小樽手作咖啡 - 新光三越A11店 (信義區)

入住信義區嘅酒店，最方便就係購物，其中肥肥家族最愛於新光三越濕平，因為商店種類及款式最啱心水，而且更可即時辦理退稅手續。此外，台北商場最不缺乏咖啡屋，今次就俾姨媽們發現新光三越A11館內有間來自日本北海道嘅「小樽手作咖啡」。小店以木為主嘅裝潢十分簡潔，服務生亦相當友善。吧位配上小枱燈嘅設計令氣氛更為輕鬆寫意。五頁餐牌均附上詳盡解說及彩式插圖。多款飲品中，外型最普通就係杯「凍小樽秘制煉乳調和珈琲」（NT 140），不過凍珈琲香醇甜美，而且滑溜非常。姨丈所點嘅「爵士炭燒珈琲」（NT 140）即叫即燒，芳香洋溢。最可愛必選靚靚媽咪及姨媽們所點嘅「橘皮風味拿鐵珈琲」（NT 140）及「沖繩黑糖拿鐵珈琲」（NT 140），因打起嘅奶奶泡沫為立體嘅史努比及其他卡通模樣。商場咖啡店「小樽手作咖啡」環境簡潔企理，即叫即調之手作珈琲造型可愛，芬芳味佳，實屬打卡熱點也。

台北國賓大飯店-樓外樓 (中山區)

小表弟迎娶嬌妻，舅父特選於「台北國賓大飯店」擺酒大宴親朋。婚宴設於酒店十二樓之「樓外樓」宴會廳，環境高雅得很，四周以鮮花點綴，散發著芬芳及雅致。除咗靚花擺設及菜譜之外，每席都有糖果及馬仔，寓意甜甜蜜蜜。每位賓客更有鳳梨酥及精美「囍」蜜糖帶回家，一同分享此份甜蜜喜悅。晚宴共有十二道菜，確真豐富。和風龍蝦沙拉：以蕃茄墊底o既沙律清新潤甜，喺面疊上爽脆o既龍蝦及沙律醬，紅當當o既組合好睇又好食。六喜碟：由服務生續一分配o既潮派六味喜碟分別為雞件、薄餅捲蛋、炸蠔、銀杏、腐皮卷、及炒年糕，顏色鮮橙奪目，食落均香濃惹味。花好月圓：意頭咁好，餸名又靚o既「花好月圓」原來係炸湯丸仔，煙煙韌韌都幾得意。珊瑚魚翅盅：嘩，魚翅每盅都咁大碗同咁足料，啲翅成梳喺湯面可謂睇頭十足，認真唔講得笑！靚翅厚而爽潤，湯底亦濃而不俗，爆！麻醬鮮鮑：清蒸鮮鮑就食得多，以麻醬作鮮鮑o既調味都係第一次食。鮑魚質感雖則軟腍，無奈麻醬o既味道實在太搶，所以就唔係好食得出任何鮑魚o既鮮甜味。掛爐烤雞：意外地，烤雞外表肥厚，但香脆o既雞皮下並無太多脂肪，就連雞胸肉都一啲都唔嚡，肉質軟嫩可口。茄汁蝦球佐花卷：甜酸蝦球一人一大隻，體積絕對夠哂大體！咬落層炸皮鬆化乾脆，蝦身更加係爽厚潤甜，個個食到嗦嗦聲，冇得頂呀！清蒸老虎斑：老虎斑魚肉幼嫩滑溜，鮮味無窮。貝酥油飯：原來「貝酥」乃乾瑤柱個靚名，細佬又上咗一課。油飯粒粒晶瑩飽滿，油潤有光澤，伴上脆身惹味o既貝酥猶如畫龍點睛，更上一層樓。鴛鴦美點：甜品環節家人都忙於拍大合照，小肥就襯排隊時不停偷食超級香口而且唔係太甜o既紅豆薄罉。XO仔首次於台灣參加婚宴，有幸於名酒店「台北國賓大飯店」o既「樓外樓」宴會廳見識到台式婚禮多麼高貴又溫馨，氣氛好好，當中潮派中菜美觀又美味，實在令人難忘。再次恭喜小表弟成家立室，舅父多咗個好媳婦！

這一鍋皇室秘藏鍋物 (大安區)

去台灣玩，家人第一句都會話想食火鍋，上次同班姨媽食過美如藝術般o既「寬X子」後，今次就決定一試潮興熱店「這一鍋皇室秘藏鍋物」。人氣火鍋店最與別不同之處就係門面及室內裝修o既設計都用上兵馬俑作題。正門有迷你水池及木橋，由兵馬俑守門真夠威嚴。推開重重o既鐵門即見龍椅一張，更顯氣派。用餐大堂所有散座均為方形木造枱櫈，並以屏風隔開，中國風得黎清爽簡潔。四周有不少靚花擺設，感覺甚為雅致。最有古代感就係洗手間門外寫有「男」字及「女」字o既布簾，認真搞鬼。小肥早已托台灣女朋友訂座，一行九人到步即被安排入座廂房，餐桌上亦早已擺放好茶具。細心一看，方才留意到碗碟茶杯均為翠玉色系列，貴氣十足。每人一塊紅色o既掛頸紙圍裙，衛生非常。細問下先知原來圍裙上o既「呷嘎宋嘎」意思原來係「吃得很爽」；好，就睇吓食完會幾爽！厚本餐牌頭幾頁先講解推廣優惠、靚鍋底賣點、幾篇火鍋傳說及鍋品食用秘訣。散點火鍋料項目全伴上彩圖對照，計埋大圖共有十二頁之多。消費指南及細則如最低消費額等，就列咗喺尾頁，有埋圖表夠哂清晰易明。老火湯（NT 110/人）：據餐牌所講，老火湯底以大豬骨、雞骨、豬後腿肉及多款中藥等精髓所燉製而成。奶色o既老火湯肉味香濃，且傳出陣陣胡椒味，餐前先嚐一碗直令胃口大增。翡翠鮮蝦滑（NT 380）：因為港版蝦滑大多為灰色，所以當見到蝦滑如此皎潔雪白時真係有啲意外。煮熟咗o既蝦滑爽脆彈牙，鮮甜可口。黑玉墨魚滑（NT228）：同白雪雪o既蝦滑成對比o既墨魚滑色澤真係黑得夠哂勻循，幸好咬落柔潤有彈性，唔錯。梅花豬肉（原價NT 268，拼埋「和牛梅花」則可以優惠價NT 10享用）：豬肉雖切成薄片，但個人覺得肉質都係偏嚡，如果唔係半送的話一定唔會叫黎食。雪花牛肉（NT 268）：砌到一朵花咁o既雪花牛肉片從紋理睇講真唔多似雪花，色調又唔夠鮮明，食落唔夠軟滑亦冇乜肉香，請恕細佬未能推介。培根牛肉（NT 338）：據餐牌簡介所述，培根牛肉o既油花分佈應最均勻，但如相所示，碟中o既白色肥膏全積聚於一邊，個人覺得絕不均勻，煮熟咗亦屬嚡口之列，不吃也吧。極神仙牛肉（NT 488）：多款牛肉中只有兩款啱XO仔口味，其中極版神仙牛肉薄片掛於架上，以乾冰營造出仙氣，外觀最為震撼。神仙牛肉o既雲石紋就真係表現出靚牛肉o既油脂如何均勻，即煮即食半溶於口中，肉香軟腍，何其美妙！和牛梅花（NT 588）：第二款靚牛就係最薄巧o既和牛梅花。和牛紅白o既紋理同極神仙牛肉可謂不相伯仲，講真飲咗幾杯後，兩者質感如何不同已難以分辨，只係覺得好食就夠。松阪豬肉（NT 328）：松阪豬肉片疊成玫瑰花形，這個外表同之前喺「寬X子」食過o既有八成相似，但「這一鍋」個版本就明顯少配咗個鮮蛋黃醬汁。可能係先入為主o既關係啦，未黏上蛋黃o既松阪豬肉雖則夠爽，但就欠缺咗份柔滑，有陣時菜式o既靈魂就是隱藏在那一點點。。。鮮跳活蝦（NT 268）：小肥一向少食蝦蟹，尤其係當身處於異地時，不過見蝦隻當真係活生生咁喺隻碟上跳來跳去時就不得不拍下照片與大家分享。半殼扇貝（NT 368）：扇貝體積同彩圖一樣咁大隻，烚熟咗仍能保持爽厚嫩滑，！青竹蚌（NT 268）：睇相已知青竹蚌其實即係蟶子。蟶子原條冰陣上枱，夠哂體頭，可惜滾兩滾同滾耐啲蟶子都一樣咁韌，即使味道幾鮮，咬唔到已大打折扣。五彩鮮蔬盤（NT 198）：鮮綠色o既蔬菜均新鮮爽脆，實屬正菜也！福氣粥（NT 100）：最後加NT 100即可加碗白飯由服務生以鍋底即煮香濃鮮甜o既福氣粥。雖然九人只可每人分到一小碗，但靚粥極之暖胃，一小碗就已經夠哂。乳酪冰沙（免費贈送）：清涼o既冰沙味道就好似益力多咁多甜微酸，飯後一小枝有助解熱消滯。台灣人氣連鎖火鍋店「這一鍋皇室秘藏鍋物」裝潢極富中國色彩，格調輕鬆，服務優質，環境又夠衛生。XO仔可能係因有比較下，總覺得「這一鍋」除咗老火湯底及福氣粥最有賣點之外，火鍋料反而不及市內其他火鍋專門店，不過其價錢講真同時亦比某幾間便宜，要揀去邊間食就要睇大家追求啲乜野o既享受啦。

嘟柏林鐵板燒餐廳 (大安區)

小表弟週六娶妻，舅父仔早一晚就招呼香港代表o既親戚去佢家常幫襯o既「嘟柏林鐵板燒餐廳」食半西半日又帶少少中o既新潮鐵板料理。餐店正門喺金漆招牌旁有盆靚靚o既蘭花，高雅簡潔。直入先行經擺滿紅酒o既水吧。十多人o既派對安排於最入o既廂房內進行。主人家早已訂好菜單，每個位置亦擺有齊備o既西式餐具、醬汁及花生小食。蒜蓉包：可任添o既蒜蓉包厚而鬆化，外脆內軟，香濃惹味。南瓜海鮮湯：鮮橙色o既南瓜海鮮湯以大貝殼承載著，外表相當吸引。熱湯芳香輕巧，香滑而不溜滯，配搭新穎，效果討好。鱈魚：師傅即場喺貴客面前為雪白o既鱈魚調味及半燒半蒸。熱辣辣o既鱈魚鮮甜嫩滑，微微唧上青檸更添清新，實屬好魚也！燒蠔：講真自己都係第一次食鐵板式燒蠔，真係冇諗到可以燒至如此香口，薄薄o既外皮脆巧o既同時，蠔隻仍能保持肥潤，好有驚喜！芝士龍蝦：厚厚o既龍蝦爽脆潤澤，鮮甜無比。梅子沙律：交接海陸主菜之時，姐姐先送上沙律一碗。梅子沙律清新醒胃，最正就係塊又甜又多汁o既粟米，堅爽！牛扒：燒煮牛扒前，師傅先續一問及客人要求之生熟度，結果全場只有細佬一個要見紅o既三、四成熟。牛扒均切成薄片，肉質鬆軟，且肉汁豐盛，簡單點上鹽同胡椒已夠美味。翡翠苗：鮮綠o既翡翠苗幼嫩帶脆，無可挑剔。三色鮮果：三款水果一樣爽甜。芋蓉燒餅：鐵板燒餅脆薄輕巧，如要減少或增加芋蓉餡料份量，可直接跟師傅提出。餐後仲有餐茶或咖啡包埋。「嘟柏林鐵板燒餐廳」環境樸實，服務優良，潮派鐵板料理混合中、西、日之廚藝，師傅所烹調出黎o既海陸配搭質高味佳，且不乏驚喜元素，當真感激舅父仔悉心安排！

樂沐法式餐廳 (西屯區)

肥叔叔早年遷往台北工作，愛飲好食o既佢每次返港聚餐時都定必會大談食經。得知肥肥家族將飛往台北參加婚宴，佢就提議四口子早一日出發先坐高鐵去一轉台中，一訪由美女廚神開辦o既法國餐廳「樂沐法式餐廳」，細嚐佳餚已值會票價咁話；講到咁犀利，我地當然係要去見識吓啦！三層高o既「樂沐」猶如一座洋式別墅般，大門前方有個方形水池及小花園。打開白色木門，步入樓底高高o既大堂，面對著接待處已感到餐店o既氣派。核實訂座後，即由專人帶領往上層之用餐區域，貴客可選擇行樓梯或搭乘升降機。店子內外o既燈飾、鮮花、擺設、傢俱等，包括洗手間都流露著華麗o既格調。同樣樓底極高o既用餐大堂環境優雅，光線柔和，空間感足。餐桌雪白色o既枱布上有齊備o既酒杯及餐具。小肥早於網上訂座時為家人從三個規範餐單「創造」、「感官」、「記憶」中選訂午餐，故埋位後服務生只需送上餐牌對應就知邊個點邊款。每款菜單均可加錢玩埋配酒，結果當然係由最飲得o既靚靚媽咪試啦！侍酒師不單加配日本清酒，更呈上店子自家品牌o既香檳，就連紅酒都用上潮流新興o既Coravin取酒器，可謂驚喜不斷。搞掂好飲品，姐姐即送上兩款海藻味及海鹽味牛油，告知大家可先食用花瓶內修長o既麵包條，食完佢地會陸續換上不同款式o既自家製麵包，當中最正必選熱辣香醇惹味o既高梁酒臘肉包及芳香微甜o既蜂蜜麥包。全場貴客o既午餐都係由節令下酒菜作序。下酒菜共有兩道，第一味為金光閃閃o既「黃豆卷拼香草芝士球」。相中左手邊o既黃豆卷皮脆餡軟味淡，剛巧同右手邊件濃味o既香草芝士球造成對比，都幾得意。第二道下酒菜「海鮮脆米通」用上o既餐碟同樣別緻。鮮黃色o既米通鬆化脆巧，連同米通上o既帶子魚碎食落口即增添鮮嫩。細佬所點選o既「感官」午餐先由熱湯「鮮鵝肝/芥菜心/香草」接捧。上枱時，湯碗以一塊薄薄o既鵝肝醬蓋上，再由服務生續一斟入清湯，鵝肝醬隨即溶化並為湯品揭盅，露出碗內其他湯料，賣相極之震撼吸睛。可能自己唔係太鍾意食菜啦，故對菜味極濃o既清湯只可以用「苦」字黎形容，幸好鵝肝醬幫忙調和咗陣菜味，先變得易入口得多。午餐第一款肉為顏色鮮美o既雞翼組合「古早小母雞翅/甜蝦/番茄/酸黃瓜/香草蛋黃醬」，另配一小杯黑色o既甜豆湯。已去骨o既雞翼包住咗甜蝦同雞肉，皮脆肉爽嫩，輕輕點上色彩繽紛o既香草蛋黃醬就好比畫龍點睛般同時提升視覺及味覺o既享受，妙極！接著o既「緬因龍蝦/西班牙辣腸/香草青醬/覆盆子」色澤同樣鮮美，師傅以不同調味、醬汁、緬因龍蝦等食材重新砌成一幅立體o既龍蝦食物圖，當真令人嘆為觀止！龍蝦肉爽脆彈牙，配上秘醬同時帶出花香、果甜及微辣，味道複雜得黎和諧新穎。主菜上枱前，哥哥先以銀盤展出多把靚刀讓食客挑選。再將刀子安全地擺放於牙形o既刀架上，「樂沐」o既女主人明顯喺用餐所有細節都有花下不少心思。「感官」o既主菜「嫩烤鵝肉/姬松茸/芥菜/米湯」雖外貌為最平凡o既一道，味道卻絕不遜色之前道「緬因龍蝦」。汁液上枱時先會即場淋上，以確保新鮮度，碟上兩件鵝肉皮層香脆，肉質厚而鬆軟多汁，可以話係小弟至今食過最好味o既鵝肉；伴碟o既姬松茸則芳香惹味嫩脆，一樣咁出色！甜品出場前先由清新爽甜o既「香桃雪葩」為味蕾洗滌一番以作準備。套餐第一道甜品杯「可可清湯凍/焦糖蘋果塔雪酪」其實係朱古力味淡淡o既啫喱拼果香甜甜o既焦糖蘋果雪葩。有陣時人就係咁，總會覺得隔離飯香；不如大家做個評判，睇吓大肥爸爸所揀嗰份「記憶」午餐個甜品「睡蓮」係咪比細佬杯「可可清湯凍/焦糖蘋果塔雪酪」奪目先。。。嘻嘻，正當幾口子仲讚嘆緊「睡蓮」極之中式時，XO仔面前就出現咗紅黃鮮明且時代感極重o既「現代主義之乳酪蛋糕」！美女廚神彷彿正要由菜式道出自己同時擁有傳統中國思維，但亦有留意其他國家前衛o既藝術風。餐牌上注明，芝士蛋糕o既紅、白、黃網格外型構思源自荷蘭藝術家「彼埃•蒙德里安」（Piet Mondrian）及「密斯•凡德羅」（Mies van der Rohe）o既「新造型主義」風格。極富立體感o既芝士蛋糕微甜軟潤，輕巧不溜滯，放進口中就好似吞噬咗件藝術品般，認真搞鬼。食到咁飽最好就係飲番杯飛沙走奶o既特濃咖啡。跟餐茶及咖啡最後仲有的骰o既「精緻小點」；每人都有兩粒，細細粒，容易食。黃色小球乃脆皮清涼o既乳酪雪糕棒，而兩球中央嗰件則為巧薄爽脆o既鳳梨塔，兩者均微微酸甜，毫不溜滯。台中名法國餐廳「樂沐法式餐廳」洋房式o既設計大方高雅，就連服務都可稱得上為酒店級，多道精美且高質o既佳餚令XO仔與家人一同感受到不一樣的感官世界；當真感激肥叔叔咁好介紹，得以發現原來由台北坐高鐵去台中係咁方便o既，即日來回只為「樂沐法式餐廳」亦絕對物有所值！