丸作食茶 (西區)

雖然香港都已經有分店，兼試過好幾款，但行過又冇理由唔飲下，台灣呢邊買平一半有多，兼當日慶祝勤美店試賣 ，所以全線飲品都有9折。
餐牌供應原茶、手沖茶、果茶、奶茶、特調等，定價NT20-85，甜度冰度自選，珍珠可加錢配，但唔同款式價錢有別，加NT10/20。
Menu基本上同香港嘅一樣，只係某部分飲料改左個比較台式、文青嘅名字，例如【一日時光】、【匆匆那年】…
輕慢旅行 NT45 (原價NT50)
好明顯係揀名 多過揀茶(笑) ，其實佢係白桃烏龍手沖茶，手沖茶同原茶唔同 ，前者即時沖泡， 價錢比原茶高一半。
原本想加下珍珠 ，有啲野咬下， 但店員話手沖茶唔建議加配料。大約13蚊唔洗，點都係抵飲。
剛好同戰鬥女子學園合作 ，所以我地要左呢款熱飲杯 (裡面當然是凍飲) 
點左微糖，第一下入口桃味都幾出， 但再飲就開始淡 完全唔甜嘅，始終係即時沖，烏龍茶味未有好濃。

50嵐 台中美村一店 (西區)

50嵐供應原茶、拿鐵、多多、奶茶系列等，定價NT20-70，冰度甜度自選。
買中杯裝超過NT30，加珍珠、波霸係唔加價。
青茶瑪奇朵 NT30/L
甜左少甜，同KOI嘅一樣，瑪奇朵指嘅係鮮奶油，類似奶蓋層。晚上人唔多，等左幾分鐘，點嘅中杯size。
鮮奶層竟然超過1/3杯，誇張入口順滑，但唔夠稠唔夠綿，雖然點左少糖，但鮮奶油都係太甜
飲兩口有點膩，只好盡量大啖啲飲，務求沖啲茶上黎。 
青茶色澤較淺，茶味清澀，冇乜點擔心過台茶唔夠茶香，只係奶太甜。

杏甜 (北區)

呢間杏甜我好記得，因為喺香港某甜品店食過類似的甜品，感覺踩雷了。
然後見到台灣的iger介紹【杏甜】，於是我即刻存下來，想著假如以後黎台灣一定要試試呢間。


雖然新式甜品有好很多，千層、布丁、戚風等，但傳統野不少得，唔食下仙草、芋圓都對唔住自己，台灣食嘅價錢確係平啲，質素一般都不錯。
由【萬客什鍋】步行過去杏甜都唔算太遠，可能係平日啦，店內客人唔多，裡面有十幾個座位，小店以黃色為主調，感覺係成條街較新式、搶眼嘅店，所以我地老遠已經睇到。

餐牌供應豆腐冰、 雪花冰、甜湯、飲品等，選擇唔算多，但有我地最想食嘅冰品就可以了。


豆腐冰共有5款口味 包括杏仁、抹茶、芋香、鮮奶、鴛鴦，配上珍珠/紅豆/綠豆/薏仁/芋圓/地瓜圓/粟米片/大甲芋頭，定價NT40-55。
原本想跟風點抹茶豆腐冰，但剛巧抹茶豆腐酪沽清，最終揀左鴛鴦。

鴛鴦豆腐冰 配珍珠、芋圓、地瓜圓 NT55
以剉冰加上手作豆腐酪、配料製成，賣相很美。剉冰較清淡，唔會加左好多黑糖水，既清涼又唔會太甜。
鴛鴦豆腐酪啡啡地色，係咖啡、紅茶混合，淡淡茶香，口感滑溜珍珠偏腍身，唔係平時我地飲台茶嘅煙韌口感。
芋圓、地瓜圓大大粒，分別有4粒，因為冰過，食落會實少少，再加強彈性會更好，但各自嘅芋味、地瓜味都明顯，尤其是後者。


杏甜有三款甜湯，按季節轉換，冬天有紅豆湯圓及燒仙草，所以第二份我地按店員推薦，點左燒仙草，推薦啊
燒仙草 NT45
除左燒草，裡面仲有配料：紅豆、綠豆、薏仁、芋圓、地瓜圓。
配料份量好足啊，接近同仙草1:1。仙草味道同香港食到嘅唔同，好台灣古早味，即係嗰種罐裝仙草嘅味。
加熱後好暖胃，口感滑溜，個人認為比剉冰更值得試 紅綠豆份量多，煮得夠綿；薏仁軟硬適中。
比較驚喜係芋圓同地瓜圓啊，雖然同剉冰一樣，都係嗰啲圓s，但可能因為加熱過，口感煙韌Q彈得多，而且味道再突出啲

萬客什鍋 漢口總店 (北區)

黎到台灣，唔少得要食燒肉同火鍋，價廉物美嘅選擇一樣有。萬客什鍋主打石頭火鍋，係有超過廿年歷史嘅老字號火鍋品牌。現時喺台中有兩間店，準備開第三家。係唔少當地人嘅深宵食堂，因為火鍋店營業至凌晨四點。不過食萬客，要好有耐性、快人一步，皆因佢地不設訂位，每晚都有長長嘅人龍啊漢口店面積細，位置較少，裝潢冇乜特別，佈局係一張U型大枱，裡面有兩位店員負責招待。全店約有20個位，因為呢度採用一人一鍋模式，所以每個位都有一個爐，而枱面上已有沙茶醬、雞蛋。 


餐牌供應石頭鍋、燒酒鍋，以套餐形式配上豬、牛、羊、烏雞、海鮮等，鍋底連配料定價 NT298-528，附飯/冬粉，價錢實惠點選燒酒系列仲會配上高麗菜盤，亦可加NT58升級基本菜盤。  鍋底有十幾款，每款價格差異很少，樣樣都想食，左計右計，比較煩係餐牌未有圖文並茂，海鮮份量未有列明，所以引申選擇困難症，我地最終點左一個燒酒鍋、一個石頭鍋。 


萬客燒酒大草蝦鍋 NT450
燒酒鍋人手調製，店員會加入一樽燒酒、藥材包，再大火煮滾，燒乾後酒味唔會好重，反而有藥膳味，容易入口。可能因為咁，好多人都推薦呢度嘅燒酒烏雞鍋，特別天氣冷，食完暖胃。大草蝦鍋有6隻大蝦、十幾隻蛤蜊，大約港幣百零蚊包湯底、海鮮、菜盤 、飯，其實都抵食。



如果鐘意食海鮮，建議點海鮮總匯鍋 (NT488)，俾多幾十台幣，款式多出一截，除左草蝦、蛤蜊，仲多左天使紅蝦、凍白蝦、鮮蚵、鯛魚、魷魚。蛤蜊吐沙乾淨；草蝦好大隻，新鮮爽口，性價比很高呢



石頭嚴選雪花牛火鍋 NT358/6oz
石頭鍋嘅湯底較燒酒普通，加啲鹽加啲蒜頭製成，所以大部人都點燒酒鍋的。
配上嘅雪花肥牛雖然唔係話好靚好正嘅牛肉，但質素都唔差，薄切入口唔老唔柴



基本菜盤 +NT58
原本點燒酒鍋都會附上一份高麗菜盤，但我地見升級基本菜盤都唔貴，所以都升級左，估唔到幾超抵食。而且上鍋後，會先上菜盤，可以先菜後肉。裡要有粟米、木耳、椰菜、菇菌、蟹柳、南瓜、豆腐、丸餃，做成一人份量，椰菜份量大方，所以有9成人都會升級。



王子麵 +NT12 
本來點鍋都配上白飯或冬粉，我地加錢升級王子麵，其實即係類似烏冬，食落煙韌。

起司爆口牛肉丸 NT88
因為第一次黎，怕每人一個鍋都唔夠飽，於是都多點左幾款配料，所以食到肚撐。不妨先睇睇份量夠唔夠，先決定需唔需要追加。
牛丸被掏空大部分，注入嘅芝士自然量多，確有流心效果，但只有三粒，有點貴。




老油條 NT45、九層塔花枝丸 NT45
油條普普通通；花枝丸都算幾彈牙，但唔點都唔會覺得有損失。


總括而言，食過呢餐，都明白點解喺咁多「吃到飽」火鍋店嘅情況下，萬客仍然一直都咁受歡迎。
特別係天氣冷時，因為呢度價錢唔貴，有相當質素，特別係海鮮類，性價比高

台茶一號 沙鹿站前店 (沙鹿區)

台茶一號喺台灣都有好多分店，本來未聽過，亦都冇話特別要試，只係我地去到沙鹿區，睇睇美仁里彩繪村嘅時候，臨走前覺得有點口渴，而見到有呢間店，先試下。餐牌供應原茶、鮮茶、拿鐵、奶茶、薑汁系列等，飲品定價NT20-60，甜度冰度自選，可加錢添配料例如粉圓、仙草等。原本我地想點仙草凍蜜但賣哂，次選係烏龍拿鐵，結果冇烏龍(哭)，退而求其三，揀左觀音拿鐵加NT10配芋圓。


芋圓觀音拿鐵 NT60/L
觀音拿鐵味道普通，茶味唔濃，主要係奶，但未見清晰漸層，可能製作時已混埋一齊。
添加嘅芋圓佔1/5，同KOI嘅size有啲相似，再細粒啲，呈方型，口感較實，芋味只有好淡，以NT60實在有太多其他選擇。