橘色涮涮屋 新光A9館 (信義區)

疫情後初次與居台嘅家人相聚，地位最高嘅舅公專登選於鄰近酒店嘅「橘色涮涮屋」新光A9館盛設款待，為一眾晚輩洗塵。名牌日式火鍋店金亮嘅竹林設計由門面延身至室內，時尚雅緻，甚有氣派。十多人派對於私人廂房內進行，光線充裕，私隱度高，且有專人招待。每位席上有齊備嘅自用餐具及調味配料。眼見長長嘅餐桌中央有兩個大金盤，大姨丈即鬼馬地問係咪用黎洗手，成功搞起個氣氛。深知姨媽們最愛食蟹蟹，舅公第一時間即點原隻北海道鱈場蟹，新鮮貨色當然係要於飯前繞場一周顯示實力啦！姨姨認真客氣，仲備好日本名牌十四代清酒！（開瓶費NT 500/樽）火鍋套餐揀咗清啲嘅昆布柴魚湯。第一道先上「綜合菜盤」，由哥哥仔代為灼煮。菜盤內含嫩口嘅豆腐、軟彈嘅蟹角同菇菇、爽甜嘅粟米等。另跟嘅開胃前菜共有三款選擇，個人首選幼滑清甜嘅和風蘆筍豆腐。主廚前菜每天不同，當晚嘅串燒炸雞熱辣香脆，份量堅勁，十幾人分咗六串已經飽咗一大半。等待廚房炮製生猛嘅蟹蟹時，食肉獸先享用紅肉主菜。紐澳薄切牛舌（NT 1,280/套餐）：切得夠薄嘅牛脷爽潤富彈性。頂級松阪豬（NT 1,230/套餐）：大大塊嘅松阪豬肥膏頗為強勁，正因如此，煮出黎先可以咁鬆爽唔嚡口。日本黑毛和牛板腱（NT 3,100/套餐）：柔潤嘅黑毛和牛紅白雲石紋理分明，半溶於舌上嘅口感最正，油脂一啲都唔過份，所以食多兩片都唔覺溜滯。日本頂級和牛（NT 4,300/套餐）：有比較下，反而頂級和牛最厚身同帶微微韌，要二選一的話，個人覺得黑毛和牛板腱更為可口兼化算得多。北海道鱈場蟹（時價）：壓軸上場嘅鱈場蟹共分開兩部份，白肉燈紋嘅蟹腳由師傅燒出，靚蟹如絲絨般幼嫩，爽厚多汁，冇得彈呀！其餘部位就交由貴客自己煮。鱈場蟹鮮甜無比，超！跟餐嘅單尾大家都揀食粥，睇住哥哥仔熟手地撈入白飯、蛋蛋、碎蔥、紫菜，索盡湯底嘅精華，已教人興奮不已！橙美亮麗嘅粥品熱辣辣、香噴噴，入口軟綿暖胃，鮮香濃甜。節令水果：由於腸胃已經冇哂位，大家決定放棄甜品，真係冇諗到經理姐姐會安排幾款清爽嘅節令水果為客人幫助消化。和風涮涮鍋專門店「橘色涮涮屋新光A9館」高雅衛生，服務優良周到，晚市海陸主菜中嘅幾款和牛、北海道鱈場蟹新鮮高質，出色味佳，客似雲來實不無道理！

MUME (大安區)

靚靚媽咪壽辰，小肥同哥哥早已規劃好要帶領天生就係派對動物嘅家人高歌「Let’s go party party all night, oh oh oh oh」！為博靚媽一笑，當然唔可以敷衍選擇，經過慎重考慮後，決定一試表妹推介嘅法國餐廳「MUME」，曾鑊米芝蓮星星兼口碑喎，可謂雙贏！西餐店於四維路上彷如一間藝廊般，低調中散發出時尚藝術嘅氣息。灰白對稱嘅門面極富立體感，入口高咗兩級仲凹埋入去，左右兩邊嘅落地玻璃窗就形成凸出街嘅小立方，設計連落大雨水浸都唔洗驚，有特色得黎又夠實際。接待處擺咗個奬狀陣，生出嘅樹幹莫非係寓意著開枝散葉開分店？！散座大堂空間感足，以木拼鐵嘅裝潢清爽優閒，柔和嘅燈光由繩索吊出，古樸風格舒適不拘謹。後面廚房位置明亮潔淨，歡迎客人觀摩，透明度極高。十二人派對安排於神秘嘅地牢密室內進行，由於冇電梯或升降機，貴客必先行經店子中央嘅梯級。年輕溫婉嘅服務生細心體貼，除咗自動扶持年長嘅賓客上落樓梯，入座時亦有幫忙擺放隨身物及外套，有求必應。私隱度高嘅廂房後方設有洗手間，設備齊全。四方八面嘅磚牆締造出一種古堡酒窖嘅雰圍，格調輕鬆中流露出品味與氣質。網上訂座流程相當簡易，開放時間由用餐日期前三十日起，講明最低消費為每人一份廚師發辦晚餐，額外收NT 500蛋糕清潔費。開瓶費則有二，分別為NT 1,000/瓶標準裝葡萄酒、清酒等釀造酒，及NT 1,500/瓶標準裝氣酒、烈酒、及其他蒸餾酒；因深覺收費合理，結果就選擇自攜佳釀。餐桌嘅每位席上都有個拉櫃。拉開櫃桶，頂面可見店子唯一提供嘅節令品嚐料理（NT 3,880/位）；如有食物敏感要廚房注意，大家記緊要於訂座時道明。九道菜餐單上嘅每一道菜刻意只列出食材而省去餸名，全因大廚著重食材嘅根源，即台灣本土，故亦選以台灣國花之梅花嘅拉丁文「MUME」作店名，確真有意思！食乜冇得揀，但藏於櫃內嘅餐具就任食客自行選配。晚宴正式由招待貴賓嘅小點心作序，仲要由行政總廚Chris哥哥親自送上，誠意盡在不言中！開胃前菜直接用手食用，夾心餅層春卷皮薄如紙張，咬落好似威化咁脆巧，以燈籠果醃製而成嘅雞肝醬慕絲餡心香濃潤滑，且毫不溜滯，勁配啱啱喺日本買黎嘅清酒，成功激發食慾。白蘆筍/剝皮辣椒/鹽昆布：台灣彰化出產嘅白蘆筍四月春季最當做，打頭陣夠哂壓場！由於白蘆筍本身白雪雪冇乜睇頭，師傅就巧妙地以彩艷嘅食用花及燈籠椒皮拼上鹽昆布作小綠葉配襯一番，砌出嘅美食藝術品充滿田園風味，精湛吸睛！粗粗長長嘅白蘆筍清爽脆口，黏上前方橙黃色以剝皮辣椒製出嘅法式沙巴雍醬及後方綠色嘅芥末豌豆泥即添上芬芳香潤。鰹魚/樹番茄/紫蘇：食法國大餐梗係唔少得魚魚啦，何況台灣咁多海產，結果食咗兩道。第一款魚生頭盤為本地鰹魚。厚實鮮濃嘅鰹魚先以日本柴魚高湯醃製，上枱時浸浴於由樹番茄、羅勒、柑橘、辣條等組成嘅香草油內，直令魚魚嘅下半身變得柔滑香軟；頂面再以洛神花、紫蘇梅及刺蔥加以點綴，菜式酸酸咸咸，口感豐郁尤甚。自製酸麵包/老菜脯奶油：自家製嘅酸麵包皮脆包鬆軟，但主角其實係旁邊另上嘅陳年28年嘅老菜脯奶油！明顯大家對「老菜脯」相當陌生，唔係好識國語嘅姨丈仲扮聽錯人地講「老太婆」，冷笑話逗得姨媽最開心。據悉，老菜脯乃醃蘿蔔，為當地嘅天然養生秘方，咁堅一定要試真啲喎！佈滿黑點嘅老菜脯牛油微酸微咸唔會過激，都幾得意嘅。白帶魚/黃酒/紫蘇梅：第二味煎白帶魚嘅外觀延續頭盤嘅花花主題，並加插咗分子泡泡嘅元素。焦香咗嘅魚皮酥脆巧薄，無奈厚厚嘅魚肉偏嚡同乾。色彩滿滿嘅泡沫醬汁以魚骨高湯作基礎，混入糟滷及紹興酒秘製，個味有少少似醉雞咁，入面嘅櫻桃蘿蔔用紫蘇梅醬醃製過，酸酸甜甜中又有啲咸咸地，講真成個餸唔係咁啱自己口味。鮑魚/綠竹筍/鮑魚肝：鐵色嘅碟盤同餐店門面嘅色調好夾，感覺鮑魚係重點菜，嘻嘻，不過每人只有半件好似唔係幾夠喉。以清酒、柴魚、昆布等高壓燉煮嘅南非鮑魚軟糯得黎仍保持Q彈嘅口感，塗點中間嘅鮑魚肝醬即倍添鮮濃，伴配嘅台灣綠竹筍以日式佃煮方式烹調，清脆甜美不俗套。軟絲/自製香料香腸/紅甜椒：菜式別號為「軟絲鳥巢麵」，原來係主廚嘅代表作之一，靈感明顯源自意大利粉。但寬闊長長嘅「麵條」其實一啲麵嘅成份都冇，條條都係用軟絲身體最嫩嘅部份搓出，軟嫩帶脆。不一樣嘅肉醬內含台灣特產嘅鵝油辣椒、紅甜椒、金棗、紅甜椒、巴西里，精髓在於師傅研創出由軟絲剩餘嘅部位，包括啲腳腳、內臟同軟骨，混成嘅辣腸，香辣惹味且鮮美獨特，毫不浪費食材之餘，更表現出其創作力量同幻想，妙哉！和羊臀肉/馬告/櫛瓜：和牛就食得多，「和羊」真係第一次聽到，家人好自然地估係日本羊，點知羊羊來自紐西蘭高地，因級數可媲美細緻嘅和牛，故被美食界封為「和羊」，係廚師們嘅紅肉新寵。經低溫熳烤嘅和羊臀色澤紅潤，油脂唔多，肉質相當鬆軟，意外地一啲羶味都冇，沾上用牛肉高湯𤉶煮嘅馬告胡椒汁即有提鮮醒神之效；所選用嘅馬告胡椒野生於台灣高山野生，係獨特嘅香料。旁邊爽脆香濃嘅配菜均為台灣本土種植，除咗幾片娃娃菜之外，當中主材「櫛瓜」屬高纖低醣嘅健康食材，又一台廚竉兒。‘大湖’草莓/玫瑰/優格：甜品環節繼續以繽紛嘅色彩刺激視覺，未食心情都已興奮雀躍。頭場紅艷嘅冰沙散發出淡薄嘅玫瑰香，墊底嘅大湖草莓清爽甜美，配上輕盈嘅荔枝味乳酪為甜品加咗層軟滑感，吃畢春天嘅氣味仍洋溢於口腔。脆皮泡芙/椰子/土芭樂：尾場半腍半脆嘅土芭樂泡芙一口一件，微甜不溜滯，極易入口。舅父勁有心，早就訂好草莓蛋糕俾靚靚媽咪許願拍照。店主亦加送生日甜點與祝福，暖意盎然！台北前星級食肆「MUME」雅致樸實，服務生親切周到，善用寶島食材所烹製嘅法式料理鮮美高質。主廚老闆敢於採用新興嘅肉類、蔬果及香料，配搭出嶄新味佳嘅組合，藝術性地演繹出「農場到餐桌」以作回饋及推廣，真心感激美饌藝廊為慶生派對帶來嘅驚喜！

隱食家.私房菜.餐酒 Inn's+ (中山區)

決戰台菜第二擊好隨緣地揀咗米芝蓮必比登推薦嘅「隱食家．私房菜．餐酒 Inn's+」，就係因為覺得個名有神秘感。隱世於靜寂嘅小巷上，門前嘅小陽台式樓梯設計令餐廳望落好似一間郊外小木屋咁，大自然得黎流露出一種親切感。就連後院嘅洗手間區格調都好優閒寫意。小店光鮮企理，簡樸嘅裝潢滲透出時尚氣息。大大小小嘅散桌都自成一角，好夠私人空間。七人用餐有得坐大圓枱，中間有個轉盤最方便夾餸。餐桌上有齊備嘅自用餐具。最得意係公筷嘅招財貓筷子座，勁梳乎！XO仔早於訂座時點好菜，多頁餐牌可於網上參看。埋位只需從兩頁飲品牌點選飲品。中午時份太陽高高掛，最興奮就係見到有生啤飲！（300ml艾德懷斯白啤酒：NT 150/杯）招牌蔥油雞（NT 720/大）：鎮店蔥油雞油光閃閃，雞皮潤滑富彈性，雞肉紮實得黎一啲都唔嚡，咬落好似黏上一層薄薄嘅啫喱咁好清新，應建議捲入蔥絲再塗點秘製辣醬，成功添上清爽及醒胃嘅辣勁。奶油蒜香菲力骰子牛（NT 680）：士的球炒得好香口，而且生熟度恰恰好，質感鬆巧得黎仍鎖上足量嘅肉汁，夾埋大大粒蒜頭更覺惹味。隱食家現炸紅糟肉（NT 320）：熱辣辣嘅招牌菜用上層次分明嘅五花腩製出，每件同樣厚薄適中，外層炸至脆卜卜嘅同時，中間嘅肥豬肉厚潤而不膩口，瘦肉亦鬆爽柔嫩，連同伴碟嘅蒜苗食即倍添韻味，送酒佳品也！手工紫蘇蝦餅（NT 320）：自家製嘅紫蘇蝦餅層炸漿同底面透出嘅紫蘇葉一樣咁巧薄酥化，個人只係略嫌中間嘅蝦餅粉粉地，唔夠鬆彈。金沙鮮魷（NT 420）：金黃吸睛嘅金沙鮮魷爽脆Ｑ彈且夠厚肉，混入嘅咸蛋黃份量恰到好處，組合契合鮮濃，吃畢又唔溜滯，香口尤甚，確真滋味無窮！手工秘製炸蚵捲（NT 200）：即場有比較下，修長嘅炸蚵捲層炸皮顯得厚腍唔夠脆，而且餡心入面嘅蚵仔偏乾同粉軟，應有嘅飽滿鮮潤盡失，失色得很！古法台式炒米粉（NT 580）：如相所示，米粉份量勁多，反而料同汁就好少，當中尤其落得唔夠蛋蛋！晶瑩嘅米粉雖然唔油膩，但食落淡而無味同微微偏乾，火候欠奉，感覺直頭清過食齋，請恕小弟未能推介。清沙娃娃菜（NT 250）：娃娃菜翠綠鮮嫩，簡單清炒已夠清爽甜美！手工焦糖布丁（NT 120/份）：自家製甜品不需賣弄花巧，布丁清香軟滑，焦糖香微甜可口。得悉幾位長輩嗜甜但又怕肥，賣單時仲多送輕盈脆薄嘅杏仁餅乾，甜意直達心房！隱世小廚「隱食家．私房菜．餐酒 Inn's+」遠離繁囂，區內環境清幽舒適，溫婉嘅服務生友善周到，溫情洋溢！台式料理用材新鮮，輕巧味佳，價格親民，大人細路都啱食！

富錦樹台菜香檳 (松山區)

家人祖籍福建，可以話同台灣瀝源甚篤，對台菜更加係情有獨鍾，故是次台北之旅主要都係探索市內新興嘅台菜美食。多得Google之神幫忙，成功覓得好幾家特色小店，次序首選可網上訂座嗰啲，邊日有位都一目了然，唔洗多次對話度期最方便。第一個午餐好隨意地揀咗米芝蓮星級代表「富錦樹台菜香檳本店」。蹺蹺地口嘅餐廳名其實有段古，了解咗之後當堂順口得多。原來「富錦樹」品牌源於（亦緣於）遠離鬧市嘅富錦街，創辦人由服飾玩到生活雜貨再擴展至餐飲業，集團就好似一棵大樹般，長出枝幹綠葉，蔭照民生社區，有意思極！屬下嘅「富錦樹台菜香檳本店」好順理成章地選取春色滿園嘅地舖開館。餐店融入成一個大花園咁充滿大自然氣息。門外嘅室外座被樹林籠罩著，透明玻璃屋簷嘅設計就好比溫室般。用餐大堂潔淨企理，散座分得夠開，完全冇擠迫感，木造枱櫈配瓷磚地面夠哂乾爽舒適。值得一讚再讚嘅就係年輕嘅服務生十分體貼周到，見姨媽行動不便即幫忙扶助，並提點洗手間前方有高高嘅梯級要留神。長輩好欣賞洗手間又大又衛生，而且有齊備嘅口腔用品。多頁餐牌可於網上瀏覽，建議大家三天前預訂好菜式。部份節令菜式可即場加點。確認好菜單，妹妹先送上開胃爽脆嘅醋溜雲耳（招待）。每位席上都有齊備嘅自用餐具，餐具座仲可以放埋匙羮，非常實用。應推介點咗壺東方蜜美人（NT 350/壺），綠茶甘香纖細，可口尤甚。特調白斬雞（NT620）：已預先去哂骨嘅雞件皮光肉軟滑，而且肥膏不多，浸入另上嘅特調辣汁後再滴上金桔汁，白斬雞頓變得清新微辣，醒神又醒胃，哥哥講得好啱，好有泰國風味。白蘆筍清炒菜心（NT 580）：原來台灣嘅「菜心」即係「萵筍」，師傅選拼節令嘅白蘆筍炒出，萵筍嘅潤甜碰上白蘆筍嘅清脆，當真正如妹妹仔介紹時所形容般成功「擦出甘甜嘅火花」！富錦麻婆豆腐心（NT 580）：招牌麻婆豆腐精髓在於個心多咗隻光滑流心嘅溫泉蛋！碟中嘅肉碎豆腐粒本身相當軟嫩，撈入蛋蛋後，菜式嘅辣味增添咗份柔順香濃，神來之筆就是如此！小肥唔係咁食得辣，所以就叫咗碗白飯（NT 40）黎送，估唔到白飯混入咗台灣紅藜煲出，食落健康得多，嘻嘻，連罪惡感都減埋。剝皮辣蝦滑蛋（NT 680）：已去殼嘅蝦隻爽脆彈牙，微微嘅辣勁唔算太強，個人只係略嫌所謂嘅滑蛋似奄列加芡多啲。油條蒜蓉鮮蚵（NT 720/大）：喺台灣食蚵仔都幾有信心，去到邊啲蚵仔都係粒粒咁肥嘟嘟同脹卜卜，食落鮮甜肥嫩之餘仲一啲沙都冇，配上香脆嘅油炸鬼粒，直令口感更有層次。寶島米粉（NT 520/大）：好少見炒米粉會好似「富錦樹」咁料多過米粉，直頭可以當係一個餸咁食，而唔係單尾。米粉麵條十分幼細，炒得夠鬆身得黎唔會太乾或太濕，簡單混入高麗菜、肉絲、冬菇絲、蝦米等已能吊出鮮爽。蝦湯煨龍蝦蛋（NT 1,380）：成餐飯最為失色竟然係龍蝦蛋！如相所示，濃縮嘅蝦湯底好似芡汁咁渴身，唔講真係唔覺有蕃茄嘅存在，龍蝦肉好似尋寶咁先搵得到，肉質仲要老嚡帶韌，不值一試。清炒海瓜子（NT 680）：用上大量薑蔥炒製嘅海瓜子鮮甜肥潤又多汁，細細隻容易食。松花蒼蠅頭（NT580）：經典台菜以韭菜、肉碎、豆豉、皮蛋等，全部剁成粒粒炒出，咸香脆口中帶有微微辣勁，仲好夠鑊氣添。老皮嫩肉（NT 520）：所謂「老皮」其實即係粗嚡嘅腐皮，「嫩肉」則為嫩彈嘅玉子豆腐，個名改得幾盞鬼！老皮嫩肉外層煙韌，玉子豆腐心柔滑，要黏上多啲汁先夠味，一啲都唔差，只係個人會情願選擇試其他菜。北海道干貝竹笙雞湯（NT 2,380）：喺日本成個禮拜冇啖湯水落肚，姨媽們都話想飲碗雞湯，不過真係冇諗到煲湯份量咁激，七個人都飲唔哂。呈奶黃色嘅雞湯用上原隻雞雞及足量嘅乾瑤柱燉製，鮮濃甜美，啲雞皮又薄又滑，仲冇哂脂肪黐住，索盡精華嘅竹笙爽潤入味，靚湯好夠火候，之但係人少就唔可以叫咁多餸，因為淨係食湯料已經好飽肚。彷如世外庭園嘅「富錦樹台菜香檳本店」環境優雅秀麗，服務生窩心好客，摩登演繹之台菜輕盈美味而且有新鮮感，價廉物美，摘星有道，大家不妨一試！

雞家莊 (中正區)

喺日本一個禮拜主要都係食和牛同海鮮，深知姨媽最愛食雞，所以喺台北食嘅第一餐就搵咗間雞雞專門店「雞家莊」。據悉新店易搵位啲，為怕同行嘅七、八旬長輩要等位，初次到訪就棄選母店，先試「雞家莊六條店」。地舖於街道上閃出金光，右邊可見雞群烘住幾款招牌菜式嘅靚相。左邊則吊出多隻不同色澤嘅雞雞。用餐大堂嘅紅白半磚牆滲透著傳統中國風彩，光線充裕，衛生企理，餐桌與餐桌間夠距離，空間感足。XO仔自知國語發音唔係太標準，避免發生雞同鴨講嘅情形，故早已做定功課諗定叫乜兼寫定紙仔，姐姐仔見狀明顯感到意外，不過微O嘴後即以手指公回應。三味雞（NT 800）：顧名思義，招牌雞由三款口味嘅雞雞合拼而成，包括橙亮嘅燻雞、黃皮嘅白斬雞及黑皮嘅烏骨雞。色澤不同嘅三味雞油光閃爍，脂肪唔多，肉質都好軟腍，最意外係烏雞啲肉唔嚡，依個價錢絕對唔應該挑剔，只係自己食過更嫩滑嘅而已。姨丈就勁欣賞拌碟嘅酸菜，大讚咸酸中帶著爽甜，比雞肉更有特色。雞飯（NT 50/位）：原來「雞家莊」嘅雞飯同平時跟海南雞嘅油飯唔同，熱辣辣嘅雞飯係用雞湯煲煮而成，清香不油膩。收費係人頭計，偷聽到隔離枱話可以無限添加，不過八人分咗四碗都差啲食唔哂，建議大家可以先二至三人分一碗，唔夠先追加。蔭豉蚵（NT 398）：粒粒脹爆嘅蚵仔鮮嫩肥潤，以豉汁蔥粒爆香已夠惹味，經典台菜冇得輸。沙茶豬心（NT 420）：淨睇餐牌未必會點，多得食家網友極力推薦先膽粗粗一試！貌似炒牛肉嘅豬心片得好夠薄身，咬落爽脆Q彈，熱辣夠鑊氣，個人覺得比招牌三味雞美味得多，必吃也！雞家豆腐（NT 298）：鎮店名菜之一嘅賣相可愛吸睛。大大隻公雞外表十分剛強，砵中嘅豆腐卻幼嫩滑溜，混入其中嘅雞肉碎都一樣軟嫩，微微嘅辣勁提神醒胃，撈埋落個雞飯度食尤其芳香。木耳水血（NT 298）：「雞紅」喺台灣叫做「水血」，喺雞雞專門店梗係要點黎試吓啦，話哂日日劏咁多隻雞，啲雞血應該最新鮮。連相都影得出厚厚嘅水血光滑尤甚，學二叔話齋，滑到唔洗咬已經可以直吞，唔嚡兼冇渣，伴入脆巧嘅木耳即為口感添上層次。脆皮腸（NT 398）：酥炸大腸喺香港食唔少，感覺台灣版雖然好似冇咁油，不過食落唔夠脆之餘仲好韌皮，少啲牙力都未必食得到。雞卷（NT 340）：網友另一推介嘅雞卷係就係炸得好金黃，無奈外層嘅腐皮腍而不脆，咬落仲有陣油膱味，卷中嘅雞肉餡乾嚡偏硬，唔知廚房係咪嗰日失手呢？鹽水肫（NT 298）：姨媽堅眼利，一入門口已經留意到左方斬雞師傅留起咗啲雞腎，由於唔識國語點講就用手指搭救，姐姐仔明白後即寫出「雞肫」同「雞胗」，讀都未識讀，真係好難估得中喎！。新鮮雞腎爽口彈牙，一個字，「」！麻油腰花（NT 440）：帶有麻油香嘅豬腰一啲餲味都冇，每件同樣鬆爽厚潤。手工雞蛋布丁（免費招待）：結尾點咗兩客雞蛋布丁黎分，甜品芬芳柔滑，焦糖漿嘅甜味成功吊出蛋香，恰到好處。埋單提示收銀員冇寫甜品落單，即學識「免費贈送」為「招待」，今餐又學到野。「雞家莊」為台北擁有四十多年經驗嘅老字號，其六條店光鮮企理，服務生以禮相待，招牌小菜有板有眼，肥肥家族反覺內臟菜式更有驚喜，價格親民合理，絕對值得一試。