Café MUJI (信義區)

離開台北嗰朝早，小肥原本想去新光三越A11內某家卡通主題咖啡屋度食早餐嘅，無奈去到先知小店根本冇位坐。因時間有限，一行七人唯有急忙地喺商場另覓餐廳，幸好一上到三樓就俾眼利嘅姨長發現有間「Café MUJI」。家人對「無印良品」都非常熟識，亦好有信心，故唔洗多諗就入咗去搵位。意外地，店子樓面頗高，四周木造嘅間隔及傢俬嘅感覺極之溫和舒適，食客可隨意翻閱架上嘅雜誌刊物，輕鬆寫意得很。餐牌只有中文版。甜品款式則附有彩圖參考。落好單，俾哂錢後，友善客套嘅服務生隨即準備餐飲並續一呈上。餐具及開水均設於一旁供食客自助提取。冷手沖濃縮咖啡歐蕾（NT 100/大杯）：咖啡歐蕾香滑冰涼。蜂蜜烤雞芥末醬三明治（NT 200/一份）：即叫即烘嘅蜂蜜烤雞芥末醬三明治底層塊麵包鬆化香脆，雞件厚潤惹味。檸檬糖霜磅蛋糕（NT 70）：反而檸檬糖霜磅蛋糕就偏乾同硬，最為失色。「Café MUJI」光鮮企理，服務生溫婉體貼，早市套餐質高抵食，咖啡又夠濃滑，實屬簡單早餐嘅好去處。

欣葉食藝軒 (信義區)

去台北玩咗咁多次，XO仔印象中最好食嘅台菜應該係兒時同婆婆喺「欣葉」食過嗰一餐，不過邊間分店就真係唔記得啦！碰巧今次長輩們要求食台菜，細佬第一時間就諗到可以回味一吓，所以就揀咗「欣葉食藝軒」黎試。餐廳位於台北101辦公大樓嘅八十五樓，第一次去原來都幾複雜，因為入口唔易搵，兜黎兜去後又要轉升降機，搭前仲要過埋保安區添。店子紅黑嘅正門及鯉魚牆均滲出時尚又傳統嘅中國色彩。進入大廳即見到台北101嘅畫品，道明分店嘅特色。網上訂座，流程簡易清晰，對應部門嘅同事遇上問題少男都好有耐性地續一解答疑問。除咗要收取訂金之外，部份菜式必先預訂，而且規定每位客人基本消費為NT 1,080，另加一服務費，如要選坐靠窗位置，基本消費就會高少少。當日因席上有畏高人士，故選擇咗不靠窗位置，真係冇諗到十二人會被安排入座內廳高咗半級嘅開放式廂房內，私人空間足，厚墊椅櫈又夠舒適大方。飲品牌共有兩頁。食物方面，午市有兩款套餐可選。散點項目則有十二頁之多。因細佬早以電郵訂下大部份招牌菜，用餐前只需加多幾味就已經好夠食。衣著整齊嘅服務生大多客套有禮，不過如果可以友善地加返啲笑容，相信感覺會更良好。餐桌上有齊備嘅餐具，整潔衛生。炸牛膀薄片（免費贈送）：唔講真係食唔出第一碟免費小食係牛膀所炸出嘅薄片。金黃閃閃嘅炸牛膀薄片好比薯片般巧薄香脆，食落清香得黎一啲都唔覺熱氣，實屬驚喜之作。醃提子（免費贈送）：小肥冇試，不過長輩們都大讚醃提子味道好得意同好開胃。辣豆乾（免費贈送）：小食中以此味辣豆乾最為惹味醒神。花膠佛跳牆 （必先預訂；NT 550/一份）：睇戲時就聽得多，但XO仔咁大個人都係第一次食佛跳牆，故亦十分期盼。如相所示，佛跳牆盅面有塊大大嘅花膠，NT 550黎講絕對足料，可惜以用排骨及雞所煲製黎講，個人就略嫌淡淡嘅湯底唔夠濃甜，就好似煲得味夠火候，佛祖點都跳唔過幅牆咁。麻油腰花（必先預訂；NT 450/份）：請留意，下圖中之份量為兩份麻油腰花。色澤濃厚嘅湯中每件豬腰均爽厚震撼，其質感脆口之餘仲好夠潤滑，絕對冇話煮到過熟而縮哂水，必吃推介也！食藝軒冷三拼：三色拼盤包有烏魚子、五味宜蘭鮑、白切嫩土雞。每份拼盤單價為NT 960，但份量唔得平均，要十二人都有得分黎食的話，鮑魚為NT 150/隻、烏魚子NT 90/片、白切嫩土雞NT 420/份。三款冷盤都可以用個「乾」字黎形容，明顯唔係細佬杯茶！最重口味嘅烏魚子又咸又嚡又乾；白切土雞欠缺光澤，咬落一啲都唔嫩囉，就連雞皮都唔潤；鮑魚厚身得黎又硬又韌，不吃也吧。煎豬肝（必先預訂；NT 320/份）：睇相都睇得到每件豬肝好夠厚肉，外表亦好夠油潤，無奈食落口微爽得黎有啲硬同粉粉地，似係用火過猛，引致初期肝硬化嘅跡象，勁嘥料！蚵仔煎（NT 380/份）：台灣名菜個煎蛋底外觀好夠金黃吸睛，但就敗在蚵仔唔得肥嘟嘟，加上搵蔥易過搵蚵仔，NT 380絕對有搵笨之嫌！活處女蟳蒸米糕、活處女蟳蒸米粉（必先預訂；NT 1,380）：蟹品菜式必先預訂，可選米糕或米粉作底，伴配藍色醋汁。小肥因敏感問題未有食用，故只能同大家分享靚相。酥炸花枝丸（NT 70/粒）：圓碌碌嘅花枝丸色澤就夠光亮，入口卻過份軟腍，唔得香口鬆彈，甚為失色。香檳茸炒時蔬（NT 420）：反而香檳菇炒菜芳香爽脆，幾夠鑊氣。蒜香牛菲力（NT 720）：已熟透嘅牛菲力粒粒厚韌老嚡，加上肉汁欠奉，真係食唔過！櫻花蝦高麗菜（NT 350）：高麗菜新鮮清爽，簡單以櫻花蝦點綴已夠惹味。招牌杏仁豆腐（必先預訂；NT 120/碗）：招牌甜品杏仁豆腐清香嫩滑，微甜易入口。環境雅致時尚，開揚舒適，可惜服務生之態度及經典菜式之質量甚為參差，遠不及回憶中嘅味道，或許名店進化咗嘅口味較迎合其他遊客喜愛吧，請恕肥肥家族不懂欣賞。

允壽司 (大安區)

去台灣玩，除咗要食台菜、小籠包、火鍋之外，家人例必要食餐日本菜；有心要為親友嘅飲食日誌增添驚喜，XO仔今次就好大擔咁喺互聯網上挑選咗間唔係咁多人認識嘅「允壽司」。壽司屋隱蔽於窄窄嘅單程橫街內，雲石閃光嘅門面新潮得黎甚為低調。餐店面積不大，右方為師傅嘅大舞台，面前排出十二個吧位，以透光嘅雲石小牆分隔，貴氣得黎不失時代感。牆上掛上以毛筆寫出店名中大大個「允」字，充分地表演出中國書法藝術嘅氣勢。網上訂座流程簡易快捷，可慳返長途電話費之餘，小肥又唔洗講國語，對話有哂記錄唔洗驚會誤解，十二人包場仲可以一早訂下NT 3,500/位嘅精選午市套餐，並道明團友們有啲咩特別飲食要求及敏感問題。掌舵人小穎師傅相當好客同細心，用餐當日先確認同行邊幾位長輩只能食熟食，及邊個係有超多食物敏感嘅XO仔，態度絕對認真！
食物全權由師傅安排，清酒就由識少少扮代表嘅小弟揀咗樽果香及花香味討好嘅「澤姬純米大吟釀」（NT 3,800）。餐桌上有齊備嘅餐具、醬油及熱茶，整潔衛生。伴配魚生嘅青瓜、蘿蔔及靚薑全為師傅自家醃製，均爽脆醒胃。為午餐打響頭炮有開胃小點「鮑魚豆腐沙律」。沙律以幼嫩嘅豆腐、腍潤嘅鮑魚、清爽嘅無花果、鮮爆嘅三文魚籽及麻醬所混製而成，組合新穎獨特，集齊爽嫩脆腍，口感極之豐富，以葫蘆碟仔承載更覺精緻矜貴，當真令人期盼接下來嘅菜式。自己都係睇返相先留意到，接棒一系列嘅刺身好有文化地係由淺色食到深色嘅。第一道魚肉透光嘅「真鯛二重奏」以黑碟呈上，睇得出師傅喺視藝上都花下不少功夫。兩片銀光閃閃嘅真鯛上分別擺放咗雪白嘅白蝦仔及橙黃嘅馬糞海膽，建議連同山葵及黑色嘅昆布碎花續件捲起一口食落肚。下方件白蝦真鯛卷清香軟嫩，上方件海膽真鯛卷則鮮濃甜美，真鯛卷中嘅昆布碎花所散法出嘅咸香慢慢滲進味蕾，感覺就好似舌尖喺沙灘吹緊海風咁，何其妙哉！玩完DIY真鯛卷後，面前就出現咗兩件無添加嘅赤貝及間八刺身，輕輕點上山葵豉油已夠清甜芳香，這個返璞歸真嘅對比舖排突顯出後者嘅清麗脫俗，同時亦反映出設計者嘅心思細密。接著厚厚嘅中拖羅刺身色澤粉嫩油潤，同伴配嘅淮山及昆布半溶於口腔。見外出天氣有點寒冷，小穎師傅好體貼地叫廚房先蒸出鮮甜暖胃嘅「蟹肉茶碗蒸し」作為壽司環節前之間場菜。大廚事先講明六款壽司均已調好哂味，味道編排由淡至濃。第一件深海池魚壽司爽厚潤澤，清香肥美。寒鰤魚壽司軟嫩甜潤。右口魚壽司用火槍輕輕燒過，魚肉幼嫩滑溜，魚味更為鮮濃突出。以紫菜包住嘅燒帶子外層香脆，帶子肉厚鮮嫩。相信整頓午餐製作最複雜嘅都要數件「昆布鯖魚壽司」，因為要由兩位師傅合作切割魚片、於木盒上舖砌食材、擠壓木盒、包紮成卷物、再添置調味，每個動作都一樣咁乾淨俐落，實在另人嘆為觀止。昆布鯖魚壽司大大件咬落去好爽厚，當中最濃郁就係個昆布味，食食吓又傳出陣陣嘅紫蘇香同柚子香喎，確真細膩得很。大拖羅壽司粉裡透白，其鮮香甜美盡化於舌上後，吃畢仍齒頰留香，令人回味無窮。真係估唔到壽司屋除咗有高質嘅魚生之外，連熱食都絕不失禮！午餐所包有嘅天婦羅三品用上源自日本嘅北海道洋蔥、北海道粟田、白子炸製，聽落都覺得名貴得好有驚喜！三款金黃乾巧嘅天婦羅層炸皮香脆鬆化，以竹籤串起嘅北海道洋蔥爽潤惹味、躲於洋蔥下嘅北海道粟田亦爽甜多汁。第三件白子因有紫蘇葉包住，所以炸物就透出綠色。此道紫蘇白子天婦羅芳香脆皮，中間嘅白子柔潤白滑，且軟嫩非常，輕輕黏上碟邊嘅咖哩鹽粉即能提升鮮香。壓軸上場嘅「海膽拖羅手卷」由師傅以「心連心」嘅方式續條直接轉交到貴客嘅手上，確保新鮮又窩心。橙美嘅手卷鮮甜無比，外脆內香嫩，爆呀！甜品「黑糖粉抹茶麻糬」細細杯嘅份量啱啱好，麻糬煙煙韌韌，當中嘅黑糖味微甜且不溜滯，可口味佳。飯後一杯暖胃嘅特濃咖啡剛好為午宴畫上完美嘅感嘆號！「允壽司」環境簡樸時尚，師傅們及服務生態度誠懇且細心周到，午市精選套餐用材高質，魚生及熟食美味之餘，更滿載驚喜，絕對值得一試再試。

真芳碳烤吐司紅茶牛奶 (信義區)

每次外遊細佬最怕就係食酒店嘅自助早餐，所以除非係房費包咗，XO仔盡量都會去訪尋區內嘅小店。多得近年網上流行分享飲食日誌，令團友們有緣遇上街坊熱店「真芳碳烤吐司紅茶牛奶」。店子嘅招牌上寫明創辦年份為2015年，咁都幾新吓喎。門前有個寫出招牌菜式嘅黑板。玻璃門上清楚道出營業時間為每天早上六點半到下午一點半，明顯只做早餐及午餐。店內面積不大，木地板上只有四張木造餐桌，配上好街坊嘅圓櫈仔，望落都好乾淨企理。四周亦有不少聖誕及可愛佈置，場內氣氛倍添溫馨。大概六人嘅樣子也太外省了，所講嘅國語又充滿著口音，在場年輕嘅服務生都估到大家對點菜流程不太熟識，所以安排好座位後，即好客地介紹餐牌上嘅項目，並友善地告知要先喺收銀處點選食物及付款後，食物準備好就會續一呈上。兩頁彩圖餐牌相當詳細，真係估唔到喺台北食早餐都學識唔少國語用詞，例如「吐司」係「多士」、「起司」等同「芝士」咁，非常有趣！落好單，俾埋錢，先有清晰嘅單據一張，原來餐店並無設加一服務費嘅。呵呵呵，講個笑話俾大家笑吓先！話說姨丈叫咗杯「熱真芳紅茶」（NT 45），眼見熱飲被透明膠封實飲唔到喎，佢居然用手撕開塊膠黎飲。。。同桌嘅長輩其實都唔係好明小肥點解會笑爆咀，冇計啦，唯有等自己杯「冰紅茶牛奶」（NT 45）上枱時先玩真人示範。原來台灣嘅「冰紅茶牛奶」亦即香港嘅「凍奶茶」，凍飲香滑醇濃，絕不比港式絲襪奶茶遜色。豬肉蛋起司（NT 60）：「豬肉蛋起司」每客有兩件。得悉團友們有意分黎食，姐姐仔仲好客氣地免費幫我地一開二後再開四，實在太周到啦！豬肉蛋起司嘅兩塊多士好鬆脆，夾喺中間嘅豬肉、蛋蛋、芝士餡又夠惹味爽潤，掂呀！真芳三明治（NT 90）：「真芳三明治」其實係以豬肉蛋起司作基礎，面底另加兩層薯仔南瓜沙律，要留意嘅一點係內含花生醬，好似細佬咁有敏感問題就唔食得啦。起司起司蛋（NT 50）：顧名思義，「起司起司蛋」主材用上兩款車打芝士及水牛芝士，並加上煎蛋，孖芝蛋三文治香濃鬆軟，簡單可口。真芳蛋餅（NT 30）：姐姐仔推介嘅真芳蛋餅外表有啲似薄罉，但個蛋餅係軟腍腍嘅，入面有韭菜、蔥、同蛋蛋，濕潤得黎咸咸甜甜咁，都幾得意。NT 30絕對係又平又正，結果當然係要追加啦！
姨媽仲非常捧場地花生醬都買埋返香港做手信添。只開早、午市嘅「真芳碳烤吐司紅茶牛奶」位於靜寂嘅橫街上，小店簡潔企理，服務生體貼入微，可謂溫馨洋溢，加上奶茶及三文治即叫即做，新鮮熱辣又美味，價廉物美，個人誠意推介。

小樽手作咖啡 - 新光三越A11店 (信義區)

入住信義區嘅酒店，最方便就係購物，其中肥肥家族最愛於新光三越濕平，因為商店種類及款式最啱心水，而且更可即時辦理退稅手續。此外，台北商場最不缺乏咖啡屋，今次就俾姨媽們發現新光三越A11館內有間來自日本北海道嘅「小樽手作咖啡」。小店以木為主嘅裝潢十分簡潔，服務生亦相當友善。吧位配上小枱燈嘅設計令氣氛更為輕鬆寫意。五頁餐牌均附上詳盡解說及彩式插圖。多款飲品中，外型最普通就係杯「凍小樽秘制煉乳調和珈琲」（NT 140），不過凍珈琲香醇甜美，而且滑溜非常。姨丈所點嘅「爵士炭燒珈琲」（NT 140）即叫即燒，芳香洋溢。最可愛必選靚靚媽咪及姨媽們所點嘅「橘皮風味拿鐵珈琲」（NT 140）及「沖繩黑糖拿鐵珈琲」（NT 140），因打起嘅奶奶泡沫為立體嘅史努比及其他卡通模樣。商場咖啡店「小樽手作咖啡」環境簡潔企理，即叫即調之手作珈琲造型可愛，芬芳味佳，實屬打卡熱點也。