藥材。咬啖排骨，不鮮不甜亦不嫩，乾鞋硬到齊。到底剛才香噴噴的氣味在那？應該不是康寶藥膳，我地入錯屋喇。


麵線配純花生油，同樣不明所以，無緊要照食。花生油淋麵線再撈辣椒醬意想不到勁可口美味喎！好爽口，好香口，好嫩口，惹味微辣醒神，還以為會腍劈劈無味的呢。齋麵都比排骨湯好囉！

日船章魚小丸子 (西屯區)

只賣鱆魚燒都排到人山人海，觀音開倉派錢一樣，必定好食啦！我又趁下熱鬧先，其實我不太喜歡企係路邊食野，人多車多、沙塵滾滾、空氣污濁。不過入鄉隨俗，間中無緊要。先排隊比錢買票，再排隊攞鱆魚燒，感覺要排兩次隊，感覺不良好。


鱆魚小丸子，妹妹師傅功架十足，熟練的手腕彷似表演一樣，好好睇啊！倒倒倒倒、派派派派、挑挑挑排、翻翻翻翻、起起起起，落埋紫菜、醬油、沙律醬，得左！


新鮮出爐勁燙手呀，搵個位置攝埋一邊品嚐，到處都係人、到處都係渠蓋，是鬼但當睇唔到！巨形鱆魚燒，小小亦亦咬啖先，即時噴煙滾熱辣香噴噴！何解可以好食到如此離譜，色香味美，比香港比日本既都要更好食，無得頂！


焦香微脆的表皮，爆開出現流心醬，包住原粒鱆魚肉，鮮味濃郁散發咸香，配上開胃甜酸汁錦上添花，一口氣消滅全部大丸子，好滿足！