雞家莊 (中正區)

喺日本一個禮拜主要都係食和牛同海鮮，深知姨媽最愛食雞，所以喺台北食嘅第一餐就搵咗間雞雞專門店「雞家莊」。據悉新店易搵位啲，為怕同行嘅七、八旬長輩要等位，初次到訪就棄選母店，先試「雞家莊六條店」。地舖於街道上閃出金光，右邊可見雞群烘住幾款招牌菜式嘅靚相。左邊則吊出多隻不同色澤嘅雞雞。用餐大堂嘅紅白半磚牆滲透著傳統中國風彩，光線充裕，衛生企理，餐桌與餐桌間夠距離，空間感足。XO仔自知國語發音唔係太標準，避免發生雞同鴨講嘅情形，故早已做定功課諗定叫乜兼寫定紙仔，姐姐仔見狀明顯感到意外，不過微O嘴後即以手指公回應。三味雞（NT 800）：顧名思義，招牌雞由三款口味嘅雞雞合拼而成，包括橙亮嘅燻雞、黃皮嘅白斬雞及黑皮嘅烏骨雞。色澤不同嘅三味雞油光閃爍，脂肪唔多，肉質都好軟腍，最意外係烏雞啲肉唔嚡，依個價錢絕對唔應該挑剔，只係自己食過更嫩滑嘅而已。姨丈就勁欣賞拌碟嘅酸菜，大讚咸酸中帶著爽甜，比雞肉更有特色。雞飯（NT 50/位）：原來「雞家莊」嘅雞飯同平時跟海南雞嘅油飯唔同，熱辣辣嘅雞飯係用雞湯煲煮而成，清香不油膩。收費係人頭計，偷聽到隔離枱話可以無限添加，不過八人分咗四碗都差啲食唔哂，建議大家可以先二至三人分一碗，唔夠先追加。蔭豉蚵（NT 398）：粒粒脹爆嘅蚵仔鮮嫩肥潤，以豉汁蔥粒爆香已夠惹味，經典台菜冇得輸。沙茶豬心（NT 420）：淨睇餐牌未必會點，多得食家網友極力推薦先膽粗粗一試！貌似炒牛肉嘅豬心片得好夠薄身，咬落爽脆Q彈，熱辣夠鑊氣，個人覺得比招牌三味雞美味得多，必吃也！雞家豆腐（NT 298）：鎮店名菜之一嘅賣相可愛吸睛。大大隻公雞外表十分剛強，砵中嘅豆腐卻幼嫩滑溜，混入其中嘅雞肉碎都一樣軟嫩，微微嘅辣勁提神醒胃，撈埋落個雞飯度食尤其芳香。木耳水血（NT 298）：「雞紅」喺台灣叫做「水血」，喺雞雞專門店梗係要點黎試吓啦，話哂日日劏咁多隻雞，啲雞血應該最新鮮。連相都影得出厚厚嘅水血光滑尤甚，學二叔話齋，滑到唔洗咬已經可以直吞，唔嚡兼冇渣，伴入脆巧嘅木耳即為口感添上層次。脆皮腸（NT 398）：酥炸大腸喺香港食唔少，感覺台灣版雖然好似冇咁油，不過食落唔夠脆之餘仲好韌皮，少啲牙力都未必食得到。雞卷（NT 340）：網友另一推介嘅雞卷係就係炸得好金黃，無奈外層嘅腐皮腍而不脆，咬落仲有陣油膱味，卷中嘅雞肉餡乾嚡偏硬，唔知廚房係咪嗰日失手呢？鹽水肫（NT 298）：姨媽堅眼利，一入門口已經留意到左方斬雞師傅留起咗啲雞腎，由於唔識國語點講就用手指搭救，姐姐仔明白後即寫出「雞肫」同「雞胗」，讀都未識讀，真係好難估得中喎！。新鮮雞腎爽口彈牙，一個字，「」！麻油腰花（NT 440）：帶有麻油香嘅豬腰一啲餲味都冇，每件同樣鬆爽厚潤。手工雞蛋布丁（免費招待）：結尾點咗兩客雞蛋布丁黎分，甜品芬芳柔滑，焦糖漿嘅甜味成功吊出蛋香，恰到好處。埋單提示收銀員冇寫甜品落單，即學識「免費贈送」為「招待」，今餐又學到野。「雞家莊」為台北擁有四十多年經驗嘅老字號，其六條店光鮮企理，服務生以禮相待，招牌小菜有板有眼，肥肥家族反覺內臟菜式更有驚喜，價格親民合理，絕對值得一試。

Toh-A桌藏 (大安區)

週末訪台數天，主要目的當然係離不開吃喝玩樂，但要為一行十二人編排膳食，絕非易事。幸好互聯網上嘅飲食資訊非常詳盡，XO仔方才發掘到連旅遊書籍都未提及過嘅隱蔽美食大宅「桌藏」。以電郵訂座，只需填回信用卡授權書並支付訂金，流程相當簡易。的士停在以磨沙玻璃圍起嘅餐廳門前，第一刻感覺十分時尚。步進圓形嘅門框卻又踏上幽靜嘅石徑，庭園式嘅設計又充滿著中國風。店內嘅光線柔和，摩登嘅間隔開揚通爽，厚墊椅櫈亦好舒適。每個座位面前除咗有齊備嘅餐具，最搶眼就係把扇形菜單。反轉一看先知原來兩邊嘅內容為中英對照，這個中西合璧典雅得也真夠全面。八道菜餐單價格為NT 3,300/位，當中每人需點選湯品及主菜兩個項目。湯品有「干邑龍蝦海鮮湯佐擔仔麵」及「日本瑤柱、金華火腿、雞煲湯」兩款可揀；而主菜則有四款之多，當晚有「澳洲羊肩排」、「澳洲和牛臉頰」、「美國安格斯牛扒」、「櫻桃鴨油封鴨腳」。點好菜，晚餐即由一小杯清香怡神嘅「台南有機紅心芭樂茶」作序，據悉有養生紓壓之效。接棒嘅四式麵包有紅豆包、火腿包、橄欖芝麻包、芝士包，每件不單外表金黃，而且熱辣鬆軟，一人有成籃咁多，份量真夠堅！兩款牛油修長軟滑，中式嘅擺盤亦非常吸睛。菜譜中嘅前菜為二重奏，第一節「當令開胃菜」乃色澤鮮艷嘅小食拼盤。金邊靚碟上有鮮爽醒神嘅天使紅蝦、芬芳彈牙嘅松露鮑魚、鮮香潤澤嘅蕃茄仔、爽脆甜美嘅粟米仔及無花果。而第二節「台式蘿蔔糕微烤法國鴨肝醬」雖看似簡單，但菜式嘅複雜度卻絲毫不遜前段。長碟上兩件台式蘿蔔糕方塊質感厚潤有彈性，師傅巧妙地喺面塗上微烤過嘅法國鴨肝醬，除咗為糕品添上柔軟滑溜，同時亦能帶出鮮濃惹味，神來之筆確真細膩得很！湯品一環，小肥揀咗「干邑龍蝦海鮮湯佐擔仔麵」，熱湯均由服務生即場續一倒入石碗中。橙黃色嘅海鮮湯底香濃醇厚，幼身嘅擔仔麵條又夠柔韌，混入鮮甜爽脆嘅龍蝦肉，龍蝦湯麵絕對真材實料，堅掂！另外一款湯為「日本瑤柱、金華火腿、雞煲湯」，小弟冇份食都影咗幅相同大家分享。人家聽歌學國語，小肥則用餐學中文！今次就由「桌藏」老師教曉三魚組成嘅「鱻」字為「鮮」之異體字；接著嘅一道「鱻盤」就係指當日最時令嘅海鮮「處女蟳」，即「螃蟹」，所烹調出嘅「處女蟳焗越前米」。菜式用上秋天最肥美嘅處女蟳，師傅拆出蟹肉後，就用返個殼加入飽滿晶瑩嘅越前米焗製，頂面再加插翠綠嘅菜苗，蟹飯入口鮮香濃甜，且毫不溜滯，當真如餸名咁「鱻」！主菜出場前，貴客眼前突然煙霧四起，感覺猶如置身於仙境中般奇妙。霧裡透出嘅點點紅原來係清涼醒神且消滯嘅「洛神花冰沙」。真係冇諗到一頓晚餐除咗可大飽口福之餘，更可享盡眼福！四款主菜分別為「澳洲羊肩排」、個樣有啲似糯米雞嘅「澳洲和牛臉頰」、法式名菜「櫻桃鴨油封鴨腳」、及鮮紅美艷嘅「美國安格斯牛扒」。兩三成熟嘅安格斯牛扒不單紅潤有光澤，油脂不多，一刀切落去已感其肉質十分鬆軟，入口更覺美國靚牛極富彈性，且肉汁豐厚，惹味可口。由咸轉甜，間場先有杯清爽微甜嘅小红莓凍飲為味蕾洗滌一番，冇錯，入面仲有朵食用花架。大廚嘅心思相當精密，甜品嘅設計跟前菜好對稱地一同譜出二重奏，第一節亦同為拼盤，不同之處在於前菜拼盤以西餐碟上，而甜品拼盤則換上鮮紅嘅中式錦盒承載。下圖為甜品拼盤嘅正常版。錦盒中嘅四件甜點均一口一件，中央淺啡色嘅「烏龍茶泡夫」外鬆內軟，烏龍茶味芳香，而上方件「焦糖芒果辣椒糕」則清甜得黎帶有少少辣勁，好得意。由於細佬早於訂座時說明對果仁敏感，自己嗰份就冇咗含果仁嘅嗰粒朱古力，而多咗件又彈又潤又清香嘅芭樂糕。甜品第二節就帶點分子料理元素，連餐具嘅組合都新潮過人。下方嘅白碟上有件被雜果圍住嘅法式多士方磚，碟子上方凹咗嘅一角剛巧連接住另上嘅糖漿。法式多士方磚鬆化輕盈，頂面以黑糖魚子醬點綴能增添濕潤及微甜，食客可因應自己嘅需求再淋上糖漿，伴配爽甜嘅鮮果又夠清新健美，整個設汁除咗美觀及美味之外，更很是周詳。晚膳以餐後飲作結，小肥杯洋式特濃咖啡屬刺激性飲品，咖啡師不知是有意定無意地揀選咗隻刻有「靜」字嘅木碟呈上，莫非係要傳遞喝畢要靜下來嘅訊息？！於台北化身為一所型格住宅嘅「桌藏」由外到內、裝潢到菜式，都散發著中西匯萃嘅氣息。時尚嘅用餐大堂由年輕友善嘅服務生掌舵，到步一刻已續一扶持長輩們入屋就座，離開時仲親身陪同去搭的士，體貼入微之情盡在不言中。大廚端上餐桌上嘅無國界美食精緻味佳，中段更締造出煙霧迷漫嘅特效仙境，這個感觀之旅確真豐盛，而且仲極之抵玩添！

台北寒舍艾美酒店-寒舍食譜 (信義區)

早機抵台後，中午即到達入住之「寒舍艾麗酒店」，等待房間時，當然係要醫飽肚肚先啦！收藏好行李後，十人即前往隔壁嘅姊妹酒店「寒舍艾美酒店」，於其中菜廳「寒舍食譜」享用午膳，步行不需五分鐘，確真方便得很。酒店餐廳樓底高高，極有氣派。用餐大堂開揚通爽，地上舖出厚厚嘅紅地毯，配上牆上嘅國畫，中國風味濃厚，同時亦不失時代感。餐桌上有齊備之自用及公用餐具，整潔衛生。人多點餸都幾有難度架，何況餐牌咁厚，結果人人有份點。厚厚嘅餐牌中其中七頁為續位計嘅套餐項目。另有三頁為每席計嘅十人套餐選擇。其餘則為散點菜式。唯一附上彩色插圖嘅一頁應該屬精選推介。椒鹽鴨舌（NT 520）：台式鴨舌同港版嘅唔同，每件都係連埋下巴嘅，所以大隻得多，細佬唔係幾識點咬，唯一只可以講得出椒鹽鴨舌嘅炸皮好鬆脆惹味。脆皮先知鴨（NT 1,880/隻）：旅遊王Uncle介紹嘅招牌菜「脆皮先知鴨」原來係由寒舍集團創辦人蔡辰洋先生以蘇東坡嘅名作「春江水暖鴨先知」起名。每隻均由帶上手套嘅師傅即場切出。脖子長長嘅先知鴨當真如餸名般脆皮，皮下脂肪不多，鴨肉芳香軟嫩，堅掂！欖菜四季豆（NT 480）：砌到成幅畫咁靚嘅四季豆翠綠香脆，簡單可口。XO醬乾炒蘿蔔糕（NT 420）：雖則炒蘿蔔糕好夠乾身，無奈其炸皮過厚及腍，蘿蔔糕方塊偏韌而不鬆潤，甚為失色。手創花枝軟絲丸（NT 680/客）：色澤金黃嘅花枝丸香脆鬆爽。肥牛潤腸粉（NT 280）：腸粉嘅豉油係上枱後由服務生代為淋上，以確保腸粉唔會被浸到腍哂。此味肥牛潤腸粉嘅肥牛並非包入腸粉內作餡，而係舖喺腸粉上蒸煮嘅。墊底嘅腸粉柔軟潤滑，伴配軟嫩嘅肥牛碎即增添肉香。百花油條腸粉（NT 240/客）：百花油條腸粉亦即釀入蝦膠嘅炸兩，香滑嘅腸粉皮下嘅油條鬆化脆口，中間嘅百花蝦膠亦爽潤彈牙，點上甜豉油已夠滋味無窮！櫻花蝦豚肉絲炒高麗菜（NT 480/客）：以櫻花蝦豚肉絲點綴嘅高麗菜爽脆惹味。金瑤蟹肉乾燒米粉（NT 880/客）：金橙亮麗嘅乾燒米粉幼嫩軟滑，油潤芬芳，蟹肉則鮮甜香嫩，撈入清新爽口嘅芽菜即加添口感，十分細膩。福菜丁香炒水蓮（NT 520/客）：細佬因怕食魚仔，故未有一嚐炒水蓮，只係影咗幅相同大家分享。熊貓流沙包（NT 300/三隻）：熊貓流沙包外型趣緻可愛，肥嘟嘟嘅包身鬆軟熱辣，中間嘅奶皇餡心亦香濃甜美。酒店中菜廳「寒舍食譜」環境闊落開揚，服務生體貼友善，點心小菜質高味佳，整頓午餐當真猶如店名般謙遜，絕對值得推介。

三井 (信義區)

XO仔讀書唔叻，唯有將勤補拙，記得大學時代為咗要學講普通話，經常都會厚著臉皮四周結識黎自台灣及大陸o既外地生，好等自己可以有更多練習o既機會，細佬就係咁遇上咗台灣女朋友 。畢業多年後，小肥終於有機會去台北玩，所以第一時間就相約台灣女友午聚，地點就揀喺一家多位親友都推薦o既「三井」日本料理 。

餐廳黑漆o既大門及深色o既落地玻璃側門極富神秘感，不過當真並不起眼，一啲都唔易搵。大廳樓底極高，開揚通爽，室內光線雖偏暗，不過紅色o既天花配上摩登o既吊燈，潮氣洋溢。餐桌上o既小蠟燭擺設，襯托埋布造餐墊、鶴形筷子座及小鐵酒杯，新潮得黎不失高雅。可能一行十人中只有幾個可以用國語溝通，又有大有細，嚇親樓面位姐姐仔，令佢驚慌失措到要搵同事幫忙落單；為免增添混亂，我地最終都係決定各自挑選一客午市套餐。大家主攻嗰三款套餐分別為「歇雲套餐」（NT 1,200）、「淺雨套餐」（NT 1,500）及「薄月套餐」（NT 2,800）；嘻嘻，小肥身為全枱人最擦得嗰個，當然係試勻哂啦 ！由於餐牌上冇列明各套餐所包o既菜式詳情，我地都係要等食物上枱時先知有咩食 。原來三款價錢不同o既午餐除咗菜式數目有所不同之外，就連內容都好大分別，不過當中亦有一模一樣o既飯後生果及餐茶或咖啡。

如相所示，三個套餐都有刺身拼盤一客，價錢越貴，款式及件數越多。每盤最基本有兩件清香甜美o既金目鯛。而所選取o既吞拿魚部位及生蝦o既級數則同套餐o既價格成正比；「淺雨套餐」o既中拖羅及「薄月套餐」o既大拖羅肥美香嫩，入口即溶，確實齒頰留香 ；「薄月套餐」o既牡丹蝦爽滑甜美，亦是一絕。此外，「淺雨套餐」碟刺身拼盤上多咗一隻飽魚，「薄月套餐」則多咗鮮嫩o既帶子同軟潤o既鮟鱇魚肝，另外仲有兩隻分開上o既飽魚，派頭十足 。除咗魚生，每份套餐都包有沙律或前菜、蝦或蟹、燒魚菜式、湯品及甜品。「歇雲套餐」可算為最清o既一款；前菜「秋葵三文魚籽」清新濕潤、炸物「油切車蝦」乾身爽脆、煮物「銀鱈大根カマ」口感豐富，香脆惹味、形似魚蛋o既「毛蟹の真薯椀」則軟腍中帶點煙韌，清湯微甜討好 。「淺雨套餐」整體味道更為濃郁；前菜「馬糞海膽葵泥」香濃潤澤、大大隻「0.20kg 活車海老塩燒」爽厚彈牙、「旗魚腹串燒」香口而不油膩、「北寄貝吸」亦軟脆清甜。除咗四款升級海鮮菜式，套餐仲包有如薯片般脆薄o既「餅揚出げし」、「馬鈴薯牛肉釡燒」及甘醇o既「綠茶朱古力餅」。「薄月套餐」o既項目數量雖然同「淺雨套餐」差唔多，但係其實份量同食材明顯更為豐盛  ；刺身拼盤多咗魚生同鮑魚、沙律入面加咗幾片大鮑、蝦o既菜式變成幼嫩無比o既「活鱈場蟹烤」、燒魚亦升呢為鮮嫩香滑o既「0.32kg油串（吞拿魚）下巴燒き」、湯品更換上包有原隻蟹鉗o既「味噌醇蟹」。套餐額外仲有兩串皮脆心嫩o既「生蠔カリカリ揚げ」（炸蠔）、鬆軟而肉汁豐厚o既「沙朗牛ステーキ」（西冷牛扒）及望落都矜貴過人o既「金箔綠茶朱古力餅」。「三井」環境雅麗新潮，舒適衛生，午市套餐o既菜餚款式多元化，魚材高質鮮美，菜式美觀又美味，難怪可得到眾親友頂力支持及推舉 ，下次再黎台北一定會返轉頭。

鼎泰豐 101店 (信義區)

為怕年長嘅家人趕，哥哥專登選乘傍晚機返港，朝早辦理好退房手續，諗住可以行過去101食埋台灣名店「鼎泰豐」嘅小籠包先佗佗佻佻地去機場。真係冇諗過餐店早上十一點開門，十點九門外已企滿已取票嘅食客等位，七人用餐結果等咗成個鐘先可進場，即係食第二輪。幸好等待期間可先於網上點菜，打發咁啲時間。亦可於收銀處選購可愛嘅紀念品。仲印埋個101店紀念章添。無奈人齊先可入座，八旬家人要企咁耐確真有點兒吃力。餐廳面積開揚寬廣，又夠光猛，最入位置可見多位帶哂口罩同帽帽嘅廚師忙碌工作，透明度高且相當衛生。所有食物由餐飲機械人派送，節省人力且效率高。烤麩（NT 110）：烤麩前菜香甜鬆爽。紹興醉雞（NT 350）：醉雞嘅雞皮夠油滑，可惜肉質嚡口唔軟熟。香辣牛肚（NT 200）：以香蒜點綴嘅牛肚爽辣帶脆，惹味討好。高麗菜（NT 230）：大大塊高麗菜清脆唔油膩，只係冇乜味。清炒蝦仁（NT 490）：蝦仁尚算爽口，不過未為最鮮。紅油抄手（菜肉；NT 180）：雖然個賣相冇乜特別，但多款包包同餃餃中以此味紅油抄手嘅皮層最滑溜，菜肉餡心仲好脆嫩。香菇素餃（NT 27/個）：素餃皮厚偏硬同乾，完全唔掂當！蝦仁蛋炒飯（NT 270）：金黃吸睛嘅炒飯落得夠蛋蛋所以好香，飯粒飽滿肥潤，反而啲蝦仁偏乾同老。排骨麵（NT 240）：上枱時全塊排骨已經浸咗喺湯入面不知幾耐，食落好自然地超腍，個湯仲好油添，其實排骨如果分開上即能解決所有問題，有心做亦唔難。酸辣湯（NT 170/中）：酸辣湯為哥哥同媽咪所點，細佬一向怕酸所以冇試，只交由手機代食。小籠包（NT 250/十隻）：鎮店招牌小籠包雖則肉餡軟嫩鮮甜，弊在皮厚湯少，頗為失色。蟹粉小籠包（NT 400/十隻）：蟹粉小籠包除咗個籠入面多咗隻小黃蟹做記號之外，講真食落同普通小籠包無異，貴咁多都食唔出有蟹味喎，堅唔抵啦！小籠湯包（NT 380/二十隻）：只限週末提供嘅小籠湯包明顯細粒啲，姨媽真係好眼，留意到另一分別係個結原來係收喺包底嘅。應建議連另上嘅蛋花湯食，感覺限量貨色層皮比普通小籠包更厚且肉更少，點心盡失小籠包嘅特質，真心食唔過！紅燒牛肉麵（NT 280）：紅燒牛肉麵入面啲牛筋軟彈入味，湯底都好濃甜，唯一唔係好夠熱，同埋麵條有啲硬。元盅牛肉麵（NT 270）：元盅牛肉麵嘅湯餸分開上，湯底比紅燒牛肉麵熱辣，靚肉半鬆爽半軟腍，係三種湯麵中最美味嘅一款。商場餐廳「鼎泰豐101店」環境企理，服務生態度良好，運作流暢所以返枱迅速。或許期望過高所致，感覺招牌菜式包括小籠包嘅質量比較一般，價格亦不甚親民，要排成個鐘頭隊去食當真唔係咁值囉！