鼎泰豐 101店 (信義區)

為怕年長嘅家人趕，哥哥專登選乘傍晚機返港，朝早辦理好退房手續，諗住可以行過去101食埋台灣名店「鼎泰豐」嘅小籠包先佗佗佻佻地去機場。真係冇諗過餐店早上十一點開門，十點九門外已企滿已取票嘅食客等位，七人用餐結果等咗成個鐘先可進場，即係食第二輪。幸好等待期間可先於網上點菜，打發咁啲時間。亦可於收銀處選購可愛嘅紀念品。仲印埋個101店紀念章添。無奈人齊先可入座，八旬家人要企咁耐確真有點兒吃力。餐廳面積開揚寬廣，又夠光猛，最入位置可見多位帶哂口罩同帽帽嘅廚師忙碌工作，透明度高且相當衛生。所有食物由餐飲機械人派送，節省人力且效率高。烤麩（NT 110）：烤麩前菜香甜鬆爽。紹興醉雞（NT 350）：醉雞嘅雞皮夠油滑，可惜肉質嚡口唔軟熟。香辣牛肚（NT 200）：以香蒜點綴嘅牛肚爽辣帶脆，惹味討好。高麗菜（NT 230）：大大塊高麗菜清脆唔油膩，只係冇乜味。清炒蝦仁（NT 490）：蝦仁尚算爽口，不過未為最鮮。紅油抄手（菜肉；NT 180）：雖然個賣相冇乜特別，但多款包包同餃餃中以此味紅油抄手嘅皮層最滑溜，菜肉餡心仲好脆嫩。香菇素餃（NT 27/個）：素餃皮厚偏硬同乾，完全唔掂當！蝦仁蛋炒飯（NT 270）：金黃吸睛嘅炒飯落得夠蛋蛋所以好香，飯粒飽滿肥潤，反而啲蝦仁偏乾同老。排骨麵（NT 240）：上枱時全塊排骨已經浸咗喺湯入面不知幾耐，食落好自然地超腍，個湯仲好油添，其實排骨如果分開上即能解決所有問題，有心做亦唔難。酸辣湯（NT 170/中）：酸辣湯為哥哥同媽咪所點，細佬一向怕酸所以冇試，只交由手機代食。小籠包（NT 250/十隻）：鎮店招牌小籠包雖則肉餡軟嫩鮮甜，弊在皮厚湯少，頗為失色。蟹粉小籠包（NT 400/十隻）：蟹粉小籠包除咗個籠入面多咗隻小黃蟹做記號之外，講真食落同普通小籠包無異，貴咁多都食唔出有蟹味喎，堅唔抵啦！小籠湯包（NT 380/二十隻）：只限週末提供嘅小籠湯包明顯細粒啲，姨媽真係好眼，留意到另一分別係個結原來係收喺包底嘅。應建議連另上嘅蛋花湯食，感覺限量貨色層皮比普通小籠包更厚且肉更少，點心盡失小籠包嘅特質，真心食唔過！紅燒牛肉麵（NT 280）：紅燒牛肉麵入面啲牛筋軟彈入味，湯底都好濃甜，唯一唔係好夠熱，同埋麵條有啲硬。元盅牛肉麵（NT 270）：元盅牛肉麵嘅湯餸分開上，湯底比紅燒牛肉麵熱辣，靚肉半鬆爽半軟腍，係三種湯麵中最美味嘅一款。商場餐廳「鼎泰豐101店」環境企理，服務生態度良好，運作流暢所以返枱迅速。或許期望過高所致，感覺招牌菜式包括小籠包嘅質量比較一般，價格亦不甚親民，要排成個鐘頭隊去食當真唔係咁值囉！

巷子龍家常菜 (大安區)

探索台菜行動話咁快就黎到第三會合，頭嗰兩餐全權由晚輩XO仔揸fit揀咗新派秘店，壓軸就留返去試姨媽閨密推介且有啲名氣同歷史嘅「談話頭」。上網搵料訂位，方才知悉「談話頭餐廳」經過多次搬址後，早幾年連名都改埋做「巷子龍家常菜」；訂座只能靠打電話，客人必需提供當地聯絡電話號碼。店子門面最突出就係貼喺落地玻璃窗上又大又紅嘅「2021年米其林必比登推薦餐廳」標貼，比店名更起眼。室內光線充裕，用餐大堂十分開揚，只奇怪在喺並非滿座嘅情況下，七人派對竟然被安排入座狹窄一角嘅長枱，對長輩們出入不便之餘，夾餸亦有相當難度。細佬就係咁介意，留意到相中更適合家人嗰張圓枱成晚都冇人坐囉！兩頁餐牌只有中文版。牌上印出嘅餐廳名下方註明此店乃「談話頭後傳」，証明冇搵錯地方啦！黑板列出數款是日推介項目，同樣只有中文版。餐桌上擺有足七人嘅自用餐具。樓面只有一人工作，落單、傳菜、斟水等功夫一腳踢，寫菜時問多兩句難免會顯得不耐煩，不過當冇哂水飲想添，同要求攞公筷及換碟時都要睇佢面色就唔係咁過癮。現做菜飯（素；NT 220）：廣東人除咗白飯跟餸上之外，其他飯麵多數都係當單尾最後先出，唔知台灣文化係咪相反呢，未有餸食時第一道先上菜飯；其實家常便飯咩次序都唔緊要嘅，只係自己鍾意諗野姐。以雪菜同豆豆所炒出嘅飯粒十分飽滿，但就比較濕，幸好調味芳香得黎唔會過咸，熱辣辣好暖胃。蒼蠅頭（NT 320；NT 470/中）：普通食開嘅蒼蠅頭多數都係菜多肉少，巷龍版明顯用肉較多，菜肉比例更為平均，選用嘅半肥瘦豬肉好爽潤，菜式香脆少辣，可口有鑊氣。蘿蔔牛肉半筋半肉（NT 520/小；NT 780/中；NT 1,100/大）：牛筋腩調味香濃，個人只係略嫌當中嘅薑味太強仲有啲搶。大大件牛筋滑就夠滑，但煮得唔夠腍，對牙力有限嘅長輩有一定嘅難度，結果要搵刀叉幫忙，牛腩肉就腍身易咬得多，最正係入哂味又夠軟熟嘅蘿蔔。湖南金錢蛋（NT 320；NT 470/中）：據悉此乃鎮店招牌菜，來者必點，愛食蛋蛋嘅家人當然係唔會放過啦！平心而論，經過烚煮炸炒嘅金錢蛋雖然係香香地口，無奈蛋黃部份尤其乾嚡粉老，蛋白亦冇乜彈性，蛋蛋本身嘅香滑感盡喪，食落得個辣字，可能係各「蛋」入各眼吧。炒青菜（NT 230；NT 340/中）：清炒椰菜清脆利落。無錫排骨（NT 520/小；NT 780/中；NT 1,100/大）：排骨骨大少肉，唔用刀切根本食唔到，肉肉又硬又韌，而且超咸勁酸，不值一試！螞蟻上樹（NT 300；NT 450/中）：晶瑩透光嘅粉絲軟彈得黎唔會好油，簡單拌入肉碎、蔥花、椒絲炒出以夠香辣惹味。砂鍋魚頭（NT 1,100/小；NT 1,600/中；NT 2,000/大）：此味砂鍋魚頭為姨媽姨丈所點，小弟一向怕骨少食魚，外遊更加冇膽亂試，唯有交由相機代表食先。多得前傳創下嘅風光，台菜小館「巷子龍家常菜」可稱得上為半老字號。小店環境簡潔，可惜人手極度短缺，雖標榜絕不加味精，但地道台菜口味較重，未必人人接受得到。請大家留意，餸菜份量都幾大吓，建議邊食邊點，因為當晚服務生代選嘅份量遠超出八旬家人嘅食量，旅行中不便打包，結果就浪費收場！埋單只收現金唔出奇，怪在冇單對兼冇收據，人多最好心算定條數囉！講真食物唔算貴，質素唔算差，最重要係用餐前、中、後好多細微野加加埋埋令整體經歷唔係咁爽，市內其他選擇明顯吸引得多！

台南三哥海鮮 (中山區)

自從幾年前喺「台南三哥海鮮」享用過一頓豐盛嘅海鮮宴後，姨媽們對其高質價廉嘅海鮮菜式仍念念不忘。因為上次分開搭的士時差啲失聯，今次小肥就專登安排咗喺離台當日，有包車接送下，先再去幫襯。餐廳家庭式作業，只限電話訂座，環境依舊咁街坊。嬸嬸得知可以台語溝通即變得友善得多，隨即先送上三款花生、青瓜、自家醃製嘅蛤仔。並強調小食全屬送酒佳品，嘻嘻，咁就要啤一啤佢啦！細佬兩款台灣啤酒都試哂，略嫌兩者嘅口味偏淡同有微微澀，只可以話唔係自己杯啤酒囉。早已知曉店子並無餐牌，XO仔就根據上次嘅經驗點返自己推介過嘅菜式，另加嬸嬸即場提議嘅幾味小菜。白鯧米粉（NT 600/小）：十人用膳，看似人多可以點大份，但由於早已規劃咗會去食下午茶，結果就點咗小份。如相所示，連爐上嘅白鯧米粉細份都好大鍋。夾起哂啲芋頭、蔥、炸白鯧魚件後，可清晰地見到滾湯入面嘅米粉同蠔仔勁足料，無奈今次嘅魚湯底唔係幾夠味，差咁少少火候，甚為失色。黑腳太監雞（NT800/半隻）：嬸嬸極力推薦嘅「黑腳太監雞」隻腳當真係黑色架；點咗半隻雞，所以只見一隻黑腳。雞隻明顯好大隻，不過皮下脂肪唔多，外表健康得黎有光澤。正當大家以為太監雞嘅肉質會較為幼嫩時，食落口雞肉卻偏嚡帶韌，加上皮層仍可見到不少雞毛，衛生方面亦大打折扣，請恕小弟未能推介。蕃薯葉（NT200/中）：鮮綠色嘅蕃薯葉質感軟身得黎帶點嚡口，而且調味過咸，不吃也吧。蒜泥蚵仔（NT 400/中）：最令XO仔失望必選個人最期待嘅蒜泥蚵仔！碟上嘅蚵仔體積雖則看似肥潤，可惜用粉過多，咬落又腍又黏，毫不鮮甜，亦談不上惹味，碟底仲要水汪汪咁，難怪個個食到搖哂頭。香煎烏頭（NT 1,300）：據姨丈所講，整頓午餐最好食就係此味香煎烏頭，不過小弟因為怕骨冇試到。處女蟳（NT 1,000/隻）：萬眾期代嘅處女蟳外殼橙紅鮮美，上枱時夠哂震撼！但係當姨媽打開黎睇，即發現蟹膏不單色澤暗淡，不甚濃厚，吃畢更齊聲地有彈冇讚，完全唔掂當呀！清炒水蓮（NT 200/中）：最後碟水蓮菜外觀還好，但咬落老嚡之餘，仲要勁多渣，結果最怕浪費食物嘅長輩們都話與期食到成碟渣，倒不如食剩可能會好過啲。相隔幾年再訪「台南三哥海鮮」，環境人物冇變，唯一食物質素明顯下降。市內不乏食肆，睇黎都唔會再返轉頭。

北芳園招牌牛肉麵 永吉店 (信義區)

訪台四天，點都要食返碗台灣牛肉麵先算遊過台北嘅，臨去機場前就應旅遊書推介一試「北芳園招牌牛肉麵」。下午茶時間，麵店內只有兩枱客，所以唔洗排隊，座位仲任揀唔嬲添。店子面積不小，中間一排四人方形枱，埋邊則為二至多人嘅半梳化式散座，都幾闊落。一頁餐牌中英對照，並附帶彩圖及標明價格，清晰易明。點菜已全面電子化，十分先進，流程簡單快捷。餐桌上設有自助餐具。仲有個「服務小叮嚀」牌仔，提醒貴客如對麵品有任何不滿，可即時反映，廚房會馬上調整，似乎要求相當認真。收銀員態度溫和，知道十人為遊客顯得都好有耐性，告知調味料及開水必需喺出面自己攞。由於食完午餐冇幾耐，為怕浪費食物，全體都決定一嚐份量較少嘅「淑女版」半筋半肉清燉王牛肉麵，當中長輩大多都選擇食細麵。半筋半肉清燉王牛肉刀削麵（NT280/淑女）：麵品個湯底淡而無味，也過份地清了吧！入面嘅牛筋同牛展極其量只可以話係普普通通，冇乜特別；而粗厚嘅刀削麵雖然好夠嚼口，食落整體卻欠缺香濃及火候，一般到完全唔會令人想返轉頭嗰隻。「北芳園招牌牛肉麵」嘅牛肉麵當真質量不甚突出，或許其環境比其他台灣牛肉麵店大間及企理，方才得到旅遊書籍嘅推薦，不過以NT 280/細碗咁嘅價位黎講，個人覺得市內實在有太多更好嘅選擇了。

樂沐法式餐廳 (西屯區)

兩年前左右，多得越台工作嘅肥叔叔推介，肥肥家族方才有幸於台中「樂沐法式餐廳」品嚐過美女廚神製作嘅不一樣感官旅程：
<https://tw.openrice.com/zh/taichung/review/%E6%A8%82%E6%B2%90%E4%B8%8D%E4%B8%80%E6%A8%A3%E7%9A%84%E6%84%9F%E5%AE%98%E4%B8%96%E7%95%8C-e124169>

點知冇幾耐就收到風，話餐廳於2018年尾將會結業。因家中多位親友都未有緣一訪，所以小肥就幾經艱辛咁托上托，務求要訂到位一同去道別，嘻嘻，皇天總是不負有心人嘅，日子時間當然係任由餐廳定啦！
十二人嘅晚餐必先預定菜單、道明各人對咩食物有過敏及收取訂金，全程以電郵溝通，非常簡易。闊別一年多，三層高嘅洋房依然貴麗大方。由於早已訂下菜譜，埋位即由最識飲嘅姨媽點選酒品，不過因餐店不再入貨，大多項目都已售罄，只係牌上未有標明。溫婉有禮嘅哥哥仔極之有耐性，除咗推介仲有貨嘅精選紅酒外，對待臨時對菜單有異議嘅auntie更加係有求必應，十分相就，態度專業得很。處理好飲品後，姐姐先送上兩款海鹽味及海藻味牛油。正當細佬懶醒地同各人提到2017年嘅感官午餐中有多款自家製麵包，印象最深刻有香醇惹味嘅高梁酒臘肉包及芳香微甜嘅蜂蜜麥包時，即令大家滿心期盼，真係冇諗到晚餐嘅麵包居然只有含果仁及不含果仁兩種！雖然包品熱辣鬆脆，但喺有比較下就覺得廚房孤寒咗，誠意也大打折扣囉！店內全場嘅晚餐均清一色由兩道是日下酒菜作序。第一道海鮮二重奏先以石春拼盤呈上，外表閃爍耀眼，精緻美觀。應建議由左邊起食，橢圓形嘅「青蘋果煙三文魚啫喱」質感軟潤，無奈底層件餅塊過份腍身，加上入口即嚐到三文魚籽嘅腥味，這種重口味也太不令人開胃了吧！幸好旁邊金光閃閃嘅匙羮上件「海膽蟹肉牛油果卷」清新甜美，可口脆巧，叫做挽回少許失落之感。第二道下酒菜「苦瓜／帶子／芝士」以彩色嘅食用花點綴，睇落就靚啦，但係可能個芝士苦瓜組合嘅苦味過份剛烈，細佬真係食唔出任何帶子嘅元素囉，不幸中之大幸就係兩啖就食完，算係唔會咁浪費食材。接著嘅「冷燻鵝肝：桂花／杏桃／蓮藕／蓮子」外型典雅，可惜主角鵝肝偏嚡同硬，唔得軟滑，其味道亦不夠香濃，甚為失色！碟上最正反而係舖面巧薄乾脆嘅炸蓮藕片及隱藏喺底件脆卜卜嘅鴨舌！或許係自己期望太高吧，傳聞嘅招牌菜式「八戒：豬心／薏仁／四破魚／煙燻豬骨汁」除咗輕巧脆薄嘅卜卜脆討好之外，雖則豬心嘅質感尚算爽腍，敗筆在於調味滲出一股不易接受嘅腥與押，就連汁液中嘅煙燻味都未能蓋過，莫非「八戒」未洗白白？！晚餐高潮位必選「小牛胸線：黃菇／香料麵包／山茼蒿」！熱辣嘅醬汁由專人續一喺食客面前斟上，小牛胸線方塊外脆內軟嫩，香口惹味得黎一啲都唔溜滯，一個人食兩份都冇問題。壓軸嘅鵝肉主菜登場前，每人先要揀選一把靚刀，每把都咁有睇頭同份量架！跟小牛胸線一樣，汁液上枱時先會即場淋上。記得上次黎食「感官」午餐時，當中嘅嫩烤鵝肉主菜是何等精妙，想不到餐店結業前出品嘅「嫩烤鵝肉：無花果／可可香料醬」竟然會係韌到切唔斷，咬唔開！牙力唔好嘅長輩們好多都勁不情願地食剩喺碟，睇日劇學懂此舉可算為對廚師最低嘅評價。換轉甜品環節前，先由清新爽涼嘅「鳳梨：卡蒙貝爾乳酪／野薑花／馬告」作間場。正常版甜品「楓蔦黃」為楓葉栗子蛋糕。不含果仁版甜品為中西合璧、微甜滋潤嘅「睡蓮」。
而不能進食甜品嘅食客就有份酸都佢地咪哂眼嘅「生果盤」。結尾嘅「精緻茶點」中只有粉紅小天鵝一如名字般精緻，但僅此而已，因為三款茶點極度酸澀，食到連牙仔都哂打冷震，聽落恐唔恐怖呢？！好在飯後有杯正正常常嘅特濃咖啡中和吓先舒服返咋。外觀形如一幢別墅嘅米芝蓮星級食肆「樂沐法式餐廳」可算是台中最有名嘅法國餐廳，曾榮獲「亞洲50最佳餐廳」之美譽，當真萬萬估不到於二零一八年十二月正式結束營業前嘅告別宴居然會教人如此驚嚇地失望！雖則店內嘅接待員及服務生依舊友善體貼，但對遠由香港越洋嘅家人黎講，菜式偏低之質量及廚神未有親身烹調嘅情況下，也顯得「樂沐」的落幕過份草率及敷衍了，感覺就好似餐店喺度夾硬頂埋個租約咁。因深深體會到名廚店主對食客嘅尊重都消失埋，在座嘅各位都表示即使餐店日後會重開都絕不會幫襯！店子已沒有了，更談不上有進步空間，唯有搖頭高歌一曲「忘記它」。