大山無價飲食空間 (新店區)

嬸婆經常出入台灣覓好西，遊台前小肥梗係要請教長輩索定料啦！聽聞此行將與幾位七、八旬姨媽姨丈同遊，可租大車出入，所以就提議小組去遠少少上山，一訪隱世「大山無價飲食空間」，慢享三小時嘅養膳料理。兩層高嘅餐店貌似一間郊外別墅般，花園大門春色滿滿。連弱視嘅XO都留意到店名來由貼於玻璃門上：「大隱猶知柴米價，山居偏識古今情」！詩句咁細隻字，証明個粉紅底好有用。步進室內，貴客必先自行脫下鞋子並存放於木櫃內。用餐大堂寬廣開揚，禪風嘅裝潢締造出一種寧靜平和，舖上日式榻榻米夠哂涼爽。散座間有足夠嘅活動及私人空間，部份餐桌配備長櫈，適合年長人仕。近窗位置有景睇，下雨天亦別有一番風味，悠然自得。四週擺出鮮美耀眼嘅花藝品，散發出優雅嘅氣質。餐桌上只有簡單嘅自用餐具。台式懷石料理並無餐單提供，大廚以當地節令嘅食材隨心造出約十道菜（定價NT 1,180/位，另收加一服務費），嬸婆笑說「有咩食就要隨緣啦」，玄機之談原來係要配合返個禪味。教好大家點樣沖茶後，午餐正式由清香淡雅嘅「桂花凍」作序，擺盤猶如畫品般秀麗，葉枝刻意留有水份，彷如剛剛摘下，此情此景充滿古裝片嘅氛圍，有意思極！等咗都有成兩、三個字，終於輪到第二道「花生豆腐紅麴魚」上場，唔怪得知要食成三個鐘頭啦，相信這正是演繹出時興嘅慢活哲學。冇菜單嘅情況下，菜式一定要經由服務生介紹，不過佢地個個好似念口簧咁，姨丈聽唔明想問多兩句時，背完台詞嘅哥哥仔早已走埋佬，冇耐性之舉好似同慢活態度打對台喎！換上紫艷嘅菊花陪襯嘅花生豆腐乃師傅自家特製，豆腐磚面嘅四角以四款配料點綴，湯匙中片鰻魚以紅麴米墊底，無奈XO仔唔食得花生，結果成份奉獻咗俾哥哥代食。接著嘅「牛蒡扇貝湯」設計者一啲都冇馬虎，四個碗仔整齊地排列喺木盤上，並再換上新一種鮮花配角，外觀同樣精美。暖胃嘅湯品濃而不俗，芳香尤甚，大大隻扇貝爽脆鮮甜，意外地與牛蒡嘅甘香毫無衝突，入面仲有件軟腍嘅冬瓜，組合極之和諧。呈上下道餸嘅醬油、山葵、醋等配料時，妹妹仔先確認客人係咪個個都食得生野，因為唔食的話，廚房會煮熟啲「生魚片」。木盤上雙拼出「雜錦魚生」及「沙律」。應建議先食魚生，幾款中以三文魚最為鮮美，蝦蝦尚算爽潤，不過件希靈魚籽就勁腥。沙律因內含杏仁，小弟唔食得；哥哥話入面啲青瓜片、生洋蔥絲同彩椒絲都好清爽。食完一輪生野，每人先有一小杯清涼酸甜嘅「玫瑰醋」為味蕾淨化一番。午餐去到中段終於有肉食！碗中嘅「麻油雞腿麵線」一人一箸軟腍幼滑嘅麵線，份量恰好唔太多，已預先去哂骨骨嘅雞腿肉柔潤多汁，湯底雖滲出麻油香，但個人覺得味道仍偏淡，落多少少鹽效果應更佳。吃畢再呷一口伴拼嘅「靈芝茶」，口腔頓即溢滿純樸甘香。以陶瓷碗承載嘅「蔬菜糕渣」原來係宜蘭特產。糕渣係頂面嗰塊炸餅，本身酥化香脆，師傅巧妙地將冇乜味嘅糕渣浸咗喺個菠菜芹菜打製而成嘅蔬菜油入面，成功為糕渣添上濃厚嘅菜香，仲索走埋部份油膩感。之前食過生蝦，熱盤中嘅「地瓜大蝦拼南瓜茄子」仲有一隻熟蝦食。橙殼白肉嘅大蝦可能煮得太耐所以有少少偏嚡同乾，反而亮點係中間件外脆心甜嫩嘅「炸地瓜」！食完幾款燒炸菜式，一杯仔濃郁嘅「黑棗醋」當真有助一解腸胃內嘅油脂，適暢得很。午餐轉入直路，妹妹仔等待大家準備好手機拍片後，即為「蓮花雞湯」表演一幕「乾花也可怒放」。清甜嘅雞湯內含雞肉、蓮子、節瓜、荔枝等，就連花花都食得架，相當足料。跟配一球「烏魚子炒飯」可以話係成餐飯最重口味嘅一道，飯粒飽滿肥潤有濕度，經燒炸過嘅烏魚子都好酥脆，細細塊足以為飯品帶來咸香，單尾暖胃非常。作結嘅甜品環節先配芳香撲鼻，細緻怡神嘅「菊花茶」。甜點二重奏前方有清脆嘅芭樂、爽甜嘅鳳梨及蕃茄仔。後方嘅「黑糖芋泥球」微甜不膩口，當中嘅龍眼肉同金棗尤其可口。深居於半山嘅「大山無價飲食空間」清幽秀逸，綠意盎然。善用寶島食材之養膳菜餚份量適宜，賣相精緻吸睛，視覺效果絕對一百分，唯一調味偏淡，未必人人食得慣。慢慢享受食物係好，不過菜與菜之間隔成兩、三個字先上，令席上嘅老人家中途竟然想午睡，似乎也過慢了！場內只有兩位服務生應付樓面所有工作，明顯有點吃力，或許印出菜單可減輕其工作量，處理其他事項可更有效率。台式養生午膳輕盈獨特，價格唔算貴，因遠離市區，來回就比較需時，久唔久一次猶如參加禪修營般，可令心境平和，感受一吓難得的清靜。

鼎泰豐 101店 (信義區)

為怕年長嘅家人趕，哥哥專登選乘傍晚機返港，朝早辦理好退房手續，諗住可以行過去101食埋台灣名店「鼎泰豐」嘅小籠包先佗佗佻佻地去機場。真係冇諗過餐店早上十一點開門，十點九門外已企滿已取票嘅食客等位，七人用餐結果等咗成個鐘先可進場，即係食第二輪。幸好等待期間可先於網上點菜，打發咁啲時間。亦可於收銀處選購可愛嘅紀念品。仲印埋個101店紀念章添。無奈人齊先可入座，八旬家人要企咁耐確真有點兒吃力。餐廳面積開揚寬廣，又夠光猛，最入位置可見多位帶哂口罩同帽帽嘅廚師忙碌工作，透明度高且相當衛生。所有食物由餐飲機械人派送，節省人力且效率高。烤麩（NT 110）：烤麩前菜香甜鬆爽。紹興醉雞（NT 350）：醉雞嘅雞皮夠油滑，可惜肉質嚡口唔軟熟。香辣牛肚（NT 200）：以香蒜點綴嘅牛肚爽辣帶脆，惹味討好。高麗菜（NT 230）：大大塊高麗菜清脆唔油膩，只係冇乜味。清炒蝦仁（NT 490）：蝦仁尚算爽口，不過未為最鮮。紅油抄手（菜肉；NT 180）：雖然個賣相冇乜特別，但多款包包同餃餃中以此味紅油抄手嘅皮層最滑溜，菜肉餡心仲好脆嫩。香菇素餃（NT 27/個）：素餃皮厚偏硬同乾，完全唔掂當！蝦仁蛋炒飯（NT 270）：金黃吸睛嘅炒飯落得夠蛋蛋所以好香，飯粒飽滿肥潤，反而啲蝦仁偏乾同老。排骨麵（NT 240）：上枱時全塊排骨已經浸咗喺湯入面不知幾耐，食落好自然地超腍，個湯仲好油添，其實排骨如果分開上即能解決所有問題，有心做亦唔難。酸辣湯（NT 170/中）：酸辣湯為哥哥同媽咪所點，細佬一向怕酸所以冇試，只交由手機代食。小籠包（NT 250/十隻）：鎮店招牌小籠包雖則肉餡軟嫩鮮甜，弊在皮厚湯少，頗為失色。蟹粉小籠包（NT 400/十隻）：蟹粉小籠包除咗個籠入面多咗隻小黃蟹做記號之外，講真食落同普通小籠包無異，貴咁多都食唔出有蟹味喎，堅唔抵啦！小籠湯包（NT 380/二十隻）：只限週末提供嘅小籠湯包明顯細粒啲，姨媽真係好眼，留意到另一分別係個結原來係收喺包底嘅。應建議連另上嘅蛋花湯食，感覺限量貨色層皮比普通小籠包更厚且肉更少，點心盡失小籠包嘅特質，真心食唔過！紅燒牛肉麵（NT 280）：紅燒牛肉麵入面啲牛筋軟彈入味，湯底都好濃甜，唯一唔係好夠熱，同埋麵條有啲硬。元盅牛肉麵（NT 270）：元盅牛肉麵嘅湯餸分開上，湯底比紅燒牛肉麵熱辣，靚肉半鬆爽半軟腍，係三種湯麵中最美味嘅一款。商場餐廳「鼎泰豐101店」環境企理，服務生態度良好，運作流暢所以返枱迅速。或許期望過高所致，感覺招牌菜式包括小籠包嘅質量比較一般，價格亦不甚親民，要排成個鐘頭隊去食當真唔係咁值囉！

橘色涮涮屋 新光A9館 (信義區)

疫情後初次與居台嘅家人相聚，地位最高嘅舅公專登選於鄰近酒店嘅「橘色涮涮屋」新光A9館盛設款待，為一眾晚輩洗塵。名牌日式火鍋店金亮嘅竹林設計由門面延身至室內，時尚雅緻，甚有氣派。十多人派對於私人廂房內進行，光線充裕，私隱度高，且有專人招待。每位席上有齊備嘅自用餐具及調味配料。眼見長長嘅餐桌中央有兩個大金盤，大姨丈即鬼馬地問係咪用黎洗手，成功搞起個氣氛。深知姨媽們最愛食蟹蟹，舅公第一時間即點原隻北海道鱈場蟹，新鮮貨色當然係要於飯前繞場一周顯示實力啦！姨姨認真客氣，仲備好日本名牌十四代清酒！（開瓶費NT 500/樽）火鍋套餐揀咗清啲嘅昆布柴魚湯。第一道先上「綜合菜盤」，由哥哥仔代為灼煮。菜盤內含嫩口嘅豆腐、軟彈嘅蟹角同菇菇、爽甜嘅粟米等。另跟嘅開胃前菜共有三款選擇，個人首選幼滑清甜嘅和風蘆筍豆腐。主廚前菜每天不同，當晚嘅串燒炸雞熱辣香脆，份量堅勁，十幾人分咗六串已經飽咗一大半。等待廚房炮製生猛嘅蟹蟹時，食肉獸先享用紅肉主菜。紐澳薄切牛舌（NT 1,280/套餐）：切得夠薄嘅牛脷爽潤富彈性。頂級松阪豬（NT 1,230/套餐）：大大塊嘅松阪豬肥膏頗為強勁，正因如此，煮出黎先可以咁鬆爽唔嚡口。日本黑毛和牛板腱（NT 3,100/套餐）：柔潤嘅黑毛和牛紅白雲石紋理分明，半溶於舌上嘅口感最正，油脂一啲都唔過份，所以食多兩片都唔覺溜滯。日本頂級和牛（NT 4,300/套餐）：有比較下，反而頂級和牛最厚身同帶微微韌，要二選一的話，個人覺得黑毛和牛板腱更為可口兼化算得多。北海道鱈場蟹（時價）：壓軸上場嘅鱈場蟹共分開兩部份，白肉燈紋嘅蟹腳由師傅燒出，靚蟹如絲絨般幼嫩，爽厚多汁，冇得彈呀！其餘部位就交由貴客自己煮。鱈場蟹鮮甜無比，超！跟餐嘅單尾大家都揀食粥，睇住哥哥仔熟手地撈入白飯、蛋蛋、碎蔥、紫菜，索盡湯底嘅精華，已教人興奮不已！橙美亮麗嘅粥品熱辣辣、香噴噴，入口軟綿暖胃，鮮香濃甜。節令水果：由於腸胃已經冇哂位，大家決定放棄甜品，真係冇諗到經理姐姐會安排幾款清爽嘅節令水果為客人幫助消化。和風涮涮鍋專門店「橘色涮涮屋新光A9館」高雅衛生，服務優良周到，晚市海陸主菜中嘅幾款和牛、北海道鱈場蟹新鮮高質，出色味佳，客似雲來實不無道理！

MUME (大安區)

靚靚媽咪壽辰，小肥同哥哥早已規劃好要帶領天生就係派對動物嘅家人高歌「Let’s go party party all night, oh oh oh oh」！為博靚媽一笑，當然唔可以敷衍選擇，經過慎重考慮後，決定一試表妹推介嘅法國餐廳「MUME」，曾鑊米芝蓮星星兼口碑喎，可謂雙贏！西餐店於四維路上彷如一間藝廊般，低調中散發出時尚藝術嘅氣息。灰白對稱嘅門面極富立體感，入口高咗兩級仲凹埋入去，左右兩邊嘅落地玻璃窗就形成凸出街嘅小立方，設計連落大雨水浸都唔洗驚，有特色得黎又夠實際。接待處擺咗個奬狀陣，生出嘅樹幹莫非係寓意著開枝散葉開分店？！散座大堂空間感足，以木拼鐵嘅裝潢清爽優閒，柔和嘅燈光由繩索吊出，古樸風格舒適不拘謹。後面廚房位置明亮潔淨，歡迎客人觀摩，透明度極高。十二人派對安排於神秘嘅地牢密室內進行，由於冇電梯或升降機，貴客必先行經店子中央嘅梯級。年輕溫婉嘅服務生細心體貼，除咗自動扶持年長嘅賓客上落樓梯，入座時亦有幫忙擺放隨身物及外套，有求必應。私隱度高嘅廂房後方設有洗手間，設備齊全。四方八面嘅磚牆締造出一種古堡酒窖嘅雰圍，格調輕鬆中流露出品味與氣質。網上訂座流程相當簡易，開放時間由用餐日期前三十日起，講明最低消費為每人一份廚師發辦晚餐，額外收NT 500蛋糕清潔費。開瓶費則有二，分別為NT 1,000/瓶標準裝葡萄酒、清酒等釀造酒，及NT 1,500/瓶標準裝氣酒、烈酒、及其他蒸餾酒；因深覺收費合理，結果就選擇自攜佳釀。餐桌嘅每位席上都有個拉櫃。拉開櫃桶，頂面可見店子唯一提供嘅節令品嚐料理（NT 3,880/位）；如有食物敏感要廚房注意，大家記緊要於訂座時道明。九道菜餐單上嘅每一道菜刻意只列出食材而省去餸名，全因大廚著重食材嘅根源，即台灣本土，故亦選以台灣國花之梅花嘅拉丁文「MUME」作店名，確真有意思！食乜冇得揀，但藏於櫃內嘅餐具就任食客自行選配。晚宴正式由招待貴賓嘅小點心作序，仲要由行政總廚Chris哥哥親自送上，誠意盡在不言中！開胃前菜直接用手食用，夾心餅層春卷皮薄如紙張，咬落好似威化咁脆巧，以燈籠果醃製而成嘅雞肝醬慕絲餡心香濃潤滑，且毫不溜滯，勁配啱啱喺日本買黎嘅清酒，成功激發食慾。白蘆筍/剝皮辣椒/鹽昆布：台灣彰化出產嘅白蘆筍四月春季最當做，打頭陣夠哂壓場！由於白蘆筍本身白雪雪冇乜睇頭，師傅就巧妙地以彩艷嘅食用花及燈籠椒皮拼上鹽昆布作小綠葉配襯一番，砌出嘅美食藝術品充滿田園風味，精湛吸睛！粗粗長長嘅白蘆筍清爽脆口，黏上前方橙黃色以剝皮辣椒製出嘅法式沙巴雍醬及後方綠色嘅芥末豌豆泥即添上芬芳香潤。鰹魚/樹番茄/紫蘇：食法國大餐梗係唔少得魚魚啦，何況台灣咁多海產，結果食咗兩道。第一款魚生頭盤為本地鰹魚。厚實鮮濃嘅鰹魚先以日本柴魚高湯醃製，上枱時浸浴於由樹番茄、羅勒、柑橘、辣條等組成嘅香草油內，直令魚魚嘅下半身變得柔滑香軟；頂面再以洛神花、紫蘇梅及刺蔥加以點綴，菜式酸酸咸咸，口感豐郁尤甚。自製酸麵包/老菜脯奶油：自家製嘅酸麵包皮脆包鬆軟，但主角其實係旁邊另上嘅陳年28年嘅老菜脯奶油！明顯大家對「老菜脯」相當陌生，唔係好識國語嘅姨丈仲扮聽錯人地講「老太婆」，冷笑話逗得姨媽最開心。據悉，老菜脯乃醃蘿蔔，為當地嘅天然養生秘方，咁堅一定要試真啲喎！佈滿黑點嘅老菜脯牛油微酸微咸唔會過激，都幾得意嘅。白帶魚/黃酒/紫蘇梅：第二味煎白帶魚嘅外觀延續頭盤嘅花花主題，並加插咗分子泡泡嘅元素。焦香咗嘅魚皮酥脆巧薄，無奈厚厚嘅魚肉偏嚡同乾。色彩滿滿嘅泡沫醬汁以魚骨高湯作基礎，混入糟滷及紹興酒秘製，個味有少少似醉雞咁，入面嘅櫻桃蘿蔔用紫蘇梅醬醃製過，酸酸甜甜中又有啲咸咸地，講真成個餸唔係咁啱自己口味。鮑魚/綠竹筍/鮑魚肝：鐵色嘅碟盤同餐店門面嘅色調好夾，感覺鮑魚係重點菜，嘻嘻，不過每人只有半件好似唔係幾夠喉。以清酒、柴魚、昆布等高壓燉煮嘅南非鮑魚軟糯得黎仍保持Q彈嘅口感，塗點中間嘅鮑魚肝醬即倍添鮮濃，伴配嘅台灣綠竹筍以日式佃煮方式烹調，清脆甜美不俗套。軟絲/自製香料香腸/紅甜椒：菜式別號為「軟絲鳥巢麵」，原來係主廚嘅代表作之一，靈感明顯源自意大利粉。但寬闊長長嘅「麵條」其實一啲麵嘅成份都冇，條條都係用軟絲身體最嫩嘅部份搓出，軟嫩帶脆。不一樣嘅肉醬內含台灣特產嘅鵝油辣椒、紅甜椒、金棗、紅甜椒、巴西里，精髓在於師傅研創出由軟絲剩餘嘅部位，包括啲腳腳、內臟同軟骨，混成嘅辣腸，香辣惹味且鮮美獨特，毫不浪費食材之餘，更表現出其創作力量同幻想，妙哉！和羊臀肉/馬告/櫛瓜：和牛就食得多，「和羊」真係第一次聽到，家人好自然地估係日本羊，點知羊羊來自紐西蘭高地，因級數可媲美細緻嘅和牛，故被美食界封為「和羊」，係廚師們嘅紅肉新寵。經低溫熳烤嘅和羊臀色澤紅潤，油脂唔多，肉質相當鬆軟，意外地一啲羶味都冇，沾上用牛肉高湯𤉶煮嘅馬告胡椒汁即有提鮮醒神之效；所選用嘅馬告胡椒野生於台灣高山野生，係獨特嘅香料。旁邊爽脆香濃嘅配菜均為台灣本土種植，除咗幾片娃娃菜之外，當中主材「櫛瓜」屬高纖低醣嘅健康食材，又一台廚竉兒。‘大湖’草莓/玫瑰/優格：甜品環節繼續以繽紛嘅色彩刺激視覺，未食心情都已興奮雀躍。頭場紅艷嘅冰沙散發出淡薄嘅玫瑰香，墊底嘅大湖草莓清爽甜美，配上輕盈嘅荔枝味乳酪為甜品加咗層軟滑感，吃畢春天嘅氣味仍洋溢於口腔。脆皮泡芙/椰子/土芭樂：尾場半腍半脆嘅土芭樂泡芙一口一件，微甜不溜滯，極易入口。舅父勁有心，早就訂好草莓蛋糕俾靚靚媽咪許願拍照。店主亦加送生日甜點與祝福，暖意盎然！台北前星級食肆「MUME」雅致樸實，服務生親切周到，善用寶島食材所烹製嘅法式料理鮮美高質。主廚老闆敢於採用新興嘅肉類、蔬果及香料，配搭出嶄新味佳嘅組合，藝術性地演繹出「農場到餐桌」以作回饋及推廣，真心感激美饌藝廊為慶生派對帶來嘅驚喜！

巷子龍家常菜 (大安區)

探索台菜行動話咁快就黎到第三會合，頭嗰兩餐全權由晚輩XO仔揸fit揀咗新派秘店，壓軸就留返去試姨媽閨密推介且有啲名氣同歷史嘅「談話頭」。上網搵料訂位，方才知悉「談話頭餐廳」經過多次搬址後，早幾年連名都改埋做「巷子龍家常菜」；訂座只能靠打電話，客人必需提供當地聯絡電話號碼。店子門面最突出就係貼喺落地玻璃窗上又大又紅嘅「2021年米其林必比登推薦餐廳」標貼，比店名更起眼。室內光線充裕，用餐大堂十分開揚，只奇怪在喺並非滿座嘅情況下，七人派對竟然被安排入座狹窄一角嘅長枱，對長輩們出入不便之餘，夾餸亦有相當難度。細佬就係咁介意，留意到相中更適合家人嗰張圓枱成晚都冇人坐囉！兩頁餐牌只有中文版。牌上印出嘅餐廳名下方註明此店乃「談話頭後傳」，証明冇搵錯地方啦！黑板列出數款是日推介項目，同樣只有中文版。餐桌上擺有足七人嘅自用餐具。樓面只有一人工作，落單、傳菜、斟水等功夫一腳踢，寫菜時問多兩句難免會顯得不耐煩，不過當冇哂水飲想添，同要求攞公筷及換碟時都要睇佢面色就唔係咁過癮。現做菜飯（素；NT 220）：廣東人除咗白飯跟餸上之外，其他飯麵多數都係當單尾最後先出，唔知台灣文化係咪相反呢，未有餸食時第一道先上菜飯；其實家常便飯咩次序都唔緊要嘅，只係自己鍾意諗野姐。以雪菜同豆豆所炒出嘅飯粒十分飽滿，但就比較濕，幸好調味芳香得黎唔會過咸，熱辣辣好暖胃。蒼蠅頭（NT 320；NT 470/中）：普通食開嘅蒼蠅頭多數都係菜多肉少，巷龍版明顯用肉較多，菜肉比例更為平均，選用嘅半肥瘦豬肉好爽潤，菜式香脆少辣，可口有鑊氣。蘿蔔牛肉半筋半肉（NT 520/小；NT 780/中；NT 1,100/大）：牛筋腩調味香濃，個人只係略嫌當中嘅薑味太強仲有啲搶。大大件牛筋滑就夠滑，但煮得唔夠腍，對牙力有限嘅長輩有一定嘅難度，結果要搵刀叉幫忙，牛腩肉就腍身易咬得多，最正係入哂味又夠軟熟嘅蘿蔔。湖南金錢蛋（NT 320；NT 470/中）：據悉此乃鎮店招牌菜，來者必點，愛食蛋蛋嘅家人當然係唔會放過啦！平心而論，經過烚煮炸炒嘅金錢蛋雖然係香香地口，無奈蛋黃部份尤其乾嚡粉老，蛋白亦冇乜彈性，蛋蛋本身嘅香滑感盡喪，食落得個辣字，可能係各「蛋」入各眼吧。炒青菜（NT 230；NT 340/中）：清炒椰菜清脆利落。無錫排骨（NT 520/小；NT 780/中；NT 1,100/大）：排骨骨大少肉，唔用刀切根本食唔到，肉肉又硬又韌，而且超咸勁酸，不值一試！螞蟻上樹（NT 300；NT 450/中）：晶瑩透光嘅粉絲軟彈得黎唔會好油，簡單拌入肉碎、蔥花、椒絲炒出以夠香辣惹味。砂鍋魚頭（NT 1,100/小；NT 1,600/中；NT 2,000/大）：此味砂鍋魚頭為姨媽姨丈所點，小弟一向怕骨少食魚，外遊更加冇膽亂試，唯有交由相機代表食先。多得前傳創下嘅風光，台菜小館「巷子龍家常菜」可稱得上為半老字號。小店環境簡潔，可惜人手極度短缺，雖標榜絕不加味精，但地道台菜口味較重，未必人人接受得到。請大家留意，餸菜份量都幾大吓，建議邊食邊點，因為當晚服務生代選嘅份量遠超出八旬家人嘅食量，旅行中不便打包，結果就浪費收場！埋單只收現金唔出奇，怪在冇單對兼冇收據，人多最好心算定條數囉！講真食物唔算貴，質素唔算差，最重要係用餐前、中、後好多細微野加加埋埋令整體經歷唔係咁爽，市內其他選擇明顯吸引得多！