橘色涮涮屋 新光A9館 (信義區)

疫情後初次與居台嘅家人相聚，地位最高嘅舅公專登選於鄰近酒店嘅「橘色涮涮屋」新光A9館盛設款待，為一眾晚輩洗塵。名牌日式火鍋店金亮嘅竹林設計由門面延身至室內，時尚雅緻，甚有氣派。十多人派對於私人廂房內進行，光線充裕，私隱度高，且有專人招待。每位席上有齊備嘅自用餐具及調味配料。眼見長長嘅餐桌中央有兩個大金盤，大姨丈即鬼馬地問係咪用黎洗手，成功搞起個氣氛。深知姨媽們最愛食蟹蟹，舅公第一時間即點原隻北海道鱈場蟹，新鮮貨色當然係要於飯前繞場一周顯示實力啦！姨姨認真客氣，仲備好日本名牌十四代清酒！（開瓶費NT 500/樽）火鍋套餐揀咗清啲嘅昆布柴魚湯。第一道先上「綜合菜盤」，由哥哥仔代為灼煮。菜盤內含嫩口嘅豆腐、軟彈嘅蟹角同菇菇、爽甜嘅粟米等。另跟嘅開胃前菜共有三款選擇，個人首選幼滑清甜嘅和風蘆筍豆腐。主廚前菜每天不同，當晚嘅串燒炸雞熱辣香脆，份量堅勁，十幾人分咗六串已經飽咗一大半。等待廚房炮製生猛嘅蟹蟹時，食肉獸先享用紅肉主菜。紐澳薄切牛舌（NT 1,280/套餐）：切得夠薄嘅牛脷爽潤富彈性。頂級松阪豬（NT 1,230/套餐）：大大塊嘅松阪豬肥膏頗為強勁，正因如此，煮出黎先可以咁鬆爽唔嚡口。日本黑毛和牛板腱（NT 3,100/套餐）：柔潤嘅黑毛和牛紅白雲石紋理分明，半溶於舌上嘅口感最正，油脂一啲都唔過份，所以食多兩片都唔覺溜滯。日本頂級和牛（NT 4,300/套餐）：有比較下，反而頂級和牛最厚身同帶微微韌，要二選一的話，個人覺得黑毛和牛板腱更為可口兼化算得多。北海道鱈場蟹（時價）：壓軸上場嘅鱈場蟹共分開兩部份，白肉燈紋嘅蟹腳由師傅燒出，靚蟹如絲絨般幼嫩，爽厚多汁，冇得彈呀！其餘部位就交由貴客自己煮。鱈場蟹鮮甜無比，超！跟餐嘅單尾大家都揀食粥，睇住哥哥仔熟手地撈入白飯、蛋蛋、碎蔥、紫菜，索盡湯底嘅精華，已教人興奮不已！橙美亮麗嘅粥品熱辣辣、香噴噴，入口軟綿暖胃，鮮香濃甜。節令水果：由於腸胃已經冇哂位，大家決定放棄甜品，真係冇諗到經理姐姐會安排幾款清爽嘅節令水果為客人幫助消化。和風涮涮鍋專門店「橘色涮涮屋新光A9館」高雅衛生，服務優良周到，晚市海陸主菜中嘅幾款和牛、北海道鱈場蟹新鮮高質，出色味佳，客似雲來實不無道理！

橘色涮涮屋 二館 (大安區)

台北出名美食多，冬天最受歡迎當然係火鍋啦！由於團友十二人嘅口味不一，麻辣及藥材均屬太重口味，姨姨就提議清少少食日式涮涮鍋，一齊試試佢同事極力推介嘅「橘色涮涮屋」係咪真係咁掂。人氣火鍋店暗黑嘅門面其實有啲難搵，幸好迷途小羔羊入錯咗第二間大廈門口都可以遇上好心人帶路，相信這就是出路遇貴人哦。「橘色涮涮屋」品牌嘅「二館」分店全為廂房設計，走廊通道嘅石徑設計和風味濃，襯托上亮燈屏風，裝潢即顯得十分時尚。可能家人身型個個都有返咁上吓，感覺十二人嘅廂房有少少窄，但眼見餐桌上有足夠空間擺放齊備嘅餐具、調味料及兩個大爐，或許是自己過肥而已。埋位第一樣就梗係要點酒飲啦，呵呵呵，飲咗幾多就唔話俾大家聽啦。初次光臨，翻閱多頁餐牌後都未能決定如何點菜。友善嘅姐姐仔耐心地簡單解說後，得知多位長輩食量不多，就建議十二人不妨點選九份套餐，每四人一組分黎食，唔夠先再追加，細心得很！落好單，先有熱辣辣嘅清湯兩大鍋。第一道上場嘅為每款套餐都包有嘅「綜合菜盤」。細佬影好相相後，帶著手套嘅肥哥哥即代勞將雜菜有系統地轉移入熱鍋中，衛生非常。「綜合菜盤」中有甜甜嘅粟米及魚蛋片、嫩滑嘅豆腐、香軟嘅冬菇、減肥佳品嘅芋絲等。等待蔬菜煲煮時，各人可先享用前菜。套餐嘅前菜共有三款可選，分別為「和風蕃茄」、「和風生菜沙拉」、「和風蘆筍豆腐」。因共點咗九份套餐，小肥就好順理成章咁每款要三客，點知上枱時居然全部都有四客，亦即十二人都有一份！據悉此舉原來係店子特別「招待」，亦即送贈給大家，確真令人感激不盡。前菜中嘅「和風生菜沙拉」因內含果仁，故小弟未有緣一試。鮮紅潤澤嘅「和風蕃茄」已預切成四至五件，蕃茄軟腍多汁，以豉油及蒜粒調味即倍添惹味。「和風蘆筍豆腐」嘅主角豆腐幼嫩輕盈，頂面伴配清脆嘅蘆筍及甜甜嘅蟹柳，組合十分清新。平心而論，三款和牛主菜同樣高質，單憑相片都可以清楚睇到和牛薄片嘅紅白雪花紋理清晰粉嫩，如果唔係同場比較下，當真難而道出大大片嘅「頂級日本松阪和牛」（NT 4,200/套餐）最為軟嫩柔潤。「黑毛和牛嫩肩」（NT 3,000/套餐）嘅脂肪率看似偏高，但入口半溶於口腔嘅同時又帶有微微嚼口，吃畢亦不感到溜滯，個人覺得性價比屬三款套餐中最高也。反而因有對比下，最後上嘅「黑毛和牛板腱」（NT 2,480/套餐）就顯得偏嚡咗少少，不過食落和牛潤而不膩，絕對唔係劣品。套餐嘅單尾同前菜一樣共有三個選擇，分別為以越光米煮出嘅「白飯」、「烏冬麵條」、「煮粥」。哈哈，真係冇諗到十二人竟然會咁齊心地要「煮粥」。粥品同「綜合菜盤」一樣由肥哥哥即場撈煮，即煲即食，包保新鮮滾熱辣。混入咗紫菜、蛋花、碎蔥等配料煲製嘅靚粥索盡涮涮鍋中嘅精華，每人一碗後仲有得添，份量十足，而且鮮甜濃郁，窩心暖胃。送粥附帶爽脆醒胃嘅醃菜三味，都係有十二份架，這就是盡在不言中的無微不至！可能係見到酒瓶內仲有半樽酒未飲啦，肥哥哥突然呈上十二碟小食「龍膽石斑南蠻漬」以作送酒之用，似乎這種「招待」應改稱為「禮待」才恰當。據餐牌所示，甜品環節應有三款可選，分別為「杏仁豆腐」、「焦糖布丁」、「當日甜品」。其中「當日甜品」為芬芳香潤嘅「椰香雪花糕」。「杏仁豆腐」清涼微甜。「焦糖布丁」則軟滑甜濃。除咗每款甜品送上四份之外，最後每人仲額外加送清爽清甜嘅「節令水果」。和風「橘色涮涮屋」時尚雅緻，服務生體貼好客，十二人只點上九份和牛套餐，卻免費送足十二份配套前菜及甜品，驚喜禮待可謂溫情暖意洋溢。晚市套餐用料高質，和牛、靚粥美味可口，絕對係貨真價實，值得推薦！

Café MUJI (信義區)

離開台北嗰朝早，小肥原本想去新光三越A11內某家卡通主題咖啡屋度食早餐嘅，無奈去到先知小店根本冇位坐。因時間有限，一行七人唯有急忙地喺商場另覓餐廳，幸好一上到三樓就俾眼利嘅姨長發現有間「Café MUJI」。家人對「無印良品」都非常熟識，亦好有信心，故唔洗多諗就入咗去搵位。意外地，店子樓面頗高，四周木造嘅間隔及傢俬嘅感覺極之溫和舒適，食客可隨意翻閱架上嘅雜誌刊物，輕鬆寫意得很。餐牌只有中文版。甜品款式則附有彩圖參考。落好單，俾哂錢後，友善客套嘅服務生隨即準備餐飲並續一呈上。餐具及開水均設於一旁供食客自助提取。冷手沖濃縮咖啡歐蕾（NT 100/大杯）：咖啡歐蕾香滑冰涼。蜂蜜烤雞芥末醬三明治（NT 200/一份）：即叫即烘嘅蜂蜜烤雞芥末醬三明治底層塊麵包鬆化香脆，雞件厚潤惹味。檸檬糖霜磅蛋糕（NT 70）：反而檸檬糖霜磅蛋糕就偏乾同硬，最為失色。「Café MUJI」光鮮企理，服務生溫婉體貼，早市套餐質高抵食，咖啡又夠濃滑，實屬簡單早餐嘅好去處。

小樽手作咖啡 - 新光三越A11店 (信義區)

入住信義區嘅酒店，最方便就係購物，其中肥肥家族最愛於新光三越濕平，因為商店種類及款式最啱心水，而且更可即時辦理退稅手續。此外，台北商場最不缺乏咖啡屋，今次就俾姨媽們發現新光三越A11館內有間來自日本北海道嘅「小樽手作咖啡」。小店以木為主嘅裝潢十分簡潔，服務生亦相當友善。吧位配上小枱燈嘅設計令氣氛更為輕鬆寫意。五頁餐牌均附上詳盡解說及彩式插圖。多款飲品中，外型最普通就係杯「凍小樽秘制煉乳調和珈琲」（NT 140），不過凍珈琲香醇甜美，而且滑溜非常。姨丈所點嘅「爵士炭燒珈琲」（NT 140）即叫即燒，芳香洋溢。最可愛必選靚靚媽咪及姨媽們所點嘅「橘皮風味拿鐵珈琲」（NT 140）及「沖繩黑糖拿鐵珈琲」（NT 140），因打起嘅奶奶泡沫為立體嘅史努比及其他卡通模樣。商場咖啡店「小樽手作咖啡」環境簡潔企理，即叫即調之手作珈琲造型可愛，芬芳味佳，實屬打卡熱點也。

亞都麗緻大飯店-天香樓 (中山區)

今次媽咪四姊妹們訪台最主要o既目的其實係要探望居台o既兩位長輩 。舅父仔同舅公年紀輕輕，輩份高，二人不但送贈大袋細袋o既手信禮品，仲專程由淡水開車到信義區「台北寒舍艾美酒店」 ，接送六人往返中山區「亞都麗緻大飯店」，喺「天香樓」度食高級杭州菜。酒店每個角落都有鮮美o既靚花 ，華麗悅目。酒店中菜廳「天香樓」正門有小橋流水，襯托埋四周木造o既橫樑，裝潢雅致得黎極富傳統中國色彩，氣派十足。舅公認真客氣，除咗點選咗晚宴套餐之外，仲額外叫多咗幾味前菜、鮑魚、蟹粉同東坡肉，更一人附送一本中、英文版任揀o既「杭州菜的故事」添 。 蕃茄前菜（價錢不詳）：此味蕃茄前菜喺餐牌上搵唔到，亦要由舅父仔同舅公示範，先知原來係要用匙羮連汁「筆」黎食。蕃茄粒好爽滑，姨媽同舅公就覺得醒胃，不過小肥就覺得好似聽到嫲嫲叫咁，好「孫」（酸） ！ 拌萬年青（NT 250）：薄薄o既蓮藕片同幼幼o既荀絲清香脆口，輕盈健康。 龍井白蝦仁（NT 780/例牌）：細閱「杭州菜的故事」後，方才知道龍井被乾隆皇o既皇太后封為「貢品」。故事講述一位杭州廚師從蘇東坡o既一句「休對故人思故國，且將新火試新茶，詩酒趁年華。」領悟出龍井最鮮嫩o既時候正正就係河蝦最肥美o既季節，兩者雙合即創出杭州名菜「龍井蝦仁」。可能十一月並非河蝦o既季節，「天香樓」o既蝦仁質感雖然好爽脆，但就好似差咗陣鮮，加上炒製時落多咗粉 ，蝦仁就變得過黏，幸好龍井o既茶香清麗脫俗，為菜式挽回不少分數。 宋嫂鮮魚羮（NT 300/位）：顧名思義，「宋嫂魚羮」乃宋（五）嫂所創出。宋嫂其實係一名逃難老婦，與其叔仔喺杭州落腳後就單靠捕魚為生。機緣巧合下，一次為照顧病重o既叔仔時，就善用賣剩咗o既鮮魚，混入令人開胃o既薑、醋、酒、椒等刺激食慾o既調味，煲煮出一碗魚羮；叔仔食後，胃口大開，並迅速痊癒 。故仔傳到去南宋淳熙帝耳邊，為求一嚐魚羮即召見宋嫂，親証過「宋嫂魚羮」如何鮮美後當然係重重有賞啦，宋嫂就順應各方要求，開設小店，為名菜發揚光大。「天香樓」o既宋嫂鮮魚羮以瓦煲及名火滾住上，夠哂新鮮滾熱辣，魚羮鮮濃嫩滑，其薑、醋、酒味當真極其醒胃 ！ 牛扒鮑魚（價錢不詳）：正當大家都沉醉於幾款傳統杭州菜o既典故時，面前突然出現一碟中西合璧o既海陸組合，牛扒配鮑魚。中餐食鮑魚已經夠矜貴，但係用牛扒墊底都係第一次見，似乎大廚係要証明俾大家睇佢都有藝術細飽同創作天份 。牛扒係XO仔最愛o既三成熟，軟身得黎好夠肉汁，不過個人略嫌唔夠咸；鮑魚亦好腍滑。一口牛扒、一口鮑魚，口中o既肉香剛好吊出鮑魚o既鮮甜，配搭好有特色。席上幾位美女廚神卻因兩種食材有啲微微硬碰硬o既口感評咗兩句，更提出師傅可考慮將鮑魚換上一梳魚翅 ，相信會為視覺及味覺帶黎更豐沛o既享受。 左宗棠雞球（單點價不詳）：微辣帶甜o既左宗棠雞球偏乾同嚡，可算為整頓晚餐中最為遜色o既一道 。 蟹粉豆苗嫩白玉（單點價不詳）：適逢蟹季，舅公亦刻意加插咗一味蟹粉菜。金黃色o既蟹粉鮮甜無比，配角o既兩、三條豆苗亦翠綠嫩口。碗中o既兩球「白玉」其實係豆腐丸，其外表白滑，質感柔潤，塗上蟹粉食則更覺鮮美 。 花雕東坡肉（NT 320/位）：唔經唔覺已經食咗五款大菜，女士們都已經開始叫飽，估唔到壓軸每人仲有一小盅東坡肉送白飯！半肥瘦o既東坡肉軟腍滑溜，醇厚香濃，半溶於口中可以話係食豬肉最高o既境界 ！四大才子之一蘇東坡不但詩詞書畫樣樣精，電視劇都有提到其廚藝其實一樣咁耍家，其中「東坡肉」明顯亦取自其名。據書中記載，蘇東坡上任後即為西湖修提，為其重展容貌，好官形象深入民心，老百姓為表答謝都紛紛於春節送上其最愛食o既豬肉。由於豬肉實在過多，蘇東坡就命人切成小小方塊，再以其獨門秘方燒煮，並「連酒一起送」派俾每家每戶o既人民，怎料此句卻被誤聽成「連酒一起燒」，紅燒肉o既調味料中就加入咗酒，效果變得比普通紅燒肉更為甘香醇美 ；從此以後，此菜就被稱為「東坡肉」。 桔香酒釀甜湯丸（NT 160/位）：酒釀湯丸煙韌輕巧，桂花甘香撲鼻，酒味清秀淳樸，湯中鮮橙色o既柑肉更甜而不溜，飯後一小碗確令腸胃舒暢不少。舅父仔同舅公為訪台o既六位後輩洗塵，於「天香樓」請食高級杭州菜。酒店餐廳環境雅麗衛生，服務稱心又貼身，用餐時更可從小冊子學到多款杭州名菜背後o既一段故及烹調秘訣，極有意思 。師傅除咗懂得烹煮傳統杭菜，亦有顯示出自己o既新派作品，菜餚大多美味精彩，但都有需要改進o既地方，XO仔o既總評其實係OK與笑臉之間，希望最終決定給予笑臉可被視為小小鼓勵 。