雞家莊 (中正區)

喺日本一個禮拜主要都係食和牛同海鮮，深知姨媽最愛食雞，所以喺台北食嘅第一餐就搵咗間雞雞專門店「雞家莊」。據悉新店易搵位啲，為怕同行嘅七、八旬長輩要等位，初次到訪就棄選母店，先試「雞家莊六條店」。地舖於街道上閃出金光，右邊可見雞群烘住幾款招牌菜式嘅靚相。左邊則吊出多隻不同色澤嘅雞雞。用餐大堂嘅紅白半磚牆滲透著傳統中國風彩，光線充裕，衛生企理，餐桌與餐桌間夠距離，空間感足。XO仔自知國語發音唔係太標準，避免發生雞同鴨講嘅情形，故早已做定功課諗定叫乜兼寫定紙仔，姐姐仔見狀明顯感到意外，不過微O嘴後即以手指公回應。三味雞（NT 800）：顧名思義，招牌雞由三款口味嘅雞雞合拼而成，包括橙亮嘅燻雞、黃皮嘅白斬雞及黑皮嘅烏骨雞。色澤不同嘅三味雞油光閃爍，脂肪唔多，肉質都好軟腍，最意外係烏雞啲肉唔嚡，依個價錢絕對唔應該挑剔，只係自己食過更嫩滑嘅而已。姨丈就勁欣賞拌碟嘅酸菜，大讚咸酸中帶著爽甜，比雞肉更有特色。雞飯（NT 50/位）：原來「雞家莊」嘅雞飯同平時跟海南雞嘅油飯唔同，熱辣辣嘅雞飯係用雞湯煲煮而成，清香不油膩。收費係人頭計，偷聽到隔離枱話可以無限添加，不過八人分咗四碗都差啲食唔哂，建議大家可以先二至三人分一碗，唔夠先追加。蔭豉蚵（NT 398）：粒粒脹爆嘅蚵仔鮮嫩肥潤，以豉汁蔥粒爆香已夠惹味，經典台菜冇得輸。沙茶豬心（NT 420）：淨睇餐牌未必會點，多得食家網友極力推薦先膽粗粗一試！貌似炒牛肉嘅豬心片得好夠薄身，咬落爽脆Q彈，熱辣夠鑊氣，個人覺得比招牌三味雞美味得多，必吃也！雞家豆腐（NT 298）：鎮店名菜之一嘅賣相可愛吸睛。大大隻公雞外表十分剛強，砵中嘅豆腐卻幼嫩滑溜，混入其中嘅雞肉碎都一樣軟嫩，微微嘅辣勁提神醒胃，撈埋落個雞飯度食尤其芳香。木耳水血（NT 298）：「雞紅」喺台灣叫做「水血」，喺雞雞專門店梗係要點黎試吓啦，話哂日日劏咁多隻雞，啲雞血應該最新鮮。連相都影得出厚厚嘅水血光滑尤甚，學二叔話齋，滑到唔洗咬已經可以直吞，唔嚡兼冇渣，伴入脆巧嘅木耳即為口感添上層次。脆皮腸（NT 398）：酥炸大腸喺香港食唔少，感覺台灣版雖然好似冇咁油，不過食落唔夠脆之餘仲好韌皮，少啲牙力都未必食得到。雞卷（NT 340）：網友另一推介嘅雞卷係就係炸得好金黃，無奈外層嘅腐皮腍而不脆，咬落仲有陣油膱味，卷中嘅雞肉餡乾嚡偏硬，唔知廚房係咪嗰日失手呢？鹽水肫（NT 298）：姨媽堅眼利，一入門口已經留意到左方斬雞師傅留起咗啲雞腎，由於唔識國語點講就用手指搭救，姐姐仔明白後即寫出「雞肫」同「雞胗」，讀都未識讀，真係好難估得中喎！。新鮮雞腎爽口彈牙，一個字，「」！麻油腰花（NT 440）：帶有麻油香嘅豬腰一啲餲味都冇，每件同樣鬆爽厚潤。手工雞蛋布丁（免費招待）：結尾點咗兩客雞蛋布丁黎分，甜品芬芳柔滑，焦糖漿嘅甜味成功吊出蛋香，恰到好處。埋單提示收銀員冇寫甜品落單，即學識「免費贈送」為「招待」，今餐又學到野。「雞家莊」為台北擁有四十多年經驗嘅老字號，其六條店光鮮企理，服務生以禮相待，招牌小菜有板有眼，肥肥家族反覺內臟菜式更有驚喜，價格親民合理，絕對值得一試。

台北國賓大飯店-樓外樓 (中山區)

小表弟迎娶嬌妻，舅父特選於「台北國賓大飯店」擺酒大宴親朋。婚宴設於酒店十二樓之「樓外樓」宴會廳，環境高雅得很，四周以鮮花點綴，散發著芬芳及雅致。除咗靚花擺設及菜譜之外，每席都有糖果及馬仔，寓意甜甜蜜蜜。每位賓客更有鳳梨酥及精美「囍」蜜糖帶回家，一同分享此份甜蜜喜悅。晚宴共有十二道菜，確真豐富。和風龍蝦沙拉：以蕃茄墊底o既沙律清新潤甜，喺面疊上爽脆o既龍蝦及沙律醬，紅當當o既組合好睇又好食。六喜碟：由服務生續一分配o既潮派六味喜碟分別為雞件、薄餅捲蛋、炸蠔、銀杏、腐皮卷、及炒年糕，顏色鮮橙奪目，食落均香濃惹味。花好月圓：意頭咁好，餸名又靚o既「花好月圓」原來係炸湯丸仔，煙煙韌韌都幾得意。珊瑚魚翅盅：嘩，魚翅每盅都咁大碗同咁足料，啲翅成梳喺湯面可謂睇頭十足，認真唔講得笑！靚翅厚而爽潤，湯底亦濃而不俗，爆！麻醬鮮鮑：清蒸鮮鮑就食得多，以麻醬作鮮鮑o既調味都係第一次食。鮑魚質感雖則軟腍，無奈麻醬o既味道實在太搶，所以就唔係好食得出任何鮑魚o既鮮甜味。掛爐烤雞：意外地，烤雞外表肥厚，但香脆o既雞皮下並無太多脂肪，就連雞胸肉都一啲都唔嚡，肉質軟嫩可口。茄汁蝦球佐花卷：甜酸蝦球一人一大隻，體積絕對夠哂大體！咬落層炸皮鬆化乾脆，蝦身更加係爽厚潤甜，個個食到嗦嗦聲，冇得頂呀！清蒸老虎斑：老虎斑魚肉幼嫩滑溜，鮮味無窮。貝酥油飯：原來「貝酥」乃乾瑤柱個靚名，細佬又上咗一課。油飯粒粒晶瑩飽滿，油潤有光澤，伴上脆身惹味o既貝酥猶如畫龍點睛，更上一層樓。鴛鴦美點：甜品環節家人都忙於拍大合照，小肥就襯排隊時不停偷食超級香口而且唔係太甜o既紅豆薄罉。XO仔首次於台灣參加婚宴，有幸於名酒店「台北國賓大飯店」o既「樓外樓」宴會廳見識到台式婚禮多麼高貴又溫馨，氣氛好好，當中潮派中菜美觀又美味，實在令人難忘。再次恭喜小表弟成家立室，舅父多咗個好媳婦！

三井 (信義區)

XO仔讀書唔叻，唯有將勤補拙，記得大學時代為咗要學講普通話，經常都會厚著臉皮四周結識黎自台灣及大陸o既外地生，好等自己可以有更多練習o既機會，細佬就係咁遇上咗台灣女朋友 。畢業多年後，小肥終於有機會去台北玩，所以第一時間就相約台灣女友午聚，地點就揀喺一家多位親友都推薦o既「三井」日本料理 。

餐廳黑漆o既大門及深色o既落地玻璃側門極富神秘感，不過當真並不起眼，一啲都唔易搵。大廳樓底極高，開揚通爽，室內光線雖偏暗，不過紅色o既天花配上摩登o既吊燈，潮氣洋溢。餐桌上o既小蠟燭擺設，襯托埋布造餐墊、鶴形筷子座及小鐵酒杯，新潮得黎不失高雅。可能一行十人中只有幾個可以用國語溝通，又有大有細，嚇親樓面位姐姐仔，令佢驚慌失措到要搵同事幫忙落單；為免增添混亂，我地最終都係決定各自挑選一客午市套餐。大家主攻嗰三款套餐分別為「歇雲套餐」（NT 1,200）、「淺雨套餐」（NT 1,500）及「薄月套餐」（NT 2,800）；嘻嘻，小肥身為全枱人最擦得嗰個，當然係試勻哂啦 ！由於餐牌上冇列明各套餐所包o既菜式詳情，我地都係要等食物上枱時先知有咩食 。原來三款價錢不同o既午餐除咗菜式數目有所不同之外，就連內容都好大分別，不過當中亦有一模一樣o既飯後生果及餐茶或咖啡。

如相所示，三個套餐都有刺身拼盤一客，價錢越貴，款式及件數越多。每盤最基本有兩件清香甜美o既金目鯛。而所選取o既吞拿魚部位及生蝦o既級數則同套餐o既價格成正比；「淺雨套餐」o既中拖羅及「薄月套餐」o既大拖羅肥美香嫩，入口即溶，確實齒頰留香 ；「薄月套餐」o既牡丹蝦爽滑甜美，亦是一絕。此外，「淺雨套餐」碟刺身拼盤上多咗一隻飽魚，「薄月套餐」則多咗鮮嫩o既帶子同軟潤o既鮟鱇魚肝，另外仲有兩隻分開上o既飽魚，派頭十足 。除咗魚生，每份套餐都包有沙律或前菜、蝦或蟹、燒魚菜式、湯品及甜品。「歇雲套餐」可算為最清o既一款；前菜「秋葵三文魚籽」清新濕潤、炸物「油切車蝦」乾身爽脆、煮物「銀鱈大根カマ」口感豐富，香脆惹味、形似魚蛋o既「毛蟹の真薯椀」則軟腍中帶點煙韌，清湯微甜討好 。「淺雨套餐」整體味道更為濃郁；前菜「馬糞海膽葵泥」香濃潤澤、大大隻「0.20kg 活車海老塩燒」爽厚彈牙、「旗魚腹串燒」香口而不油膩、「北寄貝吸」亦軟脆清甜。除咗四款升級海鮮菜式，套餐仲包有如薯片般脆薄o既「餅揚出げし」、「馬鈴薯牛肉釡燒」及甘醇o既「綠茶朱古力餅」。「薄月套餐」o既項目數量雖然同「淺雨套餐」差唔多，但係其實份量同食材明顯更為豐盛  ；刺身拼盤多咗魚生同鮑魚、沙律入面加咗幾片大鮑、蝦o既菜式變成幼嫩無比o既「活鱈場蟹烤」、燒魚亦升呢為鮮嫩香滑o既「0.32kg油串（吞拿魚）下巴燒き」、湯品更換上包有原隻蟹鉗o既「味噌醇蟹」。套餐額外仲有兩串皮脆心嫩o既「生蠔カリカリ揚げ」（炸蠔）、鬆軟而肉汁豐厚o既「沙朗牛ステーキ」（西冷牛扒）及望落都矜貴過人o既「金箔綠茶朱古力餅」。「三井」環境雅麗新潮，舒適衛生，午市套餐o既菜餚款式多元化，魚材高質鮮美，菜式美觀又美味，難怪可得到眾親友頂力支持及推舉 ，下次再黎台北一定會返轉頭。

STAY by Yannick Alléno (信義區)

出咗名愛飲好食o既堂細佬近年因工作關係已遷往台北居住，去到新環境，其飲食習慣都係差唔多，一樣愛到處覓食，其中「STAY by Yannick Alléno」就係一家令佢常掛喺口邊o既西餐廳 。「STAY」o既裝修極富時代感，大堂小廳內o既散座都用上厚墊梳化櫈，故仍不失高雅舒適。現今食肆都潮興有個開放式廚房，「STAY」都唔例外，不過就只係搬咗個色彩繽紛o既甜品創作空間出黎，成個科學實驗室咁 ，都幾得意。步入門前一刻已留意到門外o既廣告牌正推廣緊兩款白松露宴 ，埋位細看餐牌就明白兩者有何區別。「珍饌盛選」為六道菜，主菜為松露意粉，包有四克白松露，價錢為NT 2,988 + 10%；「極上盛選」則有七道菜，另加多咗一味波菜帶子，主菜為牛膝，包有十克白松露，價錢為NT 9,800 + 10%。XO仔身為松露迷一名，對松露意粉更加係情有獨中，故不用費神即決定要一嚐前者o既六道菜「珍饌盛選」松露宴 。食西餐時家人都總愛飲番兩杯，當晚就開咗枝香檳配佳餚 。由於六人當晚所點選o既菜式數目及項目都有所不同，單憑溫婉o既服務生呈上食物o既次序，已睇得出廚房對西餐禮儀都甚為講究，各部門互相都好有默契。麵包籃：籃中合共有三款麵包，每三人一籃，即每人有三件。為怕引起食物過敏反應，小肥出門時都會盡量揀食自己知道屬安全o既白麵包及牛角包；暖手o既白麵包極之鬆脆，牛角包亦香軟非常。主廚精選小點：各人o既晚餐同由三款的骰o既小食作序。最左為「巴馬臣芝士蕃茄」，由兩片又薄又脆o既巴馬臣芝士夾住四方形o既蕃茄啫喱，咸咸酸酸都幾醒胃；個人覺得中間件「三文魚班戟」雖則夠軟熟，不過就好似有少少腥 ；最右嗰件「鵝肝車厘子」以車厘子包實一小件鵝肝，方便客人可一口過食落肚，概念其實好好，不過如果車厘子可以去埋皮，相信效果會更好。白松露培根水波蛋：離遠已聞到清幽o既松露香，腦海已唱出「魅力是無法擋，紅唇在為你張。。。」 當真令人精神為之一振。如相所示，雞蛋實屬流心，連同蛋底o既煙肉忌廉醬及麵包脆脆一齊食，入口更覺香脆軟滑，可真謂完美 ！白松露南瓜濃湯：南瓜濃湯香滑甜美，濃而不溜，輕輕灑上幾塊白松露薄片已夠芬芳，盡顯簡單美。白松露細扁麵：形似浸緊松露泡泡浴o既意粉麵條煙韌彈牙，第一口細嚐時很是清香輕巧，不過其松露味越食越濃郁，味蕾上o既精靈彷彿慢慢地被喚醒，極為精彩細膩 。法式精緻小點：甜品小點同開胃小食一樣合共有三款，跟餐茶及咖啡上。先上枱有兩款蛋糕仔，即橙黃色o既「熱情果歌劇院蛋糕」（Passionfruit Opera Cake）及深啡色o既「朱古力撻」。「熱情果歌劇院蛋糕」清涼微甜，「朱古力撻」則香脆醇濃，雖說兩者無論喺顏色、口感定味道上都好大o既對比，食落卻又能互相輝映 ，妙哉！接著妹妹仔就小心翼翼地呈上一條上面插有多枝波板糖o既大擀麵棍 。原來波板糖全為棉花糖，分別為黃色o既菠蘿味、橙黃色o既熱情果味及深紅色o既紅梅味；每條同為甜中帶酸，都幾消滯吓。白松露巧克力焦糖卷：以金箔及松露點綴o既兩條朱古力卷外層脆卜卜，內裡o既朱古力焦糖餡心則柔滑清甜，足以帶出淡薄o既松露香，甜而不膩，剛好為松露宴劃上一個完美o既句號 。感激堂細老o既精心推介，XO仔得以於訪台首晚親臨又潮又高級o既「STAY by Yannick Alléno」，享用咗一頓豐盛美味o既白松露美饌 。幾位姨媽表妹對餐店美觀高質o既菜式讚口不絕之餘，大家更於過去幾個月介紹咗不少往台北旅遊o既親友幫襯，個個食完仲要有讚冇彈，真係好難得！

金品茶語 (中山區)

去台灣旅遊，如果唔食過小籠包，個心一定會好唔安樂，但係要光顧幾間名店或老字號都必定要排隊，坐得又唔係話特別舒服，所以今次台北一行，決意一試超閃旅遊書推介o既「金品茶語」 。有司機哥哥黎機場接機，我地不需費神，坐車直達，不過食店喺四周均有廣告及指示牌，地方一啲都唔難搵。兩層高o既「金品茶語」地下為商店，售賣多款茶葉及茶具，送禮自用都適合。茶莊清楚列明品牌o既四大堅持 。一樓o既餐廳全為合併式o既方形散座，簡潔舒適，人多人少喺度嘆茶都一樣咁自在。 橙黃色o既餐牌不但有多款小食菜餚，茶品款式都一樣咁豐富，凍飲、熱飲齊備，紅、綠、奶茶，應有盡有。就連時尚o既茶味雞尾酒都有得飲   ，果真係令XO仔眼界大開！始終自己及同行o既長輩對茶應知唔深，結果都係等年輕友善o既哥哥仔介紹，先叫咗壺「貴妃美人茶」，一邊呷茶，一邊食點心同湯麵。 皮蛋豆腐（NT60）：白雪雪o既豆腐嫩滑非常，半流心o既皮蛋亦好夠溏心，一淡一濃可真為絕配。 小籠包（NT 120/六隻）：熱辣辣o既小籠包皮薄餡軟嫩，睇相可能會覺得唔係好夠湯，不過食落就知湯足且清甜，毫不溜滯，食落好健康，每人一粒真係唔多夠喉 。

蟹黃湯包（NT 175/六隻）：淨睇相真係未必分得出，不過蟹黃湯包其實即係多咗蟹黃味o既小籠包，同樣係皮薄餡靚，一行六人都覺得蟹黃湯包更為鮮美香濃，故亦選此為追加點心 。 紅燒牛肉麵（NT 180）：碗中o既牛肉全部都係牛展，每片都好軟腍，麵條則軟滑易入口，加上湯底少辣惹味，極之討好 。 菜肉雲吞麵（NT 160）：相比起下，碗菜肉雲吞麵味道就較為清淡，幸好菜肉雲吞皮光肉滑，唔夠味可以簡單撈入紅燒牛肉麵o既湯自行加以調味。「金品茶語」環境幽靜舒適，個人覺得地方好坐過市內其他名牌小籠包店多多聲。此外，服務生友善客套，點心及麵品不含味精，健康美味，價廉物美，真係好多謝旅遊書咁好介紹 ！